ДэIэпыкъуэгъухэр сытым дежи хьэзырщ

КъБР-м и Iэтащхьэ КIуэкIуэ Казбек видео-конференц IэмалкIэ хэтащ УФ-м и Правительствэм ЩIыналъэхэм зегъэужьынымкIэ и комиссэм и штабым и зэIущIэм. Ар иригъэкIуэкIащ вице-премьер Хуснуллин Марат. Зэхуэсыр ­теухуат 2024 - 2025 гъэхэм Луганск, Донецк республикэхэм, Херсон, Запорожскэ областхэм я инфраструктурэр зэгъэпэщыжын зэрыхуейм. Къызэхуэсахэм зи гугъу ящIар лей къызытехьа щIыналъэхэм зэрадэIэпыкъу щIыкIэрщ. 

УФ-м и Президент Путин Владимир и унафэкIэ Къэбэрдей-Балъкъэрым, Урысейм щыщ адрей щIыналъэхэм ещхьу, а лэжьыгъэ щхьэпэм хузэфIэкI хелъхьэ. Республикэм защIе­гъакъуэ Херсон областым хыхьэ Скадовскэ, Голопристанскэ муниципальнэ щIыналъэхэм. Дызэрыт илъэсым зэрагъэпэщыжынущ цIыхубэм я Iуэху зэфIэзыгъэкI IуэхущIапIих - сабий садхэр, фэтэр куэду зэхэт унэхэр, сабий джэгупIэхэр. КъинэмыщIауэ, инженер лэжьыгъэ хуэныкъуэ ныкъусаныгъэхэм елэжьынущ. Зи гугъу тщIа щIыналъэхэм зэпыу имыIэу щыIэщ КъБР-м щыщ, авариехэм хузэпэщ бригадэ, зыхуэныкъуэнкIи хъуну Iэмэпсымэхэр яIыгъыу, ар уэздыгъэ щIэшэн, унэхэр гъэхуэбэн е псы щIашэн хъуми. 
Илъэс блэкIам цIыхубэр зыхуэныкъуэ ухуэныгъитхум я инфраструктурэр зэрагъэпэщыжащ, МФЦ-м хухэха ухуэныгъэхэр яхэту. 2028 гъэ пщIондэ, областым и унафэщIхэм зэрагурыIуам тету, иджыри ухуэныгъэ 20-м нэс зэIузэпэщ ящIынущ.