Ещанэ увыпIэр къихьащ

Атлетикэ псынщIэ

Къэбэрдей-Балъкъэрым щыщ Добренский Александр Чувашием атлетикэ псынщIэмкIэ щекIуэкIа урысейпсо зэхьэзэхуэм ехъулIэныгъэ къыщигъэлъэгъуащ. Зэпеуэр къызэрагъэпэщащ Чувашием и япэ олимп чемпион Игнатьев Ардалион и фэеплъу. 
А зэхьэзэхуэм хэтащ УФ-м, Беларусым къикIа спортсмен 300-м нэблагъэ. Диск дзынымкIэ зэпеуэм хэта Добренскэм домбеякъ медалыр къихьащ. Абы метр 56,35-кIэ дискыр идзащ.
Спортсменыр зэхьэзэхуэм хуигъэхьэзыращ Артамонов Артур.

БэнэкIэ хуит

Дыжьыныр и Iэрылъхьэщ

Иджыблагъэ Албанием бэнэкIэ хуитымкIэ ныбжьыщIэхэм я европэпсо зэхьэзэхуэ щекIуэкIащ. Зэпеуэм хэтащ зи ныбжьыр илъэс I8-м нэмыса ныбжьыщIэхэр. Къэбэрдей-Балъкъэрым щыщ Къэжэр Ислъам (кг 7I-рэ) текIуэныгъэу 4 къихьауэ финалым щыбанэу, Армением щыщ Никогосян Нарек къыхигъащIэри нэужь, дыжьыныр УФ-м и гуп къыхэхам къыхуихьащ.

Кикбоксинг

Медалитху Шэшэным
КикбоксингымкIэ урысейпсо зэхьэзэхуэ Шэшэным и Гудермес къалэм щекIуэкIащ. «Беной тревел» спорткомплексым къыщызэрагъэпэща зэIущIэм хэтащ УФ-м и щIыналъэ I8-м къикIа ныбжьыщIэ 500-м нэблагъэ.
А зэхьэзэхуэм ди щIалэхэм къыщахьащ медалиплI. Финалым нэсауэ, килограмм 48-рэ хъухэм я деж щызэуа Гуэщокъуэ Ислъам Дагъыстэным щыщ Кадырбеков Мурад къытекIуэри, етIуанэ хъуащ. БейцIыкIу Алихъани (кг 5I-рэ) дыщэм щIэбэну, Дагъыстэным щыщ Джангишиев Гапизгаджи къыхигъащIэри, дыжьын медалыр къылъысащ. 
Домбеякъ медалхэр а зэпеуэм къыщахьащ Соблыр Идаррэ (кг 5I-рэ) Щхьэныкъуэ Алимрэ (кг 60).
А зэхьэзэхуэм ипкъ иткIэ, апхуэдэуи ирагъэкIуэкIащ кадетхэм я фестиваль. «Лайт-контакт» дисциплинэмкIэ Зурхаев Назир (кг 37-рэ) дыщэр къихьащ. Спортсменхэр зэхьэзэхуэм хуагъэхьэзыращ Апажэ Рашидрэ БейцIыкIу Ибрэхьимрэ.