«Дызэщхькъым, ауэ дызэхуэдэщ»«Ладья» шахмат-шашка клубым шахматымкIэ щекIуэкIащ Иуаз Астемыр и «Дызэщхькъым, ауэ дызэхуэдэщ» зыфIища и проектым и япэ Iуэхур. Мы гъэм Кавказ Ищхъэрэ федеральнэ щIыналъэм иригъэкIуэкIа зэпеуэм абы ЩIалэгъуалэ IуэхухэмкIэ федеральнэ агенствэм и грант къыщихьащ. Iуэхур хуэунэтIащ зи узыншагъэ хуримыкъу сабийхэмрэ ныбжьыщIэхэмрэ гулъытэ етыным, ахэр шахматым дегъэхьэхыным. Мастер-классым кърихьэлIащ Налшык къалэм и еджакIуэ цIыкIу куэд. Абыхэм яхэтт шахматым и хабзэхэм щыгъуазэхэри, абы дихьэхагъащIэхэри. Сабийхэмрэ ныбжьыщIэхэмрэ яхуэзащ, шахматымкIэ дерсхэр драгъэкIуэкIащ зи Iэ, зи лъакъуэ къыдэмыбзхэм я деж дунейпсо зэхьэзэхуэхэм щытекIуа Джэдгъэф Чэмал, шахматымкIэ сабий тренер-гъэсакIуэ, Европэм жэз медаль къыщызыхьа, Урысейм и гупым хэту Европэм пашэныгъэ къыщызыхьа Щыхьмырзэ ФатIимэ, ФИДЕ-м спортымкIэ и мастер, шахматымкIэ республикэм куэдрэ чемпион щыхъуа Темыркъан Давид сымэ. ЕджакIуэхэм яхутепсэлъыхьащ шахматым и тхыдэм, щагъэгъуэзащ а спорт лIэужьыгъуэм къыщагъэсэбэп Iэмалхэмрэ хабзэхэмрэ, фIыуэ джэгуу загъэсэн папщIэ зэджэн хуей тхылъхэм. Мастер-классым хэтахэм ящыщ куэдым шахматымкIэ гупжьейхэм зыхрагъэтхащ. ДяпэкIэ къэблэгъэну мазитIым къриубыдэу «Дызэщхькъым, ауэ дызэхуэдэщ» Iуэхум и къызэгъэпэщакIуэхэм интернат-школхэм щеджэхэу зи узыншагъэ хуримыкъухэм яIущIэнущ. Абыхэм ящыщу гукъыдэж зиIэхэр хагъэхьэнущ шахматымкIэ ирагъэкIуэкIыну зэпеуэхэм. Ар теухуауэ щытынущ зи узыншагъэ хуримыкъухэм я махуэм, илъэс къэс, дыгъэгъазэм и 3-м ягъэлъапIэм.
Поделиться:
Читать также:
25.04.2024 - 17:30 →
Олимп чемпионыр ящыгъупщэркъым
25.04.2024 - 17:00 →
Кубокыр къыздашэ
23.04.2024 - 17:06 →
Гуп зэпеуэм япэ щыхъуащ
23.04.2024 - 15:26 →
Урысейм щынэхъ лъэщхэр
17.04.2024 - 12:56 →
Къапэлъэщын къахэкIакъым
|