Тэн Iус Ростов къалэм Лышх узыфэхэмкIэ и щIэныгъэ-медицинэ IуэхущIапIэм къраIуэ жьэжьей лышхыр къызэрыпцIыхуну щытыкIэхэр.
Гъатхэпэм и 15-р жьэжьейхэм я дунейпсо махуэщ. Iэпкълъэпкъым пкъырылъкъым зыгуэрым хуэмылажьэ, мыхьэнэшхуэ зимыIэ пкъыгъуэ, ауэ жьэжьейхэм я къалэнхэр ямыгъэзащIэу щытатэмэ, цIыхум и лъыр фIей хъунурэ, абы илIыкIынут. Жьэжьейхэм ягъэкъабзэ Iэпкълъэпкъым мыхъумыщIагъэу, лейуэ нэсыр, цIыхум зэран хуэхъуну къалъытэр.
А махуэм ирихьэлIэу дунейм дохутыру тетыр жылагъуэм зыхуагъазэ жьэжьейхэр зэрахъумэ IэмалхэмкIэ, зэIущIэхэр зэхаублэ, щIэныгъэ къэхутэныгъэщIэхэмкIэ зэдогуашэ. Абы и фIыгъэкIэ цIыхум и узыншагъэр быдэу къызэтенэфынущ, гуныкъуэгъуэ гуэрхэр иIэми, уз пкъырытми, и чэзум къихутэфынущ.
Лышх узыфэхэмкIэ лъэпкъ щIэныгъэхутэ IуэхущIапIэм и лэжьакIуэхэм зэрыжаIэмкIэ, жьэжьей лышхыр хохьэ, цIыхум нэхъыбэрэ къефыкI лышх лIэужьыгъуи 10-м. Къыхэгъэщыпхъэщ, ар нэхъыбэу цIыхухъухэм къазэрефыкIыр.
Жьэжьей лышхыр къызэрацIыху щытыкIэхэр: цIыхур псынщIэу йош, къызэрымыкIуэу щIэхыу и хьэлъагъым кIэроху, плъыржьэрым хэкIыркъым, и гъутхьэпсым лъы хэту къокIуэ, и кIэнтIыIур е джабэхэр мэуз, и ныбэр хохъуэ. Мыпхуэдэ щытыкIэ зыдэзылъагъужахэр икIэщIыпIэкIэ терапевт, нефролог, онколог зыкIэлъагъэплъын хуейщ. Псом хуэмыдэу, жьэжьей уз зиIэхэр, кIэщI-кIэщIыурэ абы игъэгуауэщхьэуэхэр.
- Жьэжьей лышхыр зи ныбжьыр илъэс 60-м ит цIыхухэращ нэхъыбэу зыхуэлъэр. КъищынэмыщIауэ, зыхуэсакъын хуейщ цIыху пшэрхэр, зи лъыр дэуейхэр, тутынафэхэр, зэпымычу хущхъуэ зэхуэмыдэхэм ефэхэр, Гиппель-Линдау, Бёрт-Хог-Дьюб я узыфэхэр зэфыкIхэр, жьэн склероз зиIэхэр, - жеIэ Лышх узыфэхэмкIэ щIэныгъэ-медицинэ IуэхущIапIэм и унафэщI, профессор Кит Олег.
Онкологхэм зэрыжаIэмкIэ, жьэжьей лышхыр зэрыхъун хъуху зыкъыуигъащIэркъым, абы къыхэкIыу илъэсым зэ-тIэу дохутыр зэбгъэлъмэ нэхъыфIщ.
- Лъы, гъутхьэпс (Iэмал имыIэу) птымэ, УЗИ, къинэмыщI къызэрыгуэкI къэхутэныгъэхэм жьэжьей лышхыр къагъэлъагъуэ. КъэпцIыхуну гугъукъым, гугъур и чэзум къэпхутэнырщ. Лышхыр здынэсар, абы и лIэужьыгъуэр къащIэн щхьэкIэ, дохутырым уигъэкIуэнкIэ хъунущ КТ-м, МРТ-м, сцинтиграфием, морфологие анализым, - къыхегъэщ Лышх узыфэхэмкIэ щIэныгъэ-медицинэ IуэхущIапIэм и онкоуролог, профессор Шевченкэ Алексей.
Дауэ мыхъуами, жьэжьей лышхым и хущхъуэгъуэр зыщ – хирург хэмыIэбэу хъунукъым. Лышх узыфэхэмкIэ щIэныгъэ-медицинэ IуэхущIапIэм иIэщ лапароскопие, абы щрагъэкIуэт робот-операцэхэр, цIыхум и ныбэр зэгуамыгъэжыу ирагъэкIуэкI операцэхэр. Абы и фIыгъэкIэ, сымаджэр псынщIэу икIи бэIутIэIуншэу зэтоувэж. Онкологхэм зэрыжаIэмкIэ, и чэзум къыпхуэхутэрэ операцэ ебгъэщIмэ, жьэжьей лышхыр процент 90-кIэ пхуэгъэхъужынущ. ФызыкIэлъыплъыж!
