Ди щIыналъэм и махуэ нэхъ дахэхэм ящыщщ нобэрейр. Дыщыпсэу къэралышхуэм и дэтхэнэ щIыпIэми хуэдэу, республикэм и школхэм, гъэсапIэхэм щагъэлъапIэ ЩIэныгъэхэм я махуэр. БлэкIа илъэситIым, коронавирус узыфэ зэрыцIалэ лIэужьыгъуэщIэм дуней псом зыщиубгъуауэ щыщыта лъэхъэнэ гугъум, хуэмыдэу фокIадэм и 1-м гуфIэгъуэ зэхыхьэхэр Iэтауэ дэнэкIи щокIуэкI. Республикэм и къалэхэмрэ къуажэхэмрэ я уэрамхэм нышэдибэ къыдыхьащ удз гъэгъа Iэрамэ дахэхэр зыIыгъ, екIуу хуэпа ныбжьыщIэхэр. Ахэр хуопIащIэ я школхэм щекIуэкIыну гуфIэгъуэ зэхыхьэхэм, я япэ дерсхэм. Псом хуэдэжтэкъым махуэшхуэр нэхъыбэу зыхуэщIа сабийхэу япэ дыдэу япэ классым кIуэхэм яIэ гукъыдэжым и инагъыр. Апхуэдэ цIыкIухэм я бжыгъэр ди республикэм мы гъэм мин 13-м щы-щIегъу.
Зи гъэмахуэ зыгъэпсэхугъуэ зэманыр иуха сабийхэмрэ ныбжьыщIэхэмрэ йокIуэлIэж я еджапIэхэм, сабий садхэм. 2022 - 2023 гъэ еджэгъуэщIэм зэрыщIидзэм и нэщэнэ япэ уэзджынэр нобэ къыщоуэ ди щIыналъэм и егъэджэныгъэ-гъэсэныгъэ IэнатIэхэм. НыбжьыщIэхэм, абыхэм я ущиякIуэхэм - гъэсакIуэхэм, егъэджакIуэхэм - я махуэшхуэм хэтщ республикэ, щIыпIэ къэрал IуэхущIапIэхэм я лIыкIуэхэр, къалэ, къуажэ администрацэхэм я унафэщIхэр, жылэхэм я нэхъыжьыфIхэр, адэ-анэхэр. Япэм хуэмыдэу, ЩIэныгъэхэм я махуэм ехьэлIа гуфIэгъуэ зэхыхьэхэр мы гъэм къызэIуахынущ УФ-м и къэрал ныпыр яIэтрэ хэкум и къэрал гимныр ягъэзащIэу. Апхуэдэу дяпэкIэ щытынущ гъэ еджэгъуэм и блыщхьэ къэс. Фигу къэдгъэкIыжынщи, жылагъуэм къыхалъхьа а жэрдэмыр диIыгъащ УФ-м и Президент Путин Владимир.
Гухэхъуэщ зыхуей хуагъэзэжа, сыт и лъэныкъуэкIи зэпэщ ящIыжа еджапIэхэм, яухуагъащIэ школыщIэхэмрэ сабий гъэсапIэхэмрэ дэт щIэблэм уахэплъэну. Апхуэдэ гукъыдэж яIэщ абыхэм я егъэджакIуэхэм, гъэсакIуэхэм, адэ-анэхэм. А псори и фIыгъэщ иужьрей илъэсхэм къэралым егъэджэныгъэ-гъэсэныгъэ IэнатIэм зегъэужьыным гулъытэшхуэ зэрыхуищIым. Зы гъи къанэркъым абы хухах ахъшэр нэхъыбэ мыхъуу. Апхуэдэу ахъшэ мымащIэ хухах «Егъэджэныгъэ» лъэпкъ проектым къыщыгъэлъэгъуа унэтIыныгъэм ипкъ иткIэ екIуэкI лэжьыгъэхэр къызэгъэпэщыным. А мылъкур хуаутIыпщ школыщIэхэр ухуэным, лажьэхэр зэгъэпэщыжыным. А Iуэхугъуэ псори зэфIэхыным набдзэгубдзаплъэу кIэлъоплъ республикэм и пашэхэр, щIыналъэ, щIыпIэ унафэщIхэр.
Къэбэрдей-Балъкъэрым иджыпстуи шэщIауэ щокIуэкI щIыналъэм курыт школыщIэхэр щыухуэным, щыIэхэр щызэгъэпэщыжыным епха лэжьыгъэхэр. Абыхэм къызэщIаубыдащ псори зэхэту еджапIэ 39-рэ, щIэуэ яухуэхэри хэту. Абыхэм ящыщу куэдым я бжэхэр ныбжьыщIэхэм къыхузэIуахыжащ фокIадэм и 1-м ирихьэлIэу. Адрейуэ ухуакIуэхэр иджыпсту зэлэжь еджапIэщIэу 10-м ящыщу щыр мы гъэм и дыгъэгъазэ мазэм хьэзыр хъунурэ, школакIуэхэм илъэсыщIэ тыгъэ гуапэ хуащIынущ. Псори зэхэту къапщтэмэ, 2022 - 2023 гъэхэм къриубыдэу школ 50 щызэрагъэпэщыжынущ ди республикэм.
КъБР-м и Iэтащхьэ КIуэкIуэ Казбек егъэджэныгъэ IэнатIэм зегъэужьынымкIэ игъэбелджыла къалэнхэр я тегъэщIапIэу, гулъытэшхуэ егъуэт егъэджэныгъэм и мылъку-техникэ лъабжьэр нэхъри гъэбыдэным, ар бжыгъэр зи тегъэщIапIэ технологие пэрытхэм тегъэувэным, ныбжьыщIэхэм щIэныгъэ куу зрагъэгъуэтын папщIэ, Iэмал псори къахузэгъэпэщыным. Апхуэдэщ егъэджакIуэхэм я улахуэм хэгъэхъуэным, егъэджэныгъэм технологие, методикэ пэрытхэр хэгъэхьэным, зэрырагъаджэ программэщIэхэр, тхылъыщIэхэр къэщтэным, егъэджакIуэхэм я щIэныгъэм хэгъэхъуэным, лэжьыгъэм къыхэжаныкIхэр гъэпэжэным, бынунагъуэшхуэхэм щыщ сабийхэм, зи узыншагъэм сэкъат иIэхэм гулъытэ хэха яхуэщIыным, нэгъуэщIхэми ехьэлIа Iуэхухэми къэралыр зэрелIалIэр. КъинэмыщIауэ, школ щIэтIысхьэжыгъуэм ирихьэлIэу щIыпIэ куэдым щекIуэкIащ щэбэт щIыхьэхухэр. Абыхэм къыщалэжьа мылъкур бынунагъуэшхуэхэм щапI сабийхэм, щытыкIэ гугъум ихуа унагъуэхэм исхэм хуаутIыпщащ.
Гулъытэшхуэ егъуэт щIэныгъэ зэгъэгъуэтыным епха япэ лъэбакъуэхэр ныбжьыщIэм щич сабий гъэсапIэхэми. Апхуэдэ IуэхущIапIэщIэ куэд иужьрей илъэситIым щаухуащ ди республикэм. Абыхэм иджы щыкIэлъоплъыф зи ныбжьыр илъэс иримыкъуа цIыкIухэми. Апхуэдэ Iэмалхэр щыщыIэщ, къапщтэмэ, Налшык, Щхьэлыкъуэ, нэгъуэщI жылэми щаухуа садыщIэхэм. IэнатIэм зэпыу имыIэу щофIакIуэ гъэсэныгъэм, егъэджэныгъэм ехьэлIа лэжьыгъэхэр. Ди щIыналъэм и гъэсапIэхэр жыджэру хэтщ республикэпсо, къэралпсо зэпеуэ зэмылIэужьыгъуэхэм, увыпIэфIхэри къыщахь.
ГъэсапIэхэм пэщIэдзэ щIэныгъэ щызыгъуэта цIыкIухэм еджэным щыпащэ курыт школхэм, лицейхэм, гимназие зэхуэмыдэхэм. Абыхэм яхэтщ предмет хэхахэр нэхъ куууэ щаджхэри, IэщIагъэ зэмылIэужьыгъуэхэм хэзыгъэгъуазэ курс щхьэхуэхэр къыщызэгъэпэщахэри, унэтIыныгъэ хэха зиIэхэри. Курыт щIэныгъэфI зыгъуэта ныбжьыщIэхэм IэщIагъэ щызрагъэгъуэт колледжхэм, техникумхэм, институтхэм, нэгъуэщI еджапIэхэми.
ЖыпIэнурамэ, егъэджэныгъэмрэ щIэныгъэмкIэ къэрал IэнатIэхэм я унафэщIхэм зыхуагъэувыж къалэн нэхъыщхьэхэм ящыщщ ныбжьыщIэхэм щIэныгъэ куу зрагъэгъуэтынымкIэ Iэмал етыныр, ахэр щыпсэу щIыпIэмрэ къызыхэкIа социальнэ гупымрэ емылъытауэ. Аращ зыхуэунэтIар а Iуэхугъуэхэм епха лэжьыгъэ псори. Абыхэм шэщIауэ, и щхьэ течауэ щытепсэлъыхьащ КъБР-м ЕгъэджэныгъэмкIэ и министерствэм и лIыкIуэхэр къызрихьэлIа республикэпсо шыщхьэуIу зэIущIэшхуэу иджыблагъэ Налшык къыщызэрагъэпэщам. Зэхуэсым къыщагъэнэIуащ гъэ еджэгъуэ блэкIам зыхунэмыса Iуэхугъуэхэри, дызэрыт лъэхъэнэщIэм къапэщылъ къалэнхэри щаубзыхуащ.
ФокIадэм и 1-м, ЩIэныгъэхэм я махуэмкIэ, ди гуапэу дохъуэхъу еджэным, щIэныгъэрэ IэщIагъэрэ зэгъэгъуэтыным, егъэджэныгъэ-гъэсэныгъэ Iуэхум зи гъащIэр епха дэтхэнэми. Нобэ школхэм, гъэсапIэхэм екIуэлIэжа ныбжьыщIэхэм, абыхэм я гъэсакIуэхэм, егъэджакIуэхэм папщIэ щыIуну къэрал гимныр, абыхэм къахуеуэну япэ уэзджынэр, а IуэхущIапIэхэм щаIэтыну къэрал, республикэ ныпхэр угъурлы яхуэхъуну, я мурадхэр къехъулIэу, лъагапIэщIэхэм нэсу гъэ еджэгъуэщIэр узыншэу, лъэпощхьэпоуншэу кърахьэлIэну ди гуапэщ!