Мыгъэрей ещанэ шыгъэжэгъуэр нобэ, накъыгъэм и 27-м, йокIуэкI. Абы лIэужьыгъуийкIэ къыщагъэжэнущ хьэрып, адыгэ, инджылыз шы лъэпкъыгъуэхэр.
Хабзэ зэрыхъуам тету, ар зэрызэкIэлъыкIуэнум щыгъуазэ фыхуэтщIынщ. Метр 1400-рэ зи кIыхьагъым илъэсищ зи ныбжь шищ къыщызэдагъэжэнущ. Абы хэтщ ехъулIэныгъэ зэмылIэужьыгъуэхэр къэзыхьахэри, зэкIэ зи цIэ мыIуауэ. Хэт ищIэрэ, гъэщIэгъуэн къэхъунри хэлъщ, ауэ и нэхъыбэм текIуэныгъэ къихьыну зыхуагъэфащэр Аксесс пцIэгъуэплъырщ.
Метр 1600 гъуэгуанэр нэхъ псынщIэу зэпычынымкIэ зэпеуэнущ илъэсищ зи ныбжь хьэрыпышу тху. Абы щытекIуэну зыхуагъэфащэр, уеблэмэ, адрейхэр къыдэзымыгъэплъыну къалъытэр Сальмэ пцIэгъуэплъырщ. Ар Талащенкэ Юрий ейщ. А шыр куэд щIакъым къызэрагъажэрэ - тхуэней къудейщ зэхьэзэхуэм зэрыхэтари, тIэуней саугъэт къихьащ.
Метр 1200-м къыщызэдагъэжэнущ зи ныбжьыр илъэсищ икIи нэхъыжь инджылыз шипщI. Абы хэтынущ псом нэхърэ нэхъыжь, шыгъэжапIитхум зэхэту 23-рэ къыщыжа, текIуэныгъэ щэней къэзыхьа, 12-рэ саугъэт зрата, АкценткIэ зэджэ шыр, Цыцаев Сулимэ и ейр. Аращ нэгъабэ Налшык щекIуэкIа шыгъажэм «Iуащхьэмахуэ и Кубок»-мрэ абы щIыгъуа сом мелуан ахъшэ саугъэтымрэ къэзыхьар. КъищынэмыщIауэ, мы зэдэжэм хэтыну Ту ЭвересткIэ зэджэ шым (Каракотов Мурат ейм) Псыхуабэ текIуэныгъэ къыщихьащ. Хэт ищIэн, иджыри ехъулIэныгъэ Налшык щиIэнкIэ хъунщ. Ауэ мыбдеж, и нэхъыбэм къызэралъытэмкIэ, псом нэхъ лъэрызехьэр Чехием щыцIэрыIуэ, текIуэныгъэшхуэу щы къэзыхьа, Бухтияров Валентин и «Ирландец» шырщ.
Адрей зэдэжэнухэм къахэбгъэщ хъунущ адыгэшхэр. Иужь дыдэу мыхэр щызэпеуар илъэсищкIэ узэIэбэкIыжмэщ. Иджыпсту Налшык шыгъэжапIэм адыгэшу 52-рэ иIыгъщ. Мы зэпеуэм щхьэкIэ Сэкрэкым и шы заводым сом мини 100 игъэуващ. Шууейхэм адыгэ фащэ ящыгъынущ.
ИтIанэ илъэсищ зи ныбжь инджылызышу 11 къызэдагъэжэнущ. Мыбдеж Сэкрэк Заур и «Альфаиз»-р текIуэну хуагъэфащэ. Мыпхуэдэ зэпеуэм ар зэ щытекIуакIэщ. Абы къыпеуэнухэм ехъулIэныгъэр зищIысыр зэкIэ къащIакъым.
Адрей къызэдэжэнухэм я гугъу фхуэдмыщIми гурыIуэгъуэщ шыгъажэр зэшыгъуэ зэрымыхъунур. Сабийхэм папщIэ джэгупIэ зэмылIэужьыгъуэхэр лэжьэнущ.
Мы Iуэхур къызэзыгъэпэщхэм я гуапэу фрагъэблагъэ.