Пщалъэхэм я дунейпсо махуэщ

ЖыпIэнур арамэ, дуней псор пщалъэхэм тетщ, уеблэмэ гъащIэм и лъэныкъуэ куэдым ахэр лъабжьэ яхуохъу. Я мыхьэнэр щIагъэбыдэн мурадкIэ, илъэс къэс Пщалъэхэм я дунейпсо махуэм къыхуеджэныгъэ щхьэхуэ къыхуагупсыс. Мы гъэм ар ирагъэкIуэкI «Пщалъэхэм дзыхьыр щIагъэбыдэ» («Стандарты укрепляют доверие» къыхуеджэныгъэм щIэту. 

СтандартизацэмкIэ Дунейпсо къызэгъэпэщыныгъэхэм – МЭК-м, ИСО-м, МСЭ-м лъэпкъ, щIыналъэ пщалъэ куэдыкIейхэр зэпашэч, сату Iуэхум хэлъ лъэпощхьэпохэр зэфIах, я зэдэлэжьэныгъэр социально-экономикэ зыужьыныгъэм сэбэп хуохъу, ардыдэмкIи дунейпсо Iуэху зехьэкIэ пэрытхэр зэкIэлъагъакIуэ.

Пщалъэхэм я фIыгъэкIэ, зы щIыпIэ дыпсэлъэну дыхуеймэ, телефонкIэ зэрызыпытщIэфынур дощIэ, сымаджэ дыхъумэ, Iэмэпсымэ ехьэжьахэмкIэ къыдэIэзэну дащогугъ, автомашинэ дисмэ, и лэжьэкIэр зыхуэдэр кърыдощIэ, дызыхуей хъыбархэр Интернетым къыщыдогъуэт. Дунейпсо пщалъэхэр ди гъуазэу, хьэпшыпхэм, ерыскъыхэм, Iуэхутхьэбзэхэм я фIагъыр здынэсыр тхузэхэгъэкIынущ. Дзыхьымрэ зэдэлэжьэныгъэмрэ абыхэм къызэрагъэпэщ, зэдэрэгъухэм я IэдакъэщIэкIхэр дунейпсо сатум щыпхагъэкIыным ахэр трагъэгушхуэ. Пщалъэхэм я фIыгъэкIэ зохъуажэ дэнэ щIыпIи Iуэху щызыщIэхэр. Бжыгъэ гъэпсахэрщ бизнесым, правительствэхэм, жылагъуэхэм я зэдэлэжьэныгъэми лъабжьэ быдэ яхуэхъур. Апхуэдэ дыдэуи, пщалъэхэм я фIыгъэкIэ экономикэм жыджэру зезыгъэужь Iэмалхэр къагупсыс икIи къагъэсэбэп. 

Къэбэрдей-Балъкъэрым СтандартизацэмкIэ, метрологиемрэ гъэунэхуныгъэхэмкIэ и къэрал щIыналъэ центр – федеральнэ бюджет IуэхущIапIэр (ЦСМ – ФБУ) дэфтэрхэмрэ нэгъуэщI тхылъхэмкIи къулейщ. Апхуэдэщ лъэпкъ-дунейпсо пщалъэхэм, техникэ регламентхэм теухуахэр, щIэныгъэ-техникэ, экономикэ журналхэр, зэрыгъуазэ методикэхэр, урысейпсо классификаторхэр, нэгъуэщI куэдхэри. Центрым республикэм и предприятэхэм, организацэхэм я IэщIагъэлIхэр, хьэрычэтыщIэхэр, цIыху щхьэхуэхэр Iэмал имыIэу зыхуей-зыхуэныкъуэ щIэныгъэ-техникэ хъыбархэмкIэ, стандартизацэм, метрологием, гъэунэхуныгъэхэм я пщалъэ тхылъхэмкIэ къызэрегъэпэщ, зэхуегъакIуэ. 

Лэжьыгъэ псоми я нэхъыбэр зыгъэзащIэр центрым метрологиемкIэ и къудамэхэрщ. Абыхэм Iэмэпсымэу къызэрагъэпэщхэм я щытыкIэр зыхуэдэр къапщытэ, фIагъышхуэ яIэу къагупсысагъащIэхэр хэпщэнымкIэ IэнатIэхэм ядоIэпыкъу, псыуэ, токыу къагъэсэбэпым я бжыгъэр къызэралъытэ, коммунальнэ Iуэхутхьэбзэхэм хуэзэр къызэрапщытэ иджырей Iэмэпсымэхэм я зехьэкIэм республикэм и цIыхухэр щагъэгъуазэ. 

 А Iэмэпсымэхэм я гъэлэжьэкIэ-щытыкIэр, я гъэпсыкIэр зыхуэдэм хуей дэтхэнэри зы махуэм къриубыдэу тыншу щыкIэлъагъэплъыфынущ зи гугъу тщIы а къудамэм. Абы и IэщIагъэлIхэм зыхуеину псори яIэщи, зэрызэхуагъакIуэ Iэмалхэр нэгъэсауэ къагъэсэбэп. ЕрыскъыхэкIхэм, щIыдагъэхэкIхэм я фIагъыр къыщапщытэ, электротехникэмрэ радиацэмрэ щакIэлъыплъ лабораторэхэр яIэщи, Къэбэрдей-Балъкъэрым и Правительствэм, къалэ, район администрацэхэм, Iуэхур зэхьэлIа министерствэхэм, федеральнэ кIэлъыплъакIуэ IэнатIэхэм купщIафIэу ядолажьэ.

Республикэм и предприятэхэм, организацэхэм ящыщу лэжьыгъэрэ Iуэхутхьэбзэрэ зыгъэзащIэхэм зыщагъэгъупщэн хуейкъым я IэдакъэщIэкIхэр къызэрапщытэ пщалъэхэм мы зэманым мыхьэнэ ин дыдэ зэраIэр, абыхэм продукцэм и фIагъым зэрыхагъахъуэр, ауэ щыхъукIи, фейдэ нэхъыби къазэрыпэкIуэр. Сыту жыпIэмэ, ГОСТ-м тету ягъэхьэзыра продукцэр нэхъыфIщи, тыкуэным щIыхьэ цIыхур псом япэу зэплъыр къищэхур пщалъэм къызэритIасэрщ. 

Республикэм и IэщIагъэлIхэм ящыщу стандартизацэм и IэнатIэм пэрытхэм Пщалъэхэм я дунейпсо махуэмкIэ дохъуэхъу, узыншагъэ быдэ яIэну, я Iуэхухэмрэ я мурадхэмрэ къайхъулIэну, я лэжьыгъэм купщIафIэу дяпэкIи пэрытыну!