Гъ
Сыт къэхъуми, къэунэхуми зи Iэмырыр Тхьэшхуэрщ. Псори къэзыгъэщIыр Аращ. Къэхъугъэ дэтхэнэри игъапцIэурэ, игъахъэурэ, игъэпсурэ, игъэшурэ, игъэжурэ, игъэхъуурэ, игъафIэурэ егъащIэ. Нысэ къашагъащIэр ягъафIэ. Ар гъатхэм и гъагъэщ, гъэмахуэм и хуабэщ, бжьыхьэм и бэвыгъэщ, щIымахуэм и гъэфIагъыбзэщ. ГъащIэм жьыгъэр куэдрэ зыхуэмыкIуэн фыхъуну сыфхуотыгъэ!
Дж
Дунейм сыт къыщыхъуми, къыщыщIэми, къыщыунэхуми, къыщагупсысми, зэхэджэ-зэхэпцIэурэ мэдж, маджэ, мэигъуэджэ, мэджэгу. Псори джэгущ, джэгуакIуэхэри куэдыщэ хъуахэщ. Хэти гъащIэм джэгуакIуэ ещI, хэти утыкум и джэгу щещIыж. Куэдым фIыуэ ялъагъу джэгу щIыныр, уджу къеуджэкIыныр. Джэгур уджым хуэкIуэмэ, уджым уитщ, уджыр пхэтщ, бджыр уджщ, уджым уедж, уоуджэраджэ.
Жь
Сыт къэхъуми, къэщIми къежьапIэ хуэхъур, псори зи лэжьыгъэри, абы Iэужь хуэхъури Алыхьырщ. Жылэ-жылэурэ зэхэлъ гъащIэр мэтыгъэ, мэщыгъэри псори зэщIэжьыуэу къожьэ. Жьы жылэр, мафIэ жылэр, псы жылэр зэдэумэ - мэлъабжьэ, мэгъащIэри, дахагъэм гъащIэр поджэ. ГъащIэм и лъабжьэр жьыщ, зэрызиужьри ныбжькIэщ.
Н
ЩыIэри, щыIари, щыIэнури зи IэмыщIэ илъыр ди Тхьэрщ. Ди Тхьэу Тхьэшхуэм къигъэунэхур нэрынэ-нэрынэу, нэхунэ-нэхунэу, пкъынэ-лынэу, налъэ-налъэу дэнэ лъэныкъуэкIи щызэщIолыдэ, гъуни-нэзи имыIэу. Нэхугъэм хэпсэухь дэтхэнэми нурыр и Iэпэгъущ. Нурыр зи нэгу кърихым напэ иIэщ. Напэр адыгэм дежкIэ гъащIэщ. ГъащIэр къыдэзыта Тхьэшхуэм и пащхьэ напэ хужьу деукIуэлIэж! Амин!
П
Хьэрфхэм сариджэгуну, садэджэгуну сфIэфIщ. НобэкIэ си джэгуэгъур «П»-щ.
Пэ, Iэпэ, лъапэ, напэ.
Тхьэшхуэр закъуэщ. Зым псори къыщигъэщIкIэ, дэтхэнэ зыри зэпэщу, зэпымыууэ мэпс, мэплъ, мэпщытэ, мэбатэ, мэятэ. Псори зэщIопсыпсэ, мапсэ, маплъэ. Псэм къыхэкIа, къигъэщIа дэтхэнэ зы Iуэхугъуэми псыпэу зыкърешажьэ. Пэублэ зиIэ хъуам псапэ ищIапхъэщ, напэ иIапхъэщ, гуапэу щытыпхъэщ.
С
Жьы жылэр, мафIэ жылэр, псы жылэр зэдэумэ, мэпс, мэпсэу. ЖаIэр пэжмэ, дыгъэр къепсщ, псым хэпсэри - псэр къэхъуащ. Зи псэр езэшам и дунейр хьэлъэщ. Псэр тыгъэн хуейщ. Абы плъыфэу иIэр мыкIуэщIщ. Куэдыр мыарэзыми, псэр мэхъуапсэ, мэгупсысэ, мэпсалъэ.
У
ЩыIэри, щыIари, щыIэнури къызэрыхъур жьы, псы, мафIэ жылэхэмкIэщ. Жьы жылэр, мафIэ жылэр, псы жылэр зэдэумэ - мэублэ, мэузэщI, мэухуэ, мэуджри - гъащIэм зыкъеузэщI. ФIыгъуэм пэджэр къоуджэрэкI, фыгъуэм и гъащIэм дахагъэр щеух. Ухыныгъэм хуэкIуэ дэтхэнэми кIасэIуэущ къыщыдгурыIуэр Алыхьым дызэриIуэхутхьэбзащIэр.
Х
НобэкIэ джэгуэгъу схуэхъуар хьэрф Х-щ. Псалъэ куэдым мы хьэрфыр курых яхуохъу. Ар зэми псалъэм и пэщIэдзэу зыкъызегъэлъагъу, адрейхэми псалъэкур и жьантIэщ, псалъэкIэр къыщылъыси къохъу. Мы хьэрфыр щытлъагъу псори зэхэт-зэхэлъщ. Зэхэт-зэхэлъыр зэкIуэцIох, зэхохьэ, зэходжэ, зэхопцIэ, зэхопщэ, зэхопсэ, зэхохьэ, зэхокI. Зэхыхьар и хабзэ тетыжщ мыухэу, мыужьыхэу.
Ц
Цы, цыбэ, щхьэц...
Цы къызытекIэ псэущхьэм и цы лъабжьэр цыбэщ. Iэпкълъэпкъым сыт къыщекIуэкIми, къекIуэкIыкIэр цыбэм цырыцу щызэхэпцIэурэ цы налъэ кIуэцIым щызэхоухуанэ, щызэхошэ, щэхухэр егъэш, къреш.
Цы налъэм сыт имыныбжьми, зэхэша-зэхэухуэнахэр куэдым къагъэсэбэп. Щэхухэр щызэхэухуэна цыр удхэм ягъэхьэпэщыпхэ. ЦыкIэ япха цIыхум и хуитыныгъэр удым и IэмыщIэ ирелъхьэ. Цым хэлъ щэхухэр фIыуэ зыщIэр алмэстыхэр арат. Абыхэм я щхьэцхэр кIыхьт. Си анэшхуэм зэрыжиIэжамкIи, псы цIыкIу ежэхым нэху щыху пэрыст, щхьэцыр яжьу, яхущIу, кIэлъыплъу.
Къаруушхуэ цым зэриIэм и щыхьэтщ а алмэстыхэм я цы налъэ ямыгъэкIуэду зэрыщытар. Абыхэм я щхьэц зыIэрыхьа цIыхум алмэстыхэр яхуэжыIэщIэт. ЦIыхухэм ар хуабжьу ягъэпщкIурт, армырамэ, цыр зейм къигъуэтмэ, ар зыгъэпщкIуам гъащIэ иIэтэкъым.
