«Сыхуейщ сабийхэм садэIэпыкъуну»

Налшык къалэм и 37-нэ сабий садым и лэжьакIуэ Борэн Аринэ Iуэху щхьэпэ иришэжьащ, Къэбэрдей-Балъкъэрым Лъэпкъ IуэхухэмкIэ и министерствэм къызэригъэпэща зэпеуэм саугъэт къыщихьа нэужь. Ар ядолажьэ я тхьэкIумэм зэхимыхыу къалъхуа, зэрыдаIуэ Iэмэпсымэ зи щхьэм хэлъ сабийхэм.

- Зэхамыхыу къалъхуауэ, ауэ операцэ ящIу зи щхьэм зэрыдаIуэ Iэмэпсымэ халъхьа цIыкIухэм зэхах хъуж мыхъумэ, езыхэр псэлъэфыркъым. Апхуэдэхэр хуэныкъуэщ дефектолог, тэрмэш, психолог, логопед. Зи узыншагъэм сэкъат иIэ сабийхэр езыр-езыру зы гупу зэхэтыжынкIэ Iэмал иIэкъым. Абыхэм заужьын папщIэ, узыншэхэм яхэхъукIыным мыхьэншхуэ иIэу къалъытэ щIэныгъэлIхэм. Ар тегъэщIапIэ тщIыри, къэтхьа саугъэтымкIэ 37-нэ сабий садым гуп къыщызэIутхащ, дызыхуэныкъуэ IэмэпсымэхэмкIэ къызэгъэпэщауэ. Зи гугъу сщIа IэщIагъэлIхэр зэпымычу дэлэжьэнущ а цIыкIухэм. Сы сыдефектологщ, сурдопедагогщ, Дадэ Iэсият логопеду, психологыу дадолажьэ. Апхуэдэ щIыкIэкIэ сабийхэм закъедгъэужьу, къызэрыгуэкI курыт еджапIэм щеджэфын хуэдэу къэдгъэпсэлъэну аращ зи ужь дитыр. А псоми я ужь дыщIиувэжар Къэбэрдей-Балъкъэрым и закъуэ мыхъуу, Кавказ Ищхъэрэ щIыналъэм апхуэдэ сабийхэм щыдэлажьэ IуэхущIапIэ щыIэххэкъым. IэщIагъэлIхэр щхьэхуэ-щхьэхуэу къадэбгъэлажьэ мыхъумэ, хуиту псори зы щIыпIэм деж къыщыдагъэлэжьэну ягъуэтыркъым адэ-анэхэм. Илъэсым сом мини 150-рэ хуозэ, псалъэм папщIэ, логопедым и закъуэ къыдэбгъэлэжьэнумэ. Апхуэдэ IэщIагъэлIу 4 хуэныкъуэщ сабийр! Сэри сиIэщ апхуэдэ сабий, тэмэму зэхимыхыу. Куэд дыдэрэ къесшэкIащ ар, згъэхъужыну сыхъуапсэу. Ауэ сэ ичэзум апхуэдэ дэIэпыкъуэгъуи IуэхущIапIи сымыгъуэтурэ, си сабийр къэжэпхъащ. Аращи, апхуэдэ гукъеуэ зиIэ адэ-анэхэм дежкIэ щIэгъэкъуэнышхуэу къысщохъу Iуэху етхьэжар, - жеIэ Аринэ.

Гужевэ Ольгэ и унафэ щIэту Аринэ игъэхьэзыра лэжьыгъэм щытхъушхуэ иIащ. Накъыгъэ мазэ лъандэрэ проектыр ягъэлажьэри, ехъулIэныгъэфIхэр къагъэлъагъуэу зи узыншагъэм сэкъат иIэ сабийхэм ядолажьэ.