Гъэ къэси хуэдэу, жэпуэгъуэм и I-I0-хэм Нартан къуажэм пэгъунэгъу «Гуэрэн» шыгъэжапIэм щокIуэкI адыгэшхэр щагъэунэху «Адыгэ дерби-2022» шыгъажэ кIыхь зэхьэзэхуэр. Iуэхур къызэригъэпэщащ Сибэч Артур и унафэм щIэт Адыгэшыр хъумэнымрэ зегъэужьынымкIэ фондым.
Тыгъэ хъарзыналъэр мелуани 3-м нос. Хэт ар зыIэрыхьэнкIи хъунур? А упщIэм мыхьэнэ гуэр иIэ пэтми, щIалэхэм я гулъытэр нэхъ зытеухуар адыгэшым имыIа къарууэ зэхьэзэхуэм къыщызыкъуихынкIи хъунурщ. «Адыгэ дерби»-р щаублам текIуэныгъэр къэзыхьауэ щыта шу лъэрызехьэхэу Зыхъуэ Замир, Джатэ Щамил, Дудэ Арсен сымэ хэтщ мыгъэрей шыгъажэ кIыхьым. Илъэс кIуам япэ увыпIэр къэзыхьауэ щыта ТIулащэ Мурати уанэгур егъэбжьыфIэ.
КъызэгъэпэщакIуэхэм ипэкIэ лъэбакъуэщIэ зэрачам и щыхьэтщ иджы зэпеуэ гъуэгуанэм тет шым и Iуэхур зыIутыр къэзыщIэну хуей дэтхэнэ зыми и жэуапыр махуэ къэс интернетым къызэрыщигъуэтыфынур. Ипэрей махуитIым Джатэ Щамилрэ Зыхъуэ Замиррэ пэрыту екIуэкIащ. Ауэрэ шыхэм къахэжаныкIащ Азар цIэр зезыхьэ шыбзыр. Шур Думэныщ Лъостэнщ, шыхъуэр – Шыд Залымщ. Уеблэмэ зэхьэзэхуэр иджыри зэримыухам хуэдэу, Азар дунейпсо рекордыщIэ игъэувауэ зэхыдох. Тхыгъэр щыдгъэхьэзыра жэпуэгъуэм и 7-м ирихьэлIэу, гъуэгу техьар шу II-щ. ЩIалэхэр пщэдджыжьым сыхьэти 6-м мэшэсри, щхьэж и зэфIэкIым елъытауэ къокIуэлIэж. ВеткIэлъыплъакIуэхэм я нэIэ трагъэкIыркъым дэтхэнэ зы псэущхьэми и узыншагъэм.
КъыкIэлъыкIуэ тхьэмахуэм, жэпуэгъум и I6-м, Дыгулыбгъуей къуажэм пэгъунэгъуу, Джэдыкъуэ деж щызэхэтынущ Кавказ Ищхъэрэм шыгъажэ кIыхьымкIэ и зэхьэзэхуэ, КъБР-м и япэ президент КIуэкIуэ Валерий и цIэкIэ. «Адыгэ дерби»-м къыдигъэцIыхуа Нечаевэ Надеждэщ мы зэхьэзэхуэми хеящIэ нэхъыщхьэу щытынур. Надеждэ зэрыжиIэмкIэ, Джэдыкъуэ шыгъэжапIэр а Iуэхум хухэхауэ къэралым нэхъыфI дыдэу итхэм язщ. Зыхуей хуагъэзапхъэ гуэрхэр я пIэ иувэжмэ, шу хьэщIэ бжыгъэкIэ Джэдыкъуэри Гуэрэным пеуэну хьэзырщ.
Шыгъажэ кIыхьым хэтыну хуейхэм я лъэIу тхылъхэр жэпуэгъуэм и I5 пщIондэ ирагъэхь хъунущ. Лэжьыгъэм и нэIэ тет зэпытщ Бахъсэн къалэ администрацэм и унафэщI Мамхэгъ Хьэчим. Шухэр щызэпеуэнущ километр 80, I00, I20-рэ зи кIыхьагъ гъуэгуанэм. «Шэч къытесхьэркъым чемпионатыр зыхуей хуэзэпауэ зэрекIуэкIынум. Абы хэтыну гукъыдэж зиIэ псори къыдогъэблагъэ», - щыжиIащ Мамхэгъым зэхьэзэхуэм зыщыхуагъэхьэзыр зэхуэсхэм я зым.
ЗэкIэ «Адыгэ дерби»-м дыкIэлъоплъ.
