КъБР-м и Лъэпкъ музейм щагъэлъагъуэ «Образ женщины в творчестве современных художников Северного Кавказа» зыфIаща лэжьыгъэхэр. А фIэщыгъэм щIэту ирагъэкIуэкIа зэпеуэм щытекIуа сурэт нэхъыфIхэр хагъэхьащ абы. Ар къызэрагъэпэщащ ХудожествэхэмкIэ Урысей Академиемрэ (РАХ) УФ-м и СурэтыщIхэм я зэгухьэныгъэмрэ, «Традиции и новаторства в творчестве современных художников Северного Кавказа» Iуэхум хыхьэу.
КъБР-м щэнхабзэмкIэ и министрым и къуэдзэ Карчаевэ Iэминэ выставкэр къыщызэIуихым къекIуэлIа хьэщIэхэм, художникхэм, ар къызэзыгъэпэщахэм фIэхъус гуапэ ярихри, жиIащ РАХ-м Налшык щригъэкIуэкI Iуэхухэм мыр зэращыщыр, абы и цIэ къудейм куэдым узэрыригъэгупсысыр, сурэтыщI куэдым бзылъхугъэм и теплъэр къэзыгъэлъагъуэ лэжьыгъэфIхэр зэраIэр.
- Унагъуэ жьэгум, пщIэм, нэмысым, анэу щытыным къыхуигъэщIа бзылъхугъэ гуакIуэхэм я теплъэр къызэрыщ лэжьыгъэхэр щхьэхуэу ягъэлъэгъуэныр зи жэрдэм РАХ-м и лIыкIуэхэм фIыщIэ фхуэфащэщ мыпхуэдэ дахагъэ фигу къызэрыкIам папщIэ, - жиIащ Карчаевэм. – ДяпэкIи мы Iуэху дахэм икIи щхьэпэм ди щIыналъэми нэгъуэщI щIыпIэхэми къыщыпыфщэну дыщогугъ!
КъБР-м и Парламетым и комитетым и унафэщI Къумал Заурбэч выставкэр зи жэрдэмхэу РАХ-м и президент Церетели Зурабрэ а академием и вице-президент, гъуазджэ щIэныгъэхэмкIэ кандидат Кочемасовэ Татьянэрэ фIыщIэ яхуищIащ икIи и псалъэм къыхигъэщащ, гъащIэми хуэдэу, бзылъхугъэм, анэм я теплъэм сурэтыщI гъуазджэми мыхьэнэшхуэрэ щIэупщIэрэ зэрыщаIэр. Абы жиIащ Къэбэрдей-Балъкъэрым и къэралыгъуэр илъэси 100 щрикъум ирихьэлIэу, 2022 гъэм ХудожествэхэмкIэ Урысей Академием ди республикэм щилэжьа Iуэхухэм мы зэхыхьэ гуапэхэр къызэрыкIэлъыкIуар.
Кочемасовэ Татьянэ выставкэм зыкърезыгъэхьэлIахэм фIэхъус яриха нэужь, академикхэм фIыщIэ яхуищIащ щэнхабзэм, сурэтыщI гъуазджэм гулъытэрэ хэлъхьэныгъэфIхэмрэ зэрыхуащIым папщIэ. Ар Церетели Зураб и хъуэхъум къахуеджа нэужь, къыхигъэщащ гъуазджэм и къарур иджыри зэ наIуэ ящыщIынымрэ Кавказ Ищхъэрэм и сурэтыщIхэр зэкъуэгъэувэнымкIэ выставкэр зэрыщхьэпар.
РАХ-м сурэтыщI гъуазджэхэм я тхыдэмрэ теориемкIэ и щIэныгъэ-къэхутакIуэ институтым и унафэщI, академик Ступин Сергей жиIащ Церетели Зураб и унафэкIэ Iуэху дахэр мы гъэм етIуанэу Къэбэрдей-Балъкъэрым зэрыщекIуэкIыр. Абы фIыщIэ яхуищIащ КъБР-м и унафэщIхэм, КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ, КъБР-м и цIыхубэ художникхэу КIыщ Мухьэдин, Црым Руслан, ГъущIапщэ Арсен сымэ, Iуэхур ди щIыналъэм щрагъэкIуэкIыну Iэмал къызэрыратымрэ ар зэрагъэкIуатэмрэ папщIэ.
- Мыпхуэдэ Iуэху дахэ ди музейм зэрыщекIуэкIыр гуапэщ! Абы иджыри къыпащэну дыщогугъ! – жиIащ Лъэпкъ музейм и унафэщI, тхыдэ щIэныгъэхэм я кандидат Накуэ Феликс.
- Художникхэм я дежкIэ выставкэр гъуазджэ махуэшхуэ хъуащ. Ар и щыхьэтщ Церетели Зураб сурэтыщIхэм гулъытэрэ пщIэрэ зэрахуищIым, - жиIащ УФ-м и цIыхубэ художник, РАХ-м и академик Петров Константин. – Бзылъхугъэхэм я дахагъэмрэ къарумрэ щIэншэщ. Къэбэрдей-Балъкъэрым исщ зи дахагъым хьэщыкъ уищI цIыхубз тхьэIухудхэр!
Урысей Ипщэм ХудожествэхэмкIэ и Академием и унафэщI Олешня Сергей къыхигъэщащ урысей гъуазджэм Къэбэрдей-Балъкъэрым увыпIэфI зэрыщиубыдыр. УФ-мрэ КъБР-мрэ я цIыхубэ художник, академик Пащты Герман выставкэм зыкърезыгъэхьэлIахэм ехъуэхъуащ икIи жиIащ Петров Константин КъБКъУ-м щригъэкIуэкIа мастер-классыр зэрыщхьэпэр.
Иджы япэу Iуэхум я зэфIэкI щеплъыжыну къыхашащ Кавказ Ищхъэрэ федеральнэ щIыналъэм и хэгъэгу псоми щыщ художникхэр. «Образ женщины в творчестве современных художников Северного Кавказа» зэпеуэм и къэпщытакIуэ гупым хэтащ Церетели Зураб зи пашэ сурэтыщI цIэрыIуэхэр: РАХ-м и вице-президентхэу Калинин Викторрэ Кочемасовэ Татьянэрэ, академик, гъуазджэ щIэныгъэхэмкIэ докторхэу Бобыкин Андрейрэ Астраханцевэ Татьянэрэ, академик, УФ-м и цIыхубэ художник Ковальчук Андрей, Ступин Сергей, Петров Константин, гъуазджэ щIэныгъэхэмкIэ кандидат, РАХ-м и щIэныгъэ-къэхутакIуэ институтым и лэжьакIуэ нэхъыщхьэ Муратов Александр, УФ-м гъуазджэхэмкIэ щIыхь зиIэ и лэжьакIуэ Бойцовэ Татьянэ.
Зэхьэзэхуэм лэжьыгъэ 200-м нэблагъэ ирагъэхьат. Кавказ Ищхъэрэ федеральнэ щIыналъэм и хэгъэгухэм щыщ художникхэм я лэжьыгъэ 29-рэ абы и нэхъыфIхэм яхэтт. Зэпеуэм хэмыхьэу, абы я лэжьыгъэхэр ирагъэхьат хамэ къэрал щыпсэу ди хэкуэгъу художник цIэрыIуэхэу КIыщ Мухьэдинрэ Шемякин Михаилрэ.
Выставкэм щагъэлъэпIащ сурэтыщI гъуазджэхэмкIэ «Образ женщины в творчестве современных художников Северного Кавказа» художественнэ зэпеуэм бжьыпэр щызыубыдахэр. Ди республикэм щыщу текIуауэ я цIэ къраIуащ икIи ягъэпэжащ Анаев Мурат, Бгъэжьнокъуэ Заурбэч, Мазло Руслан, Тхьэзэплъыж Руслан, Черкесов ТIэхьир, абыхэм я лэжьыгъэхэр щагъэлъэгъуэнущ Москва ХудожествэхэмкIэ и Урысей Академием - Церетели Зураб ГъуазджэхэмкIэ и галереем. КъищынэмыщIауэ, Кавказ Ищхъэрэм и сурэтыщIхэм ятеухуа фильм трахыну мурад яIэщ.
Iуэхум хыхьэу мы махуэхэм республикэм щокIуэкI лъэпкъхэм зэдай щIэныгъэ конференц, мастер-классхэр, академикхэмрэ КИФЩI-м и еджапIэ нэхъыщхьэхэм я художественнэ къудамэхэм щеджэхэмрэ я зэIущIэхэр, гъуазджэм теухуа лекцэхэр, Кавказ Ищхъэрэм сурэтыщI гъуазджэм зыщегъэужьыным теухуа зэхыхьэхэр. ЗэIущIэхэм щытепсэлъыхьащ РАХ-м ди щIыналъэм щигъэзащIэ щэнхабзэ, щIэныгъэ, егъэджэныгъэ Iуэхухэм, зэфIэкI зиIэ художник ныбжьыщIэхэм ядэIэпыкъуным, художественнэ щIэныгъэ егъэгъуэтыным, нэгъуэщIхэми.