Ди щIалэхэм медалих къахьащ

8 сентября, 2023 - 11:22
Алыдж-урым бэнэкIэ
Ди щIалэхэм медалих къахьащ
СССР-ми Урысейми я бэнакIуэ цIэрыIуэ Миндиашвили Дмитрий и цIэр зезыхьэ спорт Академиеу Красноярск къалэм щыIэм иджыблагъэ щекIуэкIащ 1976 гъэм Олимпиадэм чемпион щыхъуа, зэхьэзэхуэ куэдым бжьыпэр щызыубыда Шумаков Алексей и щIыхькIэ къызэрагъэпэщ урысейпсо зэпеуэр. Алыдж-урым бэнэкIэм хухаха зэпеуэр мы гъэм еплIыщIанэщ.
Ди къэралым нэмыщI, мыбы хэтащ Къэзахъстаным, Къыргъызым, Армением къикIахэри. Мы зэхьэзэхуэм и пщIэр зэрылъагэр къегъэлъагъуэ спортсмени 150-м нэблагъэ зэрыхэтам.
Ди гуапэ мэхъу Къэбэрдей-Балъкъэрым и бэнакIуэхэм, сыт щыгъуи хуэдэу, я зэфIэкI зэрагъэлъэгъуар. Ди щIалэхэм яхузэфIэкIащ медалих къахьэхун.
Килограмм 63-рэ зи хьэлъагъ гупым Локьяев Жамбулат, Жолдашев Валерэ (килограмм 77-рэ), Къудей Алим (килограмм 82-рэ) сымэ япэ увыпIэр щаубыдри, дыщэ медаль къахьащ.
ЕтIуанэ хъуахэщ Аслъэн Алихъанрэ (килограмм 55-рэ) Къарэгъул Анзоррэ (килограмм 63-рэ). Ещанэ увыпIэр къэзыхьу домбеякъ медаль къызратар МахуэлI Иналщ (килограмм 67-рэ).
Дохъуэхъу ехъулIэныгъэ зиIа ди бэнакIуэхэми абыхэм я гъэсакIуэхэми.
 
Бокс
Мыбыи дыщыпашэщ
 АСА-кIэ зэджэ хабзэм тету, боксымкIэ зэхьэзэхуэшхуэ Краснодар къалэм щокIуэкI. Ди республикэм и спортсменхэм ехъулIэныгъэ ин мыбы зэрыщагъэлъагъуэр ди гуапэщ.
ПэщIэдзэ зэIущIэхэм текIуэныгъэ къыщахьри, зи хьэлъагъкIэ нэхъ псынщIэхэм ящыщу бжьыпэм щIэбэнынухэм ди щIалэхэр хэхуащ. Ахэр - тIэунейрэ чемпион хъуауэ щыта Палмерэ Лэнс хэзыгъэщIа Туменов Биберт, апхуэдэу пIалъэ кIэщIым Рахмонов Осимхон текIуа КIэрэф Азэмэт, Пазылов Мирзамедин ефIэкIа Нэгъуей Астемыр, Асуев Рустам къызыпэмылъэща Мэш Ислъам сымэщ.
Къыхэгъэщыпхъэщ, къызэгъэпэщакIуэхэм зэрагъэувам тету, нэхъ дахэу икIи лъэкIыныгъэшхуэ иIэу къалъыта Туменов Биберт ахъшэ саугъэту доллар мин 50 къызэрыратынур. Абы къищынэмыщIауэ, КIэрэф Азэмэт мыпхуэдэ зэхьэзэхуэхэм зэIущIэ 17 щригъэкIуэкIати, псоми текIуэныгъэ къыщихьащ.
 
И мурадэр зригъэхъулIэу
Иджыри боксым теухуауэ зы хъыбар. Къэбэрдей-Балъкъэрым спортымкIэ и министр Хьэсанэ Ислъам боксыр лэжьыгъэ зыхуэхъуахэм я гупым хэт Куэшмэн Дарьялрэ абы и адэ МуIэедрэ яIущIащ. Абы кърагъэблэгъат журналистхэри.
Илъэс 20 зи ныбжь ди спортсменыр мы спорт лIэужьыгъуэм зэрыдихьэхрэ илъэсий мэхъу. Ар щыпсэур Лос-Анджелесщ, зи гъэсэныр боксер цIэрыIуэхэу Тайсон Майклрэ Пакьяо Мэннирэ ядэлэжьа Роуч Фреддиррэ абы и дэIэпыкъуэгъу Завала Эрнирэщ.

 

Дарьял щIалэ цIыкIуу боксым дихьэхауэ щытащ икIи СпортымкIэ министерствэм и школ Налшык дэтым япэ лъэбакъуэр щичащ, Занилов Муратрэ Аминов Мирзарэ я гъэсэну. 
Журналистхэр зыщIэупщIахэм жэуап къратащ Куэшмэнми, спорт школым и унафэщI Султанов Мурати, боксымкIэ тренер нэхъыжь КIэрэф Залыми.
Къэбэрдей-Балъкъэрым спортымкIэ и министр Хьэсанэ Ислъам ЩIыхь тхылъ иритащ Куэшмэн МуIэед икIи фIыщIэ хуищIащ ди щIыпIэм боксым зыщиужьыным и зэфIэкI зэрыхилъхьам папщIэ. Министрыр зэадэзэкъуэм ехъуэхъуащ я ехъулIэныгъэм адэкIи хагъэхъуэну.
ШАФИЙ Аслъэн.
  • 30 просмотров
Поделиться:

Читать также:

25.04.2024 - 17:30 → Олимп чемпионыр ящыгъупщэркъым
25.04.2024 - 17:00 → Кубокыр къыздашэ
23.04.2024 - 20:03 → Уанэш зэхьэзэхуэшхуэ
23.04.2024 - 17:06 → Гуп зэпеуэм япэ щыхъуащ
23.04.2024 - 15:26 → Урысейм щынэхъ лъэщхэр