СурэтыщI Iэзэхэм я лэжьыгъэхэр

КъБР-м и Лъэпкъ музейм «ЦIыхур, щIыуэпсыр, хьэршыр» гъэлъэгъуэныгъэр щокIуэкI. Утыку кърахьащ Къэбэрдей-Балъкъэрым и художник нэхъыфIхэм я лэжьыгъэхэр - ХудожествэхэмкIэ Урысей Академиемрэ КъБР-м и СурэтыщIхэм я зэгухьэныгъэмрэ ирагъэкIуэкIа зэпеуэм пашэ щыхъуахэм я Iэдакъэ къыщIэкIахэр. Зэхьэзэхуэри гъэлъэгъуэныгъэри къызэрагъэпэщащ Къэбэрдей-Балъкъэрым и къэралыгъуэр илъэси 100 зэрырикъум и щIыхькIэ. Гъэлъэгъуэныгъэ нэужьым мы лэжьыгъэхэр Москва яшэнущ. 
 

Лъэпкъ музейм и унафэщI, тхыдэ щIэныгъэхэм я кандидат Накуэ Феликст гъэлъэгъуэныгъэр къызэIузыхари, ар сурэтыщIхэмрэ хьэщIэхэмрэ ехъуэхъури, КъБР-м щэнхабзэмкIэ и министрым и къуэдзэ Карчаевэ Iэминат псалъэ иритащ.
Карчаевэм къыхигъэщащ Къэбэрдей-Балъкъэрым и къэралыгъуэр илъэси 100 зэрырикъум къыдэкIуэу, ХудожествэхэмкIэ Урысей Академиер илъэс 265-рэ зэрырикъуми гъэлъэгъуэныгъэр зэрытраухуар икIи академикхэм фIыщIэ яхуищIащ щIыналъэхэм лэжьыгъэ щхьэпэхэр зэрыщрагъэкIуэкIымрэ республикэм дэIэпыкъуэгъу къызэрыхуэхъумрэ папщIэ. 
ХудожествэхэмкIэ Урысей академием и щIэныгъэ-къэхутакIуэ институтым и лэжьакIуэ пажэхэм ящыщ, искусствоведенэ щIэныгъэхэм я кандидат Ступин Сергей жиIащ зэпеуэм хагъэхьа лэжьыгъэ нэхъыфIхэр зэрагъэлъагъуэр, жэпуэгъуэм и II-м текIуахэр зэрагъэпэжэнур, республикэм и къэралыгъуэм и махуэр зэрагъэлъапIэм къыдэкIуэу, щIыналъэхэм яку дэлъ зэпыщIэныгъэр нэхъри зэрагъэбыдэнур. Абы фIыщIэ яхуищIащ мы Iуэхур зыкърезыгъэхьэлIа псоми. 
Гъэлъэгъуэныгъэм хыхьэу, ХудожествэхэмкIэ Урысей Академием и академик, КъБР-м и цIыхубэ сурэтыщI КIыщ Мухьэдин мастер-класс щхьэпэ итащ. Апхуэдэу КъБР-м и цIыхубэ сурэтыщI, ХудожествэхэмкIэ Урысей Академием и академик Црым Руслани зэIущIэ купщIафIэ сурэтыщIхэмрэ гъуазджэм и цIыхухэмрэ ядригъэкIуэкIащ. 
УФ-м и цIыхубэ сурэтыщI, ХудожествэхэмкIэ Урысей Академием и академик Пащты Герман и гуапэу къыхигъэщащ ди республикэм и сурэтыщI ныбжьыщIэхэм, гъуазджэр фIыуэ зылъагъухэм папщIэ гъэлъэгъуэныгъэ къызэрызэрагъэпэщар гуапэ зэрыщыхъуар, дяпэкIи абы пащэну зэрыщыгугъыр. Зэхыхьэм кърихьэлIахэм ар ехъуэхъуащ насып, узыншагъэ, ехъулIэныгъэ яIэну. 
КъБР-м и Парламентым и депутат Пащты Борис жиIащ щэнхабзэ, гъуазджэ зэхыхьэхэр ди гъащIэм щыщ Iыхьэ зэрыхъуар, зэфIэкI зиIэ сурэтыщIхэр, дызэрыгушхуэ артистхэр дызэриIэм и фIыгъэкIэ сурэтыщI гъуазджэм, щэнхабзэм нэхъри зэрызиужьынур. 
КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ Ступин Сергейрэ сурэтыщIхэмрэ фIыщIэ яхуищIащ.