ЩIыналъэхэр зэпызыщIэ Iуэху

Iуэху дахэр Ставропольем щрагъэжьащ, икIи выставкэм къыдэкIуэу, Сабий художественнэ школым екIуалIэ цIыкIухэм папщIэ мастер-класси ятащ. БгъэIэпхъуэ хъу выставкэр Кавказ Ищхъэрэм и щIыналъэхэм щагъэлъагъуэ. Иужь дыдэу ар Луганск яшэнущ. Къэбэрдей-Балъкъэрри хыхьащ Урысей реестрым къыхилъхьа социально-щэнхабзэ Iуэхум икIи адэкIи абы пащэным щхьэпащ. 

«Росреестр, «Роскадастр» IуэхущIапIэхэм я щIыналъэ къудамэхэм Кавказ Ищхъэрэм и федеральнэ округхэм хыхьэ хэгъэгухэм щызэхуахьэса сурэтхэмрэ мы гъуазджэ лIэужьыгъуэм теухуауэ къагъэсэбэп Iэмэпсымэхэмрэ Донбасс и сабийхэми хуагуэшынущ. Iуэхум хэт дэтхэнэ зы щIыналъэми художникым и лэжьыгъэхэм ящыщкIэ хуэупсэнущ къапщтэмэ. Хоронькэ Игорь и лэжьыгъэ 25-рэ Луганскэ ЦIыхубэ Республикэм яшэнущ, абы хэщIыныгъэ зыгъуэта и музейхэмрэ художественнэ фондхэмрэ иратыну. 

Выставкэм хагъэхьа лэжьыгъэхэм художникым къыщигъэлъэгъуащ илъэс зыбжанэ хъуауэ ар дэзыхьэх Кавказ Ищхъэрэм (ЕссэнтIыгу, Кисловодск, Железноводск, Пятигорск къалэхэм, станицэхэм, Севастополь и портхэм, тенджыз ФIыцIэм и Iуфэм Iус къалэхэм) и щIыуэпс къулейр, пхъэщхьэмыщхьэ хадэхэр, губгъуэхэр, мэзхэр. Сурэтхэм къызэщIаубыдэ щIыналъэхэм я тхыдэри нобэрей псэукIэри. Художникым и сурэтхэм къыщигъэлъэгъуащ щIыналъэм хуиIэ лъагъуныгъэ мыкIуэщIыр. 

- Нэгъабэ и жэпуэгъуэ мазэм Урысейм щIыналъэщIэхэр къыгухьащ, - жиIащ Урысейреестрым Къэбэрдей-Балъкъэрым щиIэ къудамэм и унафэщI Соблыр Беслъэн. - Нобэ ди къалэнщ ахэр ди къэралым и экономикэ, хабзэ, егъэджэныгъэ, щэнхабзэ Iуэхухэм къыхэтшэну. Псоми ди зэхуэдэ Iуэхум тхузэфIэкI хэлъхьэныгъэ худощI. Ди къэралым и щэнхабзэр, щыIэкIэ-псэукIэр егъэфIэкIуэным, цIыхухэр зэкъуэгъэувэным хуэунэтIа мы Iуэху дахэри абы хуэгъэпса лъэбакъуэщ.

КъБР-м и Парламентым ЩэнхабзэмкIэ, жылагъуэмрэ хъыбарегъащIэ политикэмрэ зегъэужьынымкIэ и комитетым и унафэщI Къумал Заурбэч жиIащ жылагъуэр зэкъуэгъэувэнымкIэ, къэралым и къэралыгъуэр гъэбыдэным и IуэхукIэ щIыналъэхэр зэпызыщIэ щэнхабзэ зэхыхьэм мыхьэнэшхуэ зэриIэр. Абы Хоронько Игорь фIыщIэ хуищIащ сабийхэмрэ щIалэгъуалэмрэ псэемыблэжу зэрадэлажьэм, абыхэм я зэфIэкIхэр къызэкъуахынымкIэ зэрадэIэпыкъум папщIэ.

- СВО-м и ветеранхэмрэ абыхэм я унагъуэхэмрэ дадоIэпыкъу, дзэ Iуэху хэхам хэта щIалэхэр мамыр гъащIэм къыхэшэжыным теухуа лэжьыгъи ядыдогъэкIуэкI, жылагъуэр абы хуэныкъуэщи, - жиIащ «Защитники Отечества» фондым и унафэщI Къумыкъу Зульфие. 

КъБР-м ЩэнхабзэмкIэ и министерствэм профессиональнэ гъуазджэмрэ художественнэ егъэджэныгъэмкIэ и къудамэм и унафэщI ПащIэ Рамед фIыщIэ яхуищIащ Iуэху гуапэр къыхэзылъхьахэм, ар къазэрехъулIар, зы щIыналъэм икIыу адрейм абы зэрыщыпащэр щхьэпэу къызэрилъытэр щIигъужащ. Псом хуэмыдэу Хоронько Игорь фIыщIэ хуищIащ выставкэм дахагъэ, гуапагъэ, хуабагъэ къызыпкърыкI и лэжьыгъэхэр зэрыхигъэхьам папщIэ. КъБР-м щэнхабзэмкIэ и министр Къумахуэ Мухьэдин къыбгъэдэкIыу художникым фIыщIэ тхылъ иратащ, сурэтыщI гъуазджэм зегъэужьыным хэлъхьэныгъэфIхэр зэрыхуищIым, щIыналъэм и жылагъуэ-щэнхабзэ гъащIэм, къыхалъхьа Iуэху гуапэм жыджэру зэрыхэтым папщIэ. 

Хоронько Игорь жиIащ гъуазджэр къэралыр езыгъэфIакIуэ къарууэ зэрыщытыр. Абы и лэжьыгъэхэм ящыщ зы иритащ КъБР-м и Лъэпкъ музейм и унафэщI НакIэ Феликс, IуэхущIапIэм и фондым халъхьэну. Художникым мастер-класс гъэщIэгъуэн итащ, «Росреестр»-мрэ «Роскадастр»-мрэ я лэжьакIуэхэм я щIэблэ республикэм и художественнэ IуэхущIапIэхэм екIуалIэхэм папщIэ.