Дэтхэнэми тхьы жэуаплыныгъэм елъытащ

Мы махуэхэм къэралым щекIуэкI Iуэху нэхъыщхьэм нэхъ жыджэру хэтхэм ящыщщ Аруан щIыналъэр. Урысей Федерацэм и ЦИК-м къызэригъэувам тету, Iэ щаIэтыну хэхыпIэхэр нэхъ пасэу зыхуей хуагъэзащ икIи зэпэщрэ Iэхуитлъэхуиту дыгъуасэ сыхьэтыр 8-м къызэIуахащ.

Аруан районым мы махуищым щолажьэ Урысейм и Президентыр щыхахыну щIыпIэу 23-рэ. Зи ныбжь нэса дэтхэнэ зыми и паспортыр иIыгъыу нэхъ пэгъунэгъу хэхыпIэм екIуэлIэну, и еплъыкIэр къигъэлъэгъуэну хуитщ.

Япэ махуэм щегъэжьауэ цIыхухэм я хэкупсагъымрэ жанагъымрэ къагъэлъагъуэу щызэхуэсащ щIыпIэ хэхахэм. ЖыпIэнуракъэ, хэхакIуэхэм я гукъыдэжыр къызэраIэтын Iэмал гъэщIэгъуэн куэд къагупсысат аруандэсхэм. Нэхъыбэм Iуэхур ягъэдахэ бэрэбэнауэхэмрэ пшынауэхэмрэ, уэрэджыIакIуэхэмрэ къэфакIуэхэмрэ кърагъэблагъэурэ.

Апхуэдэу пщэдджыжь дыгъэпскIэ президент хэхыныгъэхэм пежьащ Псынабэ къуажэр. Псом япэу гуп зэрыIыгъ дахэу ЩэнхабзэмкIэ унэм Iэ щаIэтыну къэкIуащ ХьэбытIэжьхэ, Мэремыкъуэхэ, Шырыкъухэ я лъэпкъхэр. Гукъыдэжымрэ дэрэжэгъуэмрэ, адыгэ къафэмрэ макъамэмрэ щыкуэд щIыпIэм лъэпкъ шхыныгъуэхэри щагъэхьэзырырт, берычэту я Iэнэр зэтетт. Лъэпкъ гупышхуэу къэкIуахэм я щIалэгъуалэр дахэт, я нэхъыжьхэр Iущт, къэралыр зезыхьэфыну къалъытэр убзыхуати, еужьэрэкIыу я къалэн нэхъыщхьэр зэфIагъэкIащ.

Аруан куейм и къалащхьэ Нарткъалэ щекIуэкI Iуэхум къыхэлыдык1ырт хэкупсэ нэсу районым исхэм ящыщ, Хэку зауэшхуэм и ветеран, зи лIыгъэкIэ, хахуагъэкIэ, IущагъкIэ пщIэшхуэ къэзылэжьа Руднев Иван. Аращ Аруан районым Iэ щызыIэтахэм я нэхъыжь дыдэр, дадэр илъэси 105-рэ мэхъу.

Нэхъыжь лъапIэм и узыншагъэм и зэранкIэ щатха хэхыпIэм зэрымыкIуэфынум къыхэкIкIэ, абы деж хэхакIуэ комиссэм хэтхэр еблэгъащ. ЩIалэгъуалэм я ущиякIуэу щIыналъэм ис дадэ Iумахуэм жиIащ къэралым и къэкIуэнур дэтхэнэми тхьы жэуаплыныгъэм зэрелъытар.