Къуныжь Алим, артист: КъыщIэдзапIэ

Макъ сызэриIэм гу къылъатэри сыхагъэхьауэ школым и хорым сыхэтащ, уеблэмэ солистуи сыщытащ. Районым щекIуэкI зэпеуэхэм дыкIуэрэ япэ увыпIэхэр къэтхьу уэрэд жытIэрт. ИужькIэ Музыкальнэ училищэм и дирижёр-хоровой къудамэм сыщеджащ. I97I гъэм сыхыхьащ Музыкэ театрым и хорым, илъэсиплI дэкIри абы и солист сащIащ. НэгъуэщI зыгуэрхэм зеспщытми, мыIейуэ къызэхъулIэми, си лэжьыгъэ нэхъыщхьэр зэпхар а театрырщ. Музыкэ театрым, Горький Максим и цIэр зезыхьэ Урыс къэрал драмэ театрым, Налшык къалэм ЭстрадэмкIэ и театрым роль зэмылIэужьыгъуэу щызгъэзэщIар I30-м щIегъу.

Псэм фIэфIыр
Иджыри къыщIэздзэжрэ си гъащIэр къэспсэуами, сызрикIуа гъуэгура къыщIэкIынт къыхэсхынур. Ауэ зыгуэркIэ нэгъуэщI гуэр си натIэ хъуами, ехъулIэныгъэ зыIэрызгъэхьэфыну къыщIэкIынт, лэжьыгъэм жэуаплыныгъэ пылъу сызэрыбгъэдыхьэм щхьэкIэ. Си ныбжьэгъухэм «дауэ мыхъуми, уцIыхубэ артистщ уэ» къыщызжаIэ къохъу, си щхьэр сагъэIэтыну. СыцIыхубэ артистщ цIыхубэм сырейщи, си Iуэхур я гум носри. Аращ си дежкIэ нэхъыщхьэр.
Сыхуейщ дэтхэнэ зыми и псэм фIэфIыр гъащIэ гъусэ хуэхъуну, сыт хуэдэ Iуэху пэрытми къызыфIэмыщIыжу ехъулIэныгъэшхуэ къыщихьыну.