Дзэ къалэныр зыбгъэдэхуэхэр

«Урысей Федерацэм и цIыхуу дзэ къалэныр зыбгъэдэхуэхэм ящыщ Iыхьэ пыухыкIар мобилизацэм ипкъ иткIэ дзэм зэрыраджэм теухуауэ» Указым къэралым лэжьэн щыщIидзащ. Мобилизацэм хиубыдахэм медицинэ комиссэ зэрыдрагъэкIуэкIым зэпкърыхауэ къытхутепсэлъыхьащ Къэбэрдей-Балъкъэрым и Дзэ-дохутыр экспертизэ центрым и унафэщI ШонтIыкъу Аслъэн.

- Мобилизацэм ипкъ иткIэ Урысей Федерацэм IэщэкIэ ЗэщIэузэда и Къарухэм къулыкъу щащIэну ираджахэр, абы щыхьэт техъуэ тхылъымпIэхэр зыIэрыхьахэр щыпсэу щIыпIэм и дзэ военкомантхэм екIуэлIэну къатохуэ. Дзэ комиссариатым щылажьэ комиссэм къыщипщытэнущ къулыкъу езыхьэкIыну къекIуэлIам и узыншагъэр. Дзэм къулыкъу зэрыщищIэн узыншагъэ бгъэдэмылъмэ, апхуэдэр ираджэнукъым. ПIалъэкIэ и узыншагъэр зэтеувэжынумэ, зэман дэкIмэ иджыри комиссэм къипщытэжыну къыхуагъэувынущ. Пэжщ, зи узыншагъэм щыщIэныгъэ зиIэхэми, инвалидхэми мобилизацэм ипкъ иткIэ зэрыраджэ тхылъымпIэхэри яIэрыхьэнкIэ хъунущ. Абы и щхьэусыгъуэр нэхъыбэу зэхьэлIар езы цIыхухэрщ. Сыт щхьэкIэ жыпIэмэ, дзэ учётым щыт къулыкъу ирихьэкIыну къызытехуэ дэтнэхэм зыми и къалэнщ езыр-езыру и узыншагъэм зэхъуэкIыныгъэ игъуэтам щыпсэу щIыпIэм щыIэ дзэ комиссариатыр щыгъуазэ иIщыну, армыхъумэ, дэ, комиссариатым Iэмал диIэкъым абы и узыншагъэм и щытыкIэм езыр хэмыту зыщыдгъэгъуэзэну .- жиIащ ШонтIыкъу Аслъэн.- КъищынэмыщIауэ, цIыхубэм хъыбар хагъэIуащ зэхэгъэкI имыIэу зи узыншагъэр зэтетхэри, ныкъусаныкъэ зиIэхэри, сымаджэхэри мобилизацэм ипкъ иткIэ дзэм ираджэу. Апхуэдэ хъыбархэр лъабжьэншэщ. ЦIыхур сымаджэрэ, ар хъужыну Iэмал иIэмэ, зэрызигъэхъужыну пIалъэр ират, мыхъужынумэ, абы и тхылъу ди деж щыIэм хуэфэщэн тхыгъэ тратхэри лъэныкъуэкIэ хагъэтIылъыкI. ЩIыналъэхэм щыIэ дзэ комиссариатхэм щызэхуашэсауэ къулыкъу щащIэну щIыпIэм ирашажьэхэм здынэсу щIыпIэм нэсыху ди дохутырхэр ящIыгъуу макIуэ. 
УФ-м Президент Путин Владимир «Урысей Федерацэм и цIыхуу дзэ къалэныр зыбгъэдэхуэхэм ящыщ Iыхьэ пыухыкIар мобилизацэм ипкъ иткIэ дзэм зэрыраджэм теухуауэ» Iэ зытридза Указым ипкъ иткIэ япэщIыкIэ ираджэнухэм ящыщщ япэ категорие, япэ разряд зиIэ дзэм къулыкъу щезыхьэкIа е дзэм къыхэкIыжа цIыхухэу сэлэт-сержантхэу зи ныбжьыр илъэс 35-м щIимыгъуахэмрэ илъэс 40-м щIимыгъуа офицер нэхъыщIэхэмрэ. НэхъапэкIэ ираджэну гупым къызэщIиубыдэхэр зи узыншагъэм дагъуэ зимыIэ цIыхухэрщ. Иужьрей зэманым къекIуэкI зэтемыхуэныгъэхэр къэмыхъун папщIэ цIыхум унагъуэ иухуами, бын къыхуалъхуами е и гъащIэ щытыкIэм социальнэ зэхъуэкIыныгъэ гуэрхэр къыщекIуэкIамэ, абы езыр-езыру къекIуалIэу и Iуэхур зытетым щыгъуазэ дищIыпхъэщ. КъекIуалIэрэ и щытыкIэм щыгъуазэ дищIмэ, комиссэм абы теухуауэ унафэ щхьэхуэ ищIынущ. Дэ къэрал законым къигъэув мардэхэм тету ди унафэхэр къыдощтэ икIи дэтхэнэ зы цIыхуми и щытыкIэр зэхэдмыгъэкIауэ дзэм къулыкъу щIищIэну дгъакIуэкъым. Республикэм щыIэ дзэ комиссариатхэм щызэхуашэс цIыхухэр дзэ часть пыухыкIахэм траугуэшэнурэ абыхэм тхьэмахуитIкIэ щыхугъэхьэзырынущ къулыкъу зэрырахьэкIынум. Дзэ частым щыхагъэхьа махуэм къыщыщIэдзауэ, ираджахэм ягъуэт Урысей Федерацэм IэщэкIэ ЗэщIэузэда и Къарухэм контракткIэ дзэ къулыкъур щезыхьэкI дзэ къулыкъущIэхэм я статус. Ауэ дзэм ираджауэ абы щхьэусыгъуэншэу къемыкIуалIэхэм яхуэгъэзауэ угловнэ жэуаплыныгъэхэр щыIэщ. 
Мобилизацэм ипкъ иткIэ дзэм зэрыраджэм теухуауэ нэхъ зэпкърыхауэ зыщывгъэгъуазэ хъунущ КъБР-м и Дзэ комиссариатым сытым дежи щылажьэ телефонымкIэ: 8 928 724 34 98.