Къудей Алим и къалэныщIэ

Мэзкуу къалэм щекIуэкIащ Урысейм кикбоксингымкIэ и федерацэм и зи мычэзу конференцэ. Абы къыщыхахащ зэгухьэныгъэм и унафэщIхэр. Къэбэрдей-Балъкъэрым щыщ гъэсакIуэ цIэрыIуэ Къудей Алим иджыблагъэ хагъэхьащ Урысейм КикбоксингымкIэ и федерацэм (ФКР) и гъэзэщIакIуэ комитетым.

Зэгухьэныгъэм и КIэлъыплъакIуэ совет нэхъыщхьэм и тхьэмадэ Хасиков Бату къигъэлъагъуэри федерацэм и гъэзэщIакIуэ комитетым хагъэхьащ цIыхуибгъу. Абыхэм яхэтщ Къэбэрдей-Балъкъэрым КикбоксингымкIэ и федерацэм и президент Къудей Алим. ГъэзэщIакIуэ комитетым хэтхэм илъэсиплI пIалъэкIэ я къалэнхэр ягъэзэщIэнущ.

Къудей Алим WAKO дунейпсо категорие зиIэ судьящ, КъБР-м КикбоксингымкIэ и командэ къыхэхахэр щагъэхьэзыр центрым и тренер нэхъыщхьэщ. Абы и гъэсэнхэм яхэтщ мыхьэнэшхуэ зиIэ урысейпсо, дунейпсо зэхьэзэхуэхэм щытекIуахэмрэ къыщыхэжаныкIахэмрэ.