Сабийм и хуитыныгъэхэр хъумэнымкIэ УФ-м и Президентым и уполномоченнэ Львовэ-Беловэ Марие мы махуэхэм яхуэзащ «Мэшыкъуэ» зэхыхьэм щыIэ щIалэгъуалэм.
- Сабийхэмрэ щIалэгъуалэмрэ папщIэ «Первые» Iуэхур къыщызэдгъэпэщым, дэ куэд зэпэтлъытащ, - жеIэ абы. - Сыныфхоплъэри, си гур хохъуэ, ипэ итхэр фэ фхуэдэу щытыпхъэщ. Фи жыджэрагъым къэралым и къэкIуэнур елъытащи, къызэрымыкIуэу лъапIэщ фэ мы Iуэхум жэуаплыныгъэ фхэлъу фызэрыпэрытыр. Сыт хуэдэ мурадми гъащIэ щептыфынущ мы зэхыхьэм, - жиIащ Марие.
АдэкIэ ар ирагъэблэгъащ икIи ирагъэдэIуащ «Дарование» Iуэхум хэтхэм жаIэм, абыхэм я хъуэпсапIэм.
- Ди къалэн нэхъыщхьэр Урысейм щыпсэу дэтхэнэ сабийми унагъуэ иIэнырщ. Дэ дыхущIокъу жылагъуэм сабий унэхэм хуаIэ еплъыкIэр тхъуэжыну. АбыкIэ сэбэп фэри фыхъуфынущи, фхузэфIэкI къэвмыгъанэ. Зи гугъу сщIыр сабий зыпIыну къэзыщтахэм, сабий сымаджэ зиIэхэм защIэвгъэкъуэнырщ. А Iуэхухэм папщIэ ди къэралым Iэмал куэд щыIэщи, дызэгъусэмэ ар къызэрыдэхъулIэнум шэч къытесхьэркъым, - жиIащ Марие.
Апхуэдэу ар хэтащ «Нэхъыщхьэм теухуа дерсхэм».
- Куэд щIауэ сигу илът «Мэшыкъуэм» сыкъэкIуэну, щIалэгъуалэ зэхыхьэр къызэрызэрагъэпэщым сеплъыну. «Герои нашего времени» тхыгъэ цIэрыIуэр ауэ сытми Псыхуабэ щатхакъым, иджыкIэ мыбы щызэхуэсахэр дыщыпсэу лъэхъэнэм и лIыхъужьщ, абыхэм мыбы щатх езыхэм, къэралым я тхыдэр, - жиIащ Беловэм.
Ар щIалэгъуалэм яхутепсэлъыхьащ «Урысейм и пэрытхэр» зэпеуэм и фIыгъэкIэ сенатор къулыкъур къызэрыратам, нэгъуэщIхэми.
Сабийм и хуитыныгъэхэр хъумэнымкIэ уполномоченнэ IэнатIэр къыхуагъэфэща иужь, абы япэ дыдэу ищIахэри жиIащ.
- Сэрэ сызыдэлажьэ гупымрэ къыдгурыIуащ Iуэхугъуэ куэд зэрытхуэхъуэжынур. Апхуэдэу, «Подростки России», «Дети в семье», «Сопровождение через всю жизнь», «Страна для детей» программэ инхэр дгъэхьэзырауэ абыхэм долэжь.
Беловэр тепсэлъыхьащ Донецк, Луганск республикэхэм, Херсон, Запорожье щIыналъэхэм щыщ сабийхэм драгъэкIуэкI лэжьыгъэми.
ЩIалэгъуалэм я упщIэхэр сабий ныкъуэдыкъуэхэм, зеиншэу къэнахэм драгъэкIуэкI лэжьыгъэм теухуат.
- Зэи зыщывмыгъэгъупщэ, - мы дунейм цIыхум нэхъапэ зыри теткъым. Абы къыхэкIыу, зыгуэрым удэIэпыкъуну, уепсэлъэну, убгъэдэсыну Iэмал бгъуэту - блэбгъэкI хъунукъым. Хуабжьу сыщогуфIыкI ди сабийхэр нэхъ насыпыфIэ, акъылыфIэ щIыным фызэрытелажьэм, - жиIащ Марие зэIущIэм и кIэухым.
