Адыгэ лъэпкъым и тхыдэр

«Принт Центр» тхылъ тедзапIэм дунейм къыщытохьэ «Заметки» проектым хыхьэ тхылъхэр. ИпэкIэ къыдэкIа тхылъийм теухуа тхыгъэхэр тетащ ди газетым, иджы щIэджыкIакIуэхэм яIэрыхьэнур ебгъуанэщ. Ар зэхэзыгъэувар Мамхэгъ Астемырщ.  

Адыгэ лъэпкъым и къежьапIэмрэ и тхыдэмрэ, лъэпкъ зэ­хуэсхэм, тхылъыщIэхэм я лъэ­теуэвэхэм, есэп щIэныгъэм ди республикэм щиIэ гулъытэм, КъБКъУ-м есэпымкIэ и щIэныгъэлIхэу, егъэджэныгъэмрэ щIэ­ныгъэмрэ хэлъхьэныгъэ хуэзыщIахэу дунейм ехыжахэми иджыпсту зи къару илъы­гъуэхэми, Хэку зауэшхуэм лIыгъэ щызезыхьахэм, школым есэ­пыр зэрыщрагъэдж щIы­кIэм, зэчий зыбгъэдэлъ сабийхэм драгъэкIуэкIа лэжьыгъэм ятеухуа тхыгъэу езы Астемыри нэгъуэщIхэми я IэдакъэщIэкIыу илъэс зэхуэмыдэхэм (1997-2018) газетхэмрэ сборникхэмрэ къытехуахэр итщ тхылъым. Апхуэдэуи абы къыщыхьащ ­Мамхэгъым зыщIыпIи къытримыгъэдзахэри, и тхыгъэрэ щIэныгъэ-методикэ лэжьыгъэу периодикэ къыдэкIыгъуэм къыте­хуахэмрэ я спискэри. 
Хэт дежкIи щэхукъым иджыпсту тхылъ къыдэбгъэкIыну зэрыгугъур. Лъэпкъым и дежкIэ мыхьэнэшхуэ зиIэ лэжьыгъэхэр щылъщ, абы текIуэдэну мылъкур псоми зэрахуэмыгъэкъарум къыхэкIыу. Мамхэгъ Астемыр и тхылъым гъащIэ зэригъуэтар я фIыгъэщ еджэжыр щымащIэ ди зэманым Iуэ­хуфI щызылэжьыну гупыж зыщIа хьэрычэтыщIэхэм: Темрокъуэ Ануаррэ Мэремкъул Умарбийрэ.