Разиуанрэ Маликрэ я текIуэныгъэ

Мы гъэм гъатхэпэм и 3 - 10-хэм Уфа къалэм щызэхэтащ Урысей МВД-м боксымкIэ и чемпионат. Башкортостаным и щыхьэрым щекIуэкIа зэхьэзэхуэм щызэрихьэлIащ къэралым и щIыналъэхэм я хабзэхъумэ органхэмрэ еджапIэ 15-м, апхуэдэуи Центральнэ, Приволжскэ федеральнэ щIыналъэхэм транспортымкIэ я управленэхэм я командэхэр. Абы хэтащ КъБР-м щыIэ ­МВД-м и гупыр икIи етIуанэ увыпIэр къихьащ.

Щхьэзакъуэ зэпеуэхэми ди лъахэгъухэм екIуу зыкъыщагъэ­лъэ­гъуащ. Зи хьэлъагъыр килограмм 86-м нэблагъэхэм я зэ­хьэзэхуэм бжьыпэр щиубыдащ Урысей МВД-м и «Бахъсэн» къудамэм и лэжьакIуэ, полицэм и лейтенант нэхъыжь Мэзыхьэ Разиуан. Урысей МВД-м и къудамэу Iуащхьэмахуэ районым щыIэм и  плъыр-пост IэнатIэм къулыкъур щызыщIэ, полицэм и сержант нэхъыжь Алиев Малик кг  67-м нэблагъэхэр зыхэта гупым жэз медалыр къыщихьащ.
Къэрал кIуэцI IуэхухэмкIэ министру КъБР-м щыIэ, полицэм и генерал-лейтенант Павлов Василий ехъулIэныгъэ зыIэрызыгъэхьа спортсменхэм ехъуэхъуащ.
- Боксыр спорт лIэужьыгъуэ къызэрымыкIуэщ, ауэ IуэхущIапIэ куэдым и лIыкIуэхэр зыхэта, пщIэ зиIэ зэпеуэм екIуу зыкъыщывгъэлъэгъуэфащ. Узыншагъэ фиIэну, адэкIи къулыкъум ехъулIэныгъэхэр щызыIэрывгъэхьэну, рингым узыIэпызышэ текIуэныгъэхэр къыщыфхьыну си гуапэщ, - къыхигъэщащ министрым.
БАХЪСЭН Азэмэт.