Урысей Федерацэм футболымкIэ и етIуанэ дивизионым и Япэ гупым щекIуэкI зэхьэзэхуэм хиубыдэу «Спартак-Налшыкым» фокIадэ мазэм зэIущIиплI иригъэкIуэкIащ икIи абыхэм псори зэхэту очкоибл щызыIэригъэхьащ.
Ебланэ джэгугъуэм «Спартак-Налшыкыр» Мэхъэчкъалэ щыIущIащ зэхьэзэхуэм и турнир таблицэм и кIэух увыпIэхэм ящыщ зым къыщызэтеувыIа «Легион»-м. Абыхэм къапэщIэта «Спартак-Налшыкыр» зэпэщIэтыныгъэм щытыкIэфIым иту хуэзащ. ПэщIэдзэ джэгугъуихым очко пщыкIуз къыщахьауэ нэхъыфIхэм хэту къакIуэ налшыкдэсхэм я гукъыдэжыр къиIэтырт махуэ зыбжанэ ипэкIэ Урысейм и Кубокыр къэхьыным ехьэлIа зэIущIэм текIуэныгъэ къызэрыщахьыу зэхьэзэхуэм и I/64-нэ Iыхьэм зэрынэсам.
«Спартак-Налшыкым» и джэгукIэр щтэIэщтаблэу иригъэкIуэкIырт, хэгъэрейхэм и гъуэм мащIэ дыдэрэт зэрекIуалIэр. ЕбгъэрыкIуэныгъэр мащIэми абы и фIагъыр лъагэ дыдэу къыщIэкIащ. ЩэщIрэ еянэ дакъикъэр екIуэкIыу ди щIалэхэм контратакэ псынщIэ къызэрагъэпэщащ. Абы хэту топыр къызыIэрыхьа ХъутIэр штрафнойм щекIуалIэм Къумыкъум и дежкIэ къыхитащ. Джамболэт куэдрэ емыгупсысу лъакъуэ сэмэгумкIэ топым гъуэмкIэ иригъэунэтIащ икIи гъуащхьэтетым пэжьыжьэ плIанэпэм дыхьэ топым Казихановым зыри хуещIэжакъым – 0:1.
ЗэпэщIэтыныгъэм кIэух бжыгъэ хуэхъунур щызэхэкIар джэгум хухаха зэманыр иухыным дакъикъипщI иримыкъу къэнэжауэщ. Дакъикъэ пщыкIутху ипэкIэ губгъуэм къихьа Мэкъуауэм гупым къаруущIэ къыхилъхьэжащ. Штрафнойм нэс топыр къэзыхьэса Ашуевым ар хуигъэжащ гъуэм нэхъ пэгъунэгъуу щыт Мэкъуауэм и дежкIэ. Иужьрейр къэзыухъуреихьа хэгъэрейхэм я гъуащхьэхъумэхэм лъэщу къапхырыукIащ. Ар зэуа топыр гъуащхьэтетым и лъакъуэм техуэри гъуэм дыхьащ.
КъыкIэлъыкIуэу ди щIалэхэм кърагъэблэгъащ Новороссийск и «Черноморец»-р. Гупым и командэ нэхъыфIхэм яхэту къекIуэкI хьэщIэхэм я щытыкIэр яхъуэжыну хуейтэкъым икIи зэIущIэм зэрыщIидзэу гупышхуэу ипэкIэ кIуэтащ. ЗэпэщIэтыныгъэм и япэ сыхьэт ныкъуэм новороссийскдэсхэм къызэрагъэпэща ебгъэрыкIуэныгъэхэм кIэух хуэхъуащ бжыгъэр къызэIуахыныр. Антоновыр убыдыпIэншэт – ди гъуащхьэхъумэхэм яблихауэ штрафнойм щихьэм абы топыр Магомедовым и лъэныкъуэмкIэ къыхитащ. Иужьрейр Iэзэу щхьэкIэ кIэлъеуэжри гъуэм и пкъом бгъэдэту ар дигъэкIащ.
ЕтIуанэ Iыхьэм псынщIэу ди гъуэмкIэ къэзыунэтIа «Черноморец»-м и гъуащхьауэр ди щIалэхэм Iэзэу къапекIуэкIри, Мицаевым гъунэгъу щыхуэхъум, лъэщу топым еуащ икIи ди гъуащхьэтетым пэжыжьэ плIанэпэм дигъэкIащ.
Бжыгъэр абы щыхуэкIуэм «Спартак-Налшыкым» и джэгукIэм зэхъуэкIыныгъэ гуэрхэр щыхэплъагъуэ хъуащ – ебгъэрыкIуэныгъэ шынагъуэхэр къызэрагъэпэщурэ ипэкIэ кIуэтэн хуежьащ. ЗэIущIэм и етIуанэ Iыхьэм и ныкъуэр блэкIауэ «Черноморец»-м контратакэ лъэщ къызэригъэпэщащ. Абы хэту гупышхуэу хэгъэрейхэм я штрафнойм изэрыхьа ди хьэрхуэрэгъухэм къахэжаныкIащ дакъикъипщI ипэкIэ джэгум къыхыхьа Руденкэ.
ТекIуэныгъэр и Iэрылъхьэу къэзылъыта «Черноморец»-р и лъэныкъуэмкIэ къикIуэтыжащ. ЩытыкIэр псынщIэ дыдэу къагъэсэбэпащ налшыкдэсхэм. ДжэгупIэ губгъуэм и кум къыщрагъэжьэри «Спартак-Налшыкыр» ипэкIэ кIуэтащ. ХьэщIэхэм я штрафнойм щихьэм Жангуразовым топыр къыхитащ Топурие и лъэныкъуэмкIэ. Тамаз абы щхьэкIэ кIэлъеуэжри бжыгъэр I:3-м хуигъэкIуащ.
ЗэIущIэм хухаха зэман нэхъыщхьэм къыщIагъуа дакъикъэхэр екIуэкIыу «Спартак-Налшыкыр» иджыри зэ къыхэжаныкIащ. Ди щIалэхэм я зи чэзу ебгъэрыкIуэныгъэм хэту Жангураовым топыр хуигъэжащ штрафнойм илъадэ Хьэшырым и лъэныкъуэмкIэ. Алан абы лъэщу еуащ икIи гъуащхьэтетым пэжыжьэ пкъом техуэри, гъуэм дыхьащ.
Мыгъэрей зэхьэзэхуэм къриубыдэу «Спартак-Налшыкым» иригъэкIуэкIа зэIущIэ нэхъ гукъинэжхэм ящыщ хъуащ ебгъуанэ джэгугъуэм хыхьэу зэхэтар.
ЕпщыкIуханэ дакъикъэр екIуэкIыу «Спартак-Налшыкыр» и хьэрхуэрэгъухэм я гъуэм ебгъэрыкIуэныгъэ шынагъуэкIэ екIуэлIащ. Дэхъум угловойкIэ къыхита топыр Iэзэ дыдэу щхьэкIэ гъуэм дигъэкIащ Белоусовым икIи зэIущIэм и бжыгъэр къызэIуихащ - 0:I.
Гупышхуэ ипэкIэ кIуэта Ставрополь и командэм хэту штрафнойм имыхьэ щIыкIэ Суановым топыр къыIэрыхьащ. Ди гъуэм екIуэлIэну Iэмал зэримыIэр къызыгурыIуа «Динамо»-м и футболистым топым лъэщу еуащ икIи гъуэм къыдэкIауэ щыт Мицаевым и щIыбагъымкIэ къыщехуэхыжри гъуэм дыхьащ – I:I.
Топ дагъэкIам зи лъэр жан къищIа ставропольдэсхэм етIуанэ Iыхьэми ебгъэрыкIуэныгъэм пащащ. Дакъикъищ нэхъ дэмыкIыу бжыгъэри ягъэбэгъуащ. ДжэгупIэ губгъуэм къыщыщIадзэри контратакэ псынщIэкэ «Спартак-Налшыкым» и гъуэм къыбгъэдыхьащ. Абы хэту штрафноймкIэ къыхата топым щхьэкIэ гъуэмкIэ иригъэунэтIащ Бигулаевым. Ди гъуащхьэтетым абы зыри хуещIакъым – 2:I.
«Динамо»-м и ебгъэрыкIуэныгъэм хэту топыр къызыIэрыхьа Бигулаевыр ди гъуащхьэхъумэхэм яIэщIэкIри гъуащхьэтетым хуэзанщIэ хъуащ. Абыи топыр щхьэпридзри бжыгъэр 3:I-м хуигъэкIуащ.
Налшыкдэхэм тренер нэхъыщхьэ Биджиев Хьэсэнбий зэхъуэкIыныгъэ зыбжанэхэр икIэщIыпIэкIэ иригъэкIуэкIри командэм къаруущIэ къыхигъэхьащ – икIи джэгу и екIуэкIыкIэм напIэзыпIэу зихъуэжащ. ИщхьэкIэ къэдгъэлъэгъуа щытыкIэхэм и щхьэусыгъуэкIэ текIуэныгъэр зи Iэрылъхьэу къэзылъыта «Динамо»-м щIэщхъу къыщыщIащ.
Зэман нэхъыщхьэр иухыным дакъикъэ пщыкIущ нэхъыбэ къэмынэжауэ хьэщIэхэм контратакэ псынщIэ къызэрагъэпэщащ. Абы кърикIуа угловой къыщыхатам гъуэм дыхьэ топым IэкIэ къригъэгъэзащ хэгъэрейхэм ящыщ зым. Судья набдзагубдзаплъэм щыуагъэр и нэIэ щIэкIакъым – пенальти. Ар Iэзэу игъэзэщIащ джэгум къыхыхьагъащIэ Ольмезовым икIи зэщхьэщыкIыныгъэр нэхъ мащIэ ищIащ - 3:2.
ЗэIущIэм и кIэух бжыгъэм зэхъуэкIыныгъэ халъхьэну Iэмал къызыхукъуэкIа «Спартак-Налшыкым» и футболистхэм я къарур къызэрыгъуэтыжащ. Апхуэдэу налшыкдэсхэм я ебгъэрыкIуэныгъэр къезыхьэжьа ЛIупым топыр Топурия и лъэныкъуэмкIэ къыхитащ. Иужьрейр гъуэм гъунэгъу щыхуэхъум топыр ХъутIэм хуигъэжащ икIи ди гъуащхьауэм бжыгъэр зэхуэдэ ищIыжащ – 3:3.
Джэгум и зэман нэхъыщхьэм къыщIагъуа дакъикъиплIыр зэIущIэм псоми и уасэт – псори щызэхэкIын хуейр арат. Хэгъэрейхэм къыхата угловойм иужькIэ «Динамо»-м и футболистхэм ящыщ зыр зэуа топыр перекладинэм техуэри къигъэлъижащ. Абы къыкIэлъыкIуэу контратакэ псынщIэкIэ зыкъэзыгъэза «Спартак-Налшыкым» зэIущIэм и иужьрей секундхэм текIуэныгъэр къыхуихьащ. Ещанэ топыр дэгъэкIынымкIэ дэIэпыкъуэгъу хъуа Топурия и командэм и еплIанэ топыр дигъэкIри зи чэзу очкоищыр налшыкдэсхэм къахуихьащ.
ФокIадэ мазэм и иужьрей зэIущIэр ди щIалэхэм Дон Iус Ростов и СКА-м драгъэкIуэкIащ. Налшыкдэсхэм зэпэщIэтыныгъэр жыджэру къыщIадзащ. ЕпщIанэ дакъикъэр екIуэкIыу хэгъэрейхэм къыхата угловойм иужькIэ ди щIалэхэм ящыщ зым топыр щхьэкIэ гъуэм и лъэныкъуэмкIэ ириIуэнтIэкIащ, арщхьэкIэ ебгъэрыкIуэныгъэм хуэфэщэн кIэух ирагъэгъуэтыфакъым.
ХьэщIэхэм контртакэ псынщIэ къызэрагъэпэщам хэту Котельниковым топыр къыхуагъэжащ, ди гъуащхьэхъумэхэм Iэзэу къапекIуэкIри гъуэм еуащ. Мицаевым абы къригъэгъэзэну Iэмал иIакъым – 0:I.
Куэд дэмыкIыу «Спартак-Налшыкым» я гугъуехьым хуэфэщэн тыгъэ къыпэкIуащ. Топыр иIыгъыу СКА-м и штрафнойм ихьэ Далиевым Ашуевым и лъэныкъуэмкIэ къыхитащ. Мурад зэ еуэгъуэкIэ топыр Сиукаевым пэгъунэгъу плIанэпэм дигъэкIащ – 1:1.
КъыкIэлъыкIуэ очко зырызыр я ехъулIэныгъэхэм халъхьауэ зэрытемыгъэкIуауэ иужьрей джэгугъуэм зэгъунэгъу щIыналъэхэм я командэхэр зэбгъэдэкIыжащ.
