ГъуэгупщIэхэр хуат

13 марта, 2024 - 10:00
Урысейм и Социальнэ фондым и къудамэу Къэбэрдей-Балъкъэрым щыIэм иджыблагъэ къызэритамкIэ, льготэ зэхуэмыдэхэхэр зиIэ цIыху 550-м загъэхъужыну здэщыIа щIыпIэхэм зэрыкIуам-къызэрыкIуэжам текIуэда гъуэгупщIэхэр хуапшыныжащ. 
2023 гъэм къэралыр щхьэхуэу зыдэIэпыкъу цIыхухэм зыщагъэхъуж курортхэм, санаторэхэм зэрыкIуэну, къызэрыкIуэжыну билету 1834-рэ къащэхуащ, интернетыр къагъэсэбэпу. УФ-м и Социальнэ фондым и щIыпIэ къудамэм цIыхухэм гъуэгупщIэм трагъэкIуэдахэм щыщ яхуэпшыныжыным сом мелуани 10 хухихащ.
  ГъуэгупщIэхэр апхуэдэ щIыкIэкIэ ядэгъэпсынщIэныр хохьэ социальнэ Iуэхутхьэбзэхэм. Ар ират ныкъуэдыкъуэхэм, ветеранхэм, къэхъукъащIэ къызэрымыкIуэхэм я зэран зэкIахэм. Зыщагъэхъужыну щIыпIэм ахэр зэрыкIуэну щIыкIэр – хьэуакIэ, гъущI гъуэгукIэ е автомашинэкIэ, - щыIэ хабзэм къыщыгъэлъэгъуащ, щыжаIащ щIыпIэ фондым и пресс-IуэхущIапIэм. 
Санаторэхэм, курортхэм зыщызыгъэпсэхуну ежьэхэм путевкэхэм я гъусэу Социальнэ фондым талонхэр ярет, пщIэншэу зекIуэну е нэхъ пуду билетхэр къащэхуну хуит ищIу. Абы щхьэкIэ, билетхэр щащэ кассэхэм бгъэдыхьэу ар ирагъэлъагъун хуейуэ аращ. 
«Апхуэдэуи билетхэр интернеткIэ къэпщэху хъунущ. Уеблэмэ абы Iуэхур нэхъ егъэпсынщIэ. Абы щхьэкIэ транспорт компанием и сайтым уохьэри, абы и напэкIуэцIым щыботх уздэкIуэну щIыпIэр, ущежьэну махуэмрэ тIысыпIэмрэ. ИужькIэ, Социальнэ фондым и талоным и номерыр, паспортымрэ СНИЛС-мрэ ятеухуауэ зыщIэупщIэхэр къыщыбогъэлъагъуэ. 
Транспорт компанием адэкIэ ахэр Соцфондым ирегъэхьыжри, льготэ зиIэ цIыхум и хъыбар псори къыIэрохьэж. ИтIанэ, интернеткIэ билет къэпщэху хъунущ, уи унэ ущIэмыкIыу», - жиIащ УФ-м и Социальнэ фондым и Къэбэрдей-Балъкъэр къудамэм и унафэщI Бакъ Николай. 
САНЭКЪУЭ Руслан.
  • 182 просмотра
Поделиться: