Къэралым и щIыпIэ псоми хуэдэу, Налшык къалэм и хэхыпIэ №105-м (сабий гъэсапIэ №8-м къыщызэрагъэпэщам) и бжэхэр дыгъуасэ сыхьэти 8-м къызэIуихащ. Урысей Федерацэм и президент хэхыныгъэхэм папщIэ Iэ яIэтыныр я гупыжу, цIыхухэр пщэдджыжьым щегъэжьауэ жыджэру абы екIуэлIэн щIадзащ.
Iэ щаIэт щIыпIэм и хэхакIуэ комиссэм и унафэщI АфIэунэ Дадий къызэрыджиIамкIэ, хьэблэм дэс хэхакIуэхэр псори зэхэту цIыху 2716-рэ мэхъу икIи сыхьэт 11-м ирихьэлIэу, абыхэм я процент 20-м Iэ яIэтыну хунэсат. «Нобэ УФ-м и президент хэхыныгъэхэм и япэ махуэщ, нэхъыжьхэри, нэхъ щIалэхэри, уеблэмэ унагъуэхэр зэрыIыгъыуи жыджэру къокIуэ. Ди хэхыпIэр зыхуэзэ хьэблэм хабзэхъумэ IэнатIэхэм я лэжьакIуэхэр, дзэм къулыкъу щызыщIэхэр куэду дэсщи, ди гуапэ зэрыхъунщ, ахэр Iэ яIэтыну япэ иту къакIуэхэм ящыщщ», - къыджиIащ АфIэунэм.
УФ-м и президент хэхыныгъэхэм Iэ иIэтыну хэхыпIэм къекIуэлIат РАН-м и КъБНЦ-м и щIэныгъэ-егъэджэныгъэ центрым и кафедрэм и профессор, тхыдэ щIэныгъэхэмкIэ доктор Къущхьэбий Анзор. Абы къыджиIащ: «Хэхыныгъэхэм Iэмал имыIэу цIыхум и Iуэху еплъыкIэр къыщигъэлъэгъуэн хуейуэ къызолъытэ. Тхыдэм уриплъэжмэ, къэрал куэдым апхуэдэ хуитыныгъэ яIэным цIыхухэр щыщIэбэну щытащ. Абы къыхэкIыу, нобэ диIэ Iэмалхэм дригушхуэу къэдгъэсэбэпын хуейуэ аращ. Мы Iуэхум фIым дыщегъэгугъ, ди къэралыр зыужьыныгъэм и гъуэгум тетщи, ди гугъэщ адэкIи ар ефIэкIуэну».
Пенсэм щыс ГъукIэ Фенэ и пхъурылъху цIыкIуитI къыздишат хэхыныгъэхэм Iэ щиIэтынум. «Нобэрей махуэр ди къэралым дежкIэ мыхьэнэ зиIэщ, зэхъуэкIыныгъэшхуэхэм я щIэдзапIэу къэплъытэ хъунущ, - жеIэ цIыхубзым. - Урысейр къэрал нэхъ лъэрызехьэхэм ящыщщи, дыхуейт дефIакIуэу, адрейхэр къыддэплъейуэ къэкIуэну зэманми щытыну. Си пхъурылъху цIыкIуитIыр IэIэтым къыздэсшащ, мыпхуэдэ хэхыныгъэхэм я мыхьэнэр щысабийм щегъэжьауэ зыхащIэн, щапхъэ яхуэхъун папщIэ. Урысейм и цIыхухэр къэралым сыт щыгъуи дыкъуэтынущ, зи щIыб къытхуэзыгъэзахэм я Iуэху еплъыкIэхэми икIэщIыпIэкIэ зрагъэхъуэжу, нэхъ лъэщыж дыхъуну дыщогугъ. ЗэрыжысIауэ, нобэрей махуэр си дежкIи, си щIэблэмкIи мыхьэнэшхуэ зиIэщ. Сыхуейщ дэтхэнэ зыми сехъуэхъуну узыншагъэ иIэну, мамыру, бэIутIэIуншэу псэуну. Тхьэм иригъэфIакIуэ Урысейр».
Шевелёвэ Анни IэIэтым къэкIуат и пхъур къыздишэри. «Нобэ дызэрыгушхуэ махуэщ. ФIыкIэ дызыщыгугъ пIалъэщIэм дытохьэри, дыхуейщ ди къэралым адэкIи зиужьу, ефIакIуэу, и мурадхэр зригъэхъулIэу тлъагъуну», - къыддэгуэшащ и Iуэху еплъыкIэмкIэ бзылъхугъэр.
IэIэтым къекIуалIэхэм я гукъыдэжыр къаIэтын папщIэ, сабий гъэсапIэм и пщIантIэм макъамэхэр къыдэIукIырт. IуэхущIапIэм и музыкэ лэжьакIуэ Теммоевэ Залинэ сабийхэр махуэшхуэм хуигъэхьэзырати, цIыкIухэм я къафэхэмрэ уэрэдхэмкIэ цIыхухэр ягъэгушхуэрт. «Ди гъэсэнхэр псом нэхъыщхьэу хэкупсэу къызэрыдгъэхъуным иужь дитщ. Хэкур фIыуэ лъагъуным и лъабжьэр сабийр цIыкIуху бгъэтIылъын хуейщ. Нэхъ мащIэмкIэ къыщIэбдзэу, уи анэдэлъхубзэм, щэнхабзэм, щIыналъэ цIыкIум щIэблэр дебгъэхьэхыфмэ, лъэпкъ зэмылIэужьыгъуэу зэхэт Хэкушхуэри итIанэ гурэ псэкIэ къищтэнущ, абы щыгъуэм цIыхубэр зэкъуэту къэтэджынущ», - жеIэ хэхыпIэр здэщыIэ сабий гъэсапIэм и унафэщI АфIэунэ Дадий.
Мы хэхыпIэр хабзэм къызэрыщыгъэлъэгъуам тету зыхуей псомкIи къызэрагъэпэщащ: хэхыныгъэхэм зэрыхагъэгъуазэ тхылъымпIэхэр, упщIэ уиIэмэ, уздэпсалъэ хъуну телефон номерхэр зытетхэр блыным щыфIэдзащ. Iэ зэраIэта тхылъымпIэхэр зрадзэ ашыкхэм из хъухукIэ, гъущI сейфым къыдах пакет щхьэхуэхэм ахэр иралъхьэри, мыхъуркIэ зэтрагъэпщIэж.
Гу зылъытапхъэ: КъБР-м и ХэхакIуэ комиссэм къызэригъэлъагъуэмкIэ, УФ-м и президент хэхыныгъэхэм Къэбэрдей-Балъкъэрым и цIыху мин 543-м щIигъум Iэ щаIэтыфынущ. IэIэтыр хабзэм тету икIи наIуэу зэрекIуэкIым жылагъуэ лэжьакIуэ 900-м нэблагъэ кIэлъыплъынущ.
