УнафэщIхэмрэ IэнатIэ лъыхъуэхэмрэ зэрощIэКъБР-м ЦIыхухэр IэнатIэкIэ къызэгъэпэщынымкIэ и центрыр мы махуэхэм жыджэру хэтащ Къэрал киноконцерт гъэлъэгъуапIэмрэ КъБКъУ-мрэ щекIуэкIа IэнатIэхэм я жармыкIэ «Работа России. Время возможностей» урысейпсо Iуэхум. Къэрал концерт гъэлъэгъуапIэм щекIуэкIа зэхыхьэ щхьэпэм хэтащ республикэм и IуэхущIапIэхэм я унафэщIхэр, лэжьыгъэ къэзылъыхъуэхэр, зыпэрыт IэнатIэр зыхъуэжыну, хьэрычэт Iуэхухэм зезыпщытыну зи мурадхэр. КъБКъУ-м ирагъэблэгъащ республикэм и курыт еджапIэхэм я 9 - 11-нэ классхэр къэзыуххэр икIи ахэр зыхуеджэну, щIыналъэм щIэупщIэ нэхъ щызиIэ IэщIагъэхэм абдеж щыхагъэгъуэзащ. Абыхэм Iэмал яIэщ я щIэныгъэм КъБКъУ-м, КъБКъУ-м хъыбарегъащIэ технологиехэмрэ экономикэмкIэ и колледжым, КъБКъАУ-м, Педколледжым, Медколледжым, ДизайнымкIэ колледжым щыпащэну. КъызэщIэпкъуэжмэ, республикэм цIыхухэр IэнатIэкIэ къызэгъэпэщынымкIэ и центр, егъэджэныгъэ IуэхущIапIэхэр жыпIэми, а махуэм Iуэхум теухуа зэхыхьэ 20 Налшык къалэм щрагъэкIуэкIащ. КъБР-м ЦIыхухэр IэнатIэкIэ къызэгъэпэщынымкIэ и центрым и унафэщI Канунниковэ Татьянэ зэхыхьэм хэтхэм и гуапэу яжриIащ урысейпсо Iуэхум хэт псоми фIыщIэ зэрахуэфащэр, IэнатIэ зытхэмрэ лэжьыгъэ къэзылъыхъуэхэмрэ мы зэхыхьэм зэрызэкъуигъэувэр. ЖармыкIэр къапщтэмэ, республикэм и IуэхущIапIи 102-м я унафэщIхэм IэнатIэ 1810-рэ цIыхухэм хуагъэлъэгъуащ. А зэхыхьэм хэта IуэхущIапIэ 45-м я унафэщIхэм лэжьыгъэ лъыхъуэ цIыхухэр я IэнатIэ 1265-м ирагъэблэгъащ. УФ-м и Федеральнэ Зэхуэсым и Къэрал Думэм и депутат Родинэ Викторие жармыкIэм хэтхэм зэпэIэщIэу захуигъэзащ икIи жиIащ мыхьэнэшхуэ зиIэ зэхыхьэр промышленнэ, мэкъумэш IуэхущIапIэхэм, хьэрычэт Iуэхухэм я унафэщIхэмрэ IэнатIэ лъыхъуэхэмрэ, курыт еджапIэхэр къэзыуххэмрэ студентхэмрэ, зи IэщIагъэ зыхъуэжыну зи хъуэпсапIэхэм я дежкIэ зэрыщхьэпэр. ЦIыхухэр IэнатIэкIэ къызэгъэпэщынымкIэ центрхэм я Iуэхутхьэбзэхэм хагъэхъуэным и IуэхукIэ, Къэрал Думэм къэрал бюджетым сом мелуани 6-м щIигъу хухихащ. ЛэжьапIэншэхэм я бжыгъэр нэхъри гъэмэщIэным, IуэхущIапIэхэм я унафэщIхэр лэжьакIуэхэмкIэ къызэгъэпэщыным, зи IэнатIэ зыфIэкIуэдахэм, пенсэм щысхэм, дзэ Iуэху хэхам хэтахэр лэжьыгъэкIэ къызэгъэпэщыным Къэрал Думэм гулъытэ ин хуещI. Налшык къалэм и «Искож» хьэблэм щылажьэ «Дарий» дэрбзэр IуэхущIапIэм (я къудамэхэр Дзэлыкъуэкъуажэ, Малкэ, Каменномост, Новоивановкэ щаIэщ) и унафэщI БжьыхьэлI Iэдэм къызэрыджиIамкIэ, я деж цIыхушхуэ IэнатIэкIэ къыщызэрагъэпэщащ, улахуэфIи ират. Я IэнатIэм зэрызрагъэубгъуам къыхэкIыу, лэжьыгъэ иджыри цIыху куэдым иратыфынущ: дэрбзэрхэм, механикхэм, печатнэ цехым и лэжьакIуэхэм, экономист, бухгалтер, технолог нэхъыщхьэ, нэгъуэщI IэщIагъэлIхэми. Нэхъыщхьэращи, я лэжьыгъэр хабзэм тету икIи шынагъуэншэу къызэрагъэпэщ. IэнатIэхэм я жармыкIэм хэтахэм ар къазэрыщхьэпэнум шэч хэлъкъым.
Поделиться:
Читать также:
15.04.2024 - 14:52 →
Агуий и Iэхэлъахэм
15.04.2024 - 12:10 →
Гагарин и гуфIэкIэ
10.04.2024 - 11:00 →
Дисанэ и ехъулIэныгъэ
08.04.2024 - 12:46 →
Мазэм и хъыбар
04.03.2024 - 15:13 →
ЩIалэгъуалэм я зэхыхьэ ин
|