Счётчик «губзыгъэхэр» ягъэув

«Кавказ Ищхъэрэм и Россети» ПАО-м и къудамэ «Къэббалъкъэнерго»-м республикэм и жылагъуэхэм электрокъарууэ къагъэсэбэпар къызэрапщытэ Iэмэпсымэ «губзыгъэхэр» щыгъэувын щIадзащ. 

ЩIыналъэм фэтэр куэду зэхэт и унэхэм щIэт, зи пIалъэ икIа счётчикыжьхэр, къутахэр зэрахъуэкI. А лэжьыгъэр нэсу зэфIагъэкIын папщIэ къащэхуну я мурадщ иджырей мардэм къитIасэ апхуэдэ прибору мини 2,7-рэ. 
Иджыпсту республикэм щолажьэ щхьэусыгъуэ зэмы­лIэужьыгъуэхэм къыхэкIыу пщIэншэу яфIэкIуэд электрокъарур нэхъ мащIэ щIыным ехьэлIа программэ. Абы ипкъ иткIэ Бахъсэн къалэм, Бахъсэн, Дзэлыкъуэ щIыналъэхэм щагъэуващ счётчик «губзыгъэу» мин 37,3-рэ. Дызэрыт илъэсым апхуэдэу мини 4,5-рэ Налшык къалэм къат куэду зэтет и унэхэм щIагъэувэнущ.
А Iэмэпсымэ «губзыгъэм» езым етх зы унагъуэм къылъысу къигъэсэбэпа электрокъарум и куэдагъыр, икIи иужькIэ ар ирегъэхь «Къэббалъкъэнерго»-м и IуэхущIапIэхэм. Уэздыгъэу къагъэсэбэпар къэзылъытэр интернетми телефонми пыщIащ, Вай-файкIи мэлажьэ. Апхуэдэуи, счётчикым къепщ унэм екIуалIэ электрокъарум и лъэщагъыр зыхуэдизыр, ар мардэм къитIасэрэ къимытIасэри зэхегъэкIыф. 
Абы къигъэлъагъуэ бжыгъэхэр къиптхыкIын, къэбгъэсэбэпар зыхуэдизым электрокъарур къэзыутIыпщхэр щыгъуазэ пщIын, бгъэсам пэкIуэ ахъшэр ептын папщIэ дяпэкIэ а псоми къакIэлъыпкIухьын хуей хъунукъым – псори нэрылъагъущ.
Мыри къыхэгъэщыпхъэщ: счётчикым и лэжьыгъэм щхьэзыфIэфIагъкIэ хэIэбэну яужь ихьэхэм я мурадыр къайхъулIэнукъым - абы занщIэу хъыбар яригъэщIэнущ зыхуэфащэ IэщIагъэлIхэм.