ГъэсакIуэ, актрисэ, уэрэджыIакIуэ

ПIаз (Къагъырмэс) ФатIимэ адыгэбзэм и щIэныгъэ лэжьакIуэщ, сабий гъэсакIуэщ, актрисэщ, усэ къеджэну, уэрэд жиIэну фIэфIщ, гуфIэгъуэ дауэдапщэхэр ирегъэкIуэкI. Сыт хуэдэ Iуэху пэрыувэми, анэдэлъхубзэр псом япэ ирегъэщ. Къыщыхъуари щыпсэури Налшыкщ. Бзылъхугъэр и щапхъэщ бзэр фIыуэ плъагъуныр къуажэм е къалэм зэремылъытам. Езым зэрыжиIэмкIэ, ар зэлъытар унагъуэрщ. 

ЩIэныгъэр

- Школым адыгэбзэмкIэ ди егъэджакIуэм щэнхабзэм, бзэм теухуауэ Iуэхугъуэ гуэрхэр, зэпеуэхэр екIуэкIмэ абыхэм дыхигъэтт, усэ дыкъригъаджэрт, тыгъэ гъэщIэгъуэнхэри къытхуащIырт. Апхуэдэурэ сэ анэдэлъхубзэм сыдихьэхащ. Ди бзэр нэхъыфIу сщIэну, тхыдэм зыщызгъэгъуэзэну, ди усакIуэхэмрэ тхакIуэхэмрэ я IэдакъэщIэкIхэр нэхъ куууэ зджыну сыхуейуэ япэщIыкIэ педагогикэмкIэ колледжым и адыгэбзэ къудамэм сыщIэтIысхьащ. Егъэлеяуэ сыдихьэхыу седжащ. Колледжым дыщыщIэса зэманыр сэ IэфIу си гум илъщ - моуэ унагъуэм хуэдэу гуапэу дыщызэхэтащ абы. ЕгъэджакIуэхэм гудзакъэ яIэт. Лэжьыгъэр къыдату щIэкIыжыртэкъым ахэр - дджыр нэхъ куууэ зыхыдагъэщIэну хуейхэти, дерсхэр щIэщыгъуэу ирагъэкIуэкIыным я гуащIэ псори халъхьэрт. Ди егъэджакIуэу щыта Пэщол Сакимэ Iуэхугъуэ гъэщIэгъуэнхэм сыхигъэхьэрт, сиунэтIырт. Ар сэ икъукIэ сэбэп къысхуэхъуащ си щIэныгъэми, зэхэщIыкIми хэзгъэхъуэнымкIэ. Къыхэзгъэщыну сыхуейщ гупым ди куратору щыта Лъостэн Марьянэ – и студентхэм къыттеубгъуат сыт щыгъуи. 
ПедагогикэмкIэ колледжыр къэзухри, Къэбэрдей-Балъкъэр къэрал университетым адыгэбзэмкIэ и къудамэм сыщIэтIысхьащ. Абыи IэщIагъэлI нэсхэм сыщрагъэджащ. Сигу ирихьырт ТIымыжь Хьэмыщэ егъэджэныгъэм къыщигъэсэбэп Iэмалхэр, и дерс бгъэдэлъхьэкIэр. И лэжьыгъэм игури и псэри хилъхьэу дригъэджащ Бакъ Зерэ. Ар къызэджа лекцэ зэи пщыгъупщэнукъым, уигъэцIыхуа тхакIуэр уигу ихунукъым, уигъэджа художественнэ тхыгъэр игъащIэкIэ къыбдэгъуэгурыкIуэнущ. Лэжьыгъэ гуэр къыдитарэ, абыкIэ жэуап щыттым дежи, ди гупсысэкIэр абы зыгуэркIэ нэхъыфI ищIами, зригъэхъуэжами кIэлъыплъыжырт, зыхэпщIэрт студентым и деж жэуаплыныгъэ ин зэрыщихьыр. ЩIэщыгъуэу дригъэджащ Хэжь Лени. Абы и егъэджэкIэ Iэмалми щапхъэу къыхэпхын куэд хэлът. 

«Король Лир» спектаклыр

- Налшык ГъуазджэмкIэ школ №1-м театрымкIэ и къудамэм сыщеджащ ЖьэкIэмыхъу КIунэ и чэнджэщкIэ. Актёр IэщIагъэм теухуауэ абы куэд къыщысщIащ. КIунэ театрхэм дишэрт, радиом, телевиденэм дыкъыщагъэпсэлъэнымкIэ, цIыхухэм дыкъащIэнымкIэ сэбэп къытхуэхъурт. ГъуазджэмкIэ школыр къэзуха нэужьи, абы и деж мастер-класс сыкIуащ, сригъэблагъэри. ЖьэкIэмыхъу КIунэ сызыхуигъэсамрэ къызигъэщIамрэщ сэ щэнхабзэмрэ гъуазджэмрэ теухуауэ лэжьыгъэ схуэхъур. 
- «Король Лир» спектаклыр щагъэувым Карделие и ролым ягъэджэгун къалъыхъуэрт. КIунэ сэ сыхуигъэлъэгъуащ Теувэж СультIан, «Мыр а ролым хуэкIуэнущ, бзэри Iурылъщ, зэрыджэгуфынуми шэч къытесхьэркъым» жиIэри. СыкIуэщ, къызэплъщ, къызэдаIуэри, ролыр къысхуагъэфэщащ. «Король Лир»-м щыджэгуахэр IэщIагъэм хуеджа, цIыхубэм фIыуэ ялъагъу актёр цIэрыIуэхэт. Сэрат нэхъ ямыцIыхуу яхэтри, зи гъусэу сыджэгуахэм куэдкIэ сытрагъэгушхуащ, къыздаIыгъащ. Театрым еплъахэм я щытхъу куэди зэхэсхащ. КъызэхъулIащ!

Уэрэди жызоIэ

- Иужьрей зэманым лъэтеувэ, гущэхэпхэ дауэдапщэхэр езгъэкIуэкIыну срагъэблагъэ. Мызэ-мытIэу къызжаIащ, «уэрэди дахэу пхужыIэнут, мыпхуэдэ Iуэхугъуэхэр ебгъэкIуэкIынымкIи сэбэп къыпхуэхъунут» жаIэу. «Уэрэд жыIэным сыхуемыджауэ дауэ зеспщытын» жысIэурэ сытегушхуэртэкъым. Дауэ хъуми, макъамэ студие сыкIуэри, си макъым езгъэдэIуащ, абыхэми сыщытрагъэгушхуэм зы уэрэд езгъэтхыну мурад сщIащ. Апхуэдэу къыдэкIащ си япэ уэрэдыр. «ФIылъагъуныгъэ» уэрэдым псалъэхэри макъамэри Жэбо Замирэ итхащ. Ар куэдым къацIыхуащ, ягу ирихьу, къытрагъэзэжурэ йодаIуэри, ар егъэлеяуэ си гуапэщ. Уэрэд жыIэным теухуауэ ар си япэ лъэбакъуэщ. ЕтIуанэуи зы сабий уэрэд езгъэтхащ. Ар лъэтеувэхэм срагъэблагъэмэ жызагъэIэ яфIэфIу. 

Анэдэлъхубзэр япэ изогъэщ

- Унагъуэм адыгэбзэкIэ дыщопсалъэ, хабзэмрэ нэмысымрэ я мыхьэнэр щапхъэкIэ къагурыдогъаIуэ цIыкIухэм. Нэхъыжьыр школым щIэтIысхьа нэужь, «Сэ сыадыгэщ, щхьэ урысыбзэкIэ сыпсэлъэн хуей?» къыджиIат, уеблэмэ. Абдежым сегупсысащ, зыгуэрым тIэкIу сытеплъэкъукIауэ пIэрэ жысIэу. Анэдэлъхубзэр псом япэ игъэщыпхъэщ, дауи, ауэ урысыбзэми гулъытэ лъыгъэсын хуейщ, сабийм школыр къытемыхьэлъэн папщIэ. Къапщтэмэ, бзэ нэхъыбэ ящIэхукIэ нэхъыфIщ, зыр адрейм зэран щыхуэмыхъукIэ. 

Сызыпэрыта лэжьыгъэхэр

- Иджыпсту сылажьэркъым, си унагъуэ Iуэхум, сабийхэм сазэрыхэсым теухуауэ. Ауэ IэнатIэу сызыпэрытахэр сэбэп къысхуэхъуащ, зызагъэужьащ. 
2014 гъэм адыгэ пщащэхэм я зэпеуэм етIуанэ увыпIэ къыщысхьат, «Пщащэ зэчиифIэ» цIэри къысфIащат. Абы иужькIэ, зэпеуэр щекIуэкIа Кэнжэ къуажэм ЩэнхабзэмкIэ и унэм срагъэблагъэри сыщылэжьащ. Абы хабзэр зэрыщызэрахьэм, щылажьэхэм я зэхуаку дэлъ зэхущытыкIэ дахэм ситхьэкъурт сыт щыгъуи. 
«Орешка» сабий зегъэужьыпIэм хэт театр студиеми илъэс зыбжанэкIэ сыщылэжьащ, цIыкIухэр утыкум къызэрихьэнум, дахэу зэрыпсэлъэнум, я Iэпкълъэпкъ цIыкIухэр къапсэлъхэм зэрытрагъэхуэнум хуэзгъасэу. КIэщIу жыпIэмэ, ЖьэкIэмыхъу КIунэ къызигъэщIауэ щытахэр сабийхэр сэ згъэсэнымкIэ куэду къысхуэсэбэпащ. Иджы мураду сиIэщ езым си театр студие къызэзгъэпэщыжу а IэщIагъэм пысщэну, сэри зызужьыну, сэбэпи сыхъуну. 

Адыгэу ущытыныр

- «Адыгэу ущытыным къикIыр зыщ,
Уадыгэну къыпкъуэкIынырщ лIыгъэ», - Бемырзэ Мухьэдин и псалъэхэм арэзы сытохъуэ!