Кавказ лъэпкъхэм XVIII-XX лIэщIыгъуэхэм зэрахьа щыгъынырКавказ тхыдэр зыджхэм фIыуэ яцIыху Урысейм и этнографие музейм илъэс щэ ныкъуэкIэ щылэжьа, «Кавказ лъэпкъхэм XVIII-XX лIэщIыгъуэхэм зэрахьа щыгъыныр» тхылъ цIэрыIуэр зи IэдакъэщIэкI Студенецкая Евгение. Адрей лъэпкъхэм я тхыдэми къыдэкIуэу, ди Хэкум пасэ зэманым щызекIуэу щыта зыхуэпэкIэр зэфIэзыгъэувэжа бзылъхугъэм хуэдэу гунэсу адыгэ фащэм тетхыхьа щIэныгъэлI нобэр къыздэсым щыIэкъым. Адыгэ цейр
Адыгэ цейр Кавказ Ищхъэрэм ис лъэпкъхэм я деж нэхъ щызекIуэ хъулъхугъэ щIыIутелъ щыгъынщ. Нэхъыбэм ар къызыхащIыкIыр езыхэм зэIуаща бозт. Ауэ XIX лIэщIыгъуэм и кIэм – XX и пэм пщIантIэм зэрыдэкI цейхэр фабрикэм къыщIигъэкIа боз къэщэхуам къыхащIыкIын щIадзащ. Езыхэм зэIуащэж бозыр цым и фэхэм ещхьт: гъуабжэ, фIыцIэ, морэ, хужь, зэзэмызэ - гъуафэ е плъыжь-морафэ. Цей хужь ущрихьэлIэр зэзэмызэххэт, ар пщы-уэркъхэм яхухэха фэт. Къэбэрдейм цей хужьи щIакIуэ хужьи пщы-уэркъхэм ящымыщхэм щыщатIэгъэну хуиттэкъым. Боз къэщэхуа къагъэщхьэпэн зэрыщIадзам фэ зекIуэхэр ихъуэжа нэужь, цей щIыхухэр, плъыжь-морафэхэр, плъыжь-фIыцIафэхэр къежьащ. Хьэзырхэр Хьэзырхэр япэщIыкIэ къызэрежьар гын зракIутэ пхъэ бжьамий цIыкIуущ, итIанэ бдзапцIэшэхэр иралъхьэн щIадзащ. Фочыр хьэзыр Iупэм щаузэдкIэ къагъэщхьэпэ хъыдан цIыкIу Iуалъхьэжырт. Ауэ нэхъ зекIуэр дахэу тхыпхъэкIэ гъэщIэрэщIа гъущIым, иныкъуэм дыжьыным е дыщэм къыхэщIыкIа щхьэтепэ цIыкIухэрат. Фочхэр къежьа нэужь, хьэзырхэр къамыгъэсэбэпыж хъури, фащэр ауэ сытми зэрагъэщIэращIэ Iыхьэу къэнащ. Ахэр баш псыгъуэ цIыкIум къыхащIыкI, хьэзыр Iупэхэр гъущIым, къупщхьэм е бжьакъуэм къыхэщIыкIащ, ахэр лэч фIыцIэкIэ щали щыIэщ. Цей фIыцIэм и хьэзыр Iупэхэр къупщхьэ хужьым къыхащIыкIырт, цей сырыхум ейхэр – фIыцIэм. Хьэзырхэр узэрыхуейуэ дэтхэнэ кIапэмкIи хьэзырылъэм иплъхьэ мэхъу. Бгырыпхыр Бгырыпхыр цIыхухъу фащэм къыгуэпх мыхъун и Iыхьэт. Хъулъхугъэр бгырыпх щIэмылъу уэрамым къытехьэ хъунутэкъым, нэхъыжьми нэхъыщхьэми я пащхьэ бгырыпхыншэу ихьэну емыкIут. Вакъэр Фэм къыхэщIыкIа вакъэр лъэпкъ псоми я деж щызекIуэрт, ауэ нэхъыбэу абы ущрохьэлIэ адыгэхэм я деж. Къэбэрдей пщы-уэркъхэр къыхэзыгъэщт абыхэм я фэ вакъэ плъыжьыр. Къэбэрдейхэм япэщIэувэ бийхэм ар зыщагъэгъупщэртэкъым. Вакъэ плъыжь зылъыгъ зауэлIым уеуэмэ, пашэхэм яз хэбгъащIэу арат. КъэбэрдеибзэкIэ абы зэреджэр лъахъстэн вакъэщ. Ар и лъэгум деж щызэгуэдащ. Абы нэмыщI иджыри лъэдакъэ зыщIэт вакъэ лIэужьыгъуи щыIащ. ПыIэр ПыIэр бгырыс фащэм и Iыхьэ пажэхэм язщ. «Щхьэр псэумэ пыIэ щыщIэкъым», «Узэчэнджэщын уимыIэмэ, уи пыIэжьыр щхьэрыхи ечэнджэщ» жаIэ бгырысхэм. ДызэпсэлъылIахэм занщIэу ягу къэкIыж а псалъэжьхэм къагъэлъагъуэ цIыхухъум пыIэ щхьэрыгъыпхъэу псоми къызэралъытэр. Унэм щыщIыхьэкIэ пыIэ зыщхьэрахыртэкъым, ауэ щIыбым зэрыдэтыр зыщхьэрихыу, пыIэ цIыкIу зыщхьэрызытIагъэ щыIэт. Бгырысхэм я щхьэр яупст е кIэщI дыдэу щIащэрт, ари и щхьэусыгъуэ къыщIэкIынщ сыт щыгъуи пыIэ ящхьэрыгъыпхъэу псоми щIалъытэм. ПыIэхэми ахэр зэрыщхьэрагъэс щIыкIэми зэман дызытепсэлъыхьым и кIыхьагъкIэ зыбжанэрэ захъуэжащ. Бащлъыкъ - щхьэрыхъуэн Бащлыкъыр Кавказ Ищхъэрэм щыщ лъэпкъ псоми яцIыху, зи мыхьэнэр тырку псалъэ «баш» - «щхьэ» жыхуиIэм къытекIащ. Адыгэхэр абы щхьэрыхъуэнкIэ йоджэ. А мыхьэнэ дыдэр бащлъыкъым абхъазхэми ират. Бащлъыкъ хъужыр зи кIапэхэр ухъурея щхьэфIэлъхьэщ. Кавказ лъэпкъхэм зэщхьу зыщIахуапэр Фащэр зыгъэхьэзырыр бзылъхугъэхэрати, ахэр зы лъэпкъым къикIыу нэгъуэщIым хыхьэ хъумэ, лъэпкъитIыр фащэкIэ зэхъуэжыну Iэмал къыкъуэкIырт. Пщы-уэркъхэм я хабзэт я пщащэхэр хамэ лъэпкъхэм иратыни, аращ нэхъыбэу и щхьэусыгъуэр зы лъэпкъым и зыхуэпэкIэр адрейм ей щIэхъуам, къежьэм зэрызыдрагъэкIур дыщIыбгъужмэ. Шэч закъуи хэлъкъым къэбэрдей пщы-уэркъхэм я зыхуэпэкIэр абыхэм я жьауэ щIэта гъунэгъу лъэпкъхэм зи щхьэ пщIэ хуэзыщIыжу яхэта нэхъыщхьэхэм къызэращтам.
Поделиться:
Читать также:
27.04.2024 - 17:14 →
Витебск зыкъыщагъэлъэгъуэнущ
27.04.2024 - 13:04 →
Макъамэм зэфIэкI щызиIэхэр
27.04.2024 - 10:01 →
Макъамэ Iэмэпсымэхэр зыгъэбзэрабзэхэр
26.04.2024 - 15:39 →
ПащIэ Бэчмырзэ и дыщэ пхъуантэр
23.04.2024 - 18:33 →
«Дыщэ джыдэ цIыкIур» зыхуагъэфэщахэри яхэту
|