Псы къабзэ яIэрохьэ

Шэджэм Ищхъэрэ къуажэм щыпсэухэм я унэхэм псы къабзэ зэрекIуалIэ, километри 3,2-рэ зи кIыхьагъ бжьамийхэр мы махуэхэм зэрахъуэкI, иджырей мардэм кърагъэтIасэ.

Илъэс куэд хъуауэ щIым щIэлъа бжьамийхэр жьы хъуащ, абыхэм щIыпIэ-щIыпIэкIэрэ сэкъат яIэ хъуащ – зэгуэтхъмэ, ягъэвэжурэ къекIуэкIащ. Бжьамийхэр зэрыулъиям, абыхэм ятIэпс кIуэ зэрыхъуам къыхэкIыу цIыхухэм хуаутIыпщ псым и фIагъыр екIэкIуащ. Абыи и закъуэкъым - языныкъуэ хьэблэхэми ар ирикъуу яIэрыхьэртэкъым, уэру зэрыхуамыутIыпщыфым къыхэкIыу. Иджы а ныкъусаныгъэхэр ягъэзэкIуэж.

Апхуэдэу бжьамийхэр зэхъуэкIыным яужь щитщ Каменкэ жылэм и Революционнэ уэрамымрэ Щхьэлыкъуэ къуажэм КIэрэфым и цIэр зезыхьэ и уэрамымрэ, Мир хьэблэм. Псори зэхэту мыбыхэм щахъуэжыну я мурадщ бжьамий километри 4-м щIигъу.

Шэджэм къалэм Пщынокъуэмрэ Къардэнхэрэ я цIэхэр зезыхьэ уэрамхэми километри 2-м щIигъум щIэлъ бжьамийхэр щызэрахъуэкIынущ.

2020 гъэм щегъэжьауэ «Псы къабзэ» лъэпкъ пэхуэщIэм ипкъ иткIэ республикэм псы къабзэ зэрыкIуэ бжьамийуэ километр 90-м нэблагъэ щызэрахъуэкIащ, псы къызэрыщIаш ухуэныгъэу 10 ягъэуващ. А лэжьыгъэхэр зэфIагъэкIащ щIыналъэхэм я бюджетым щыщ мылъкукIэ.