Щэнхабзэ IуэхущIапIэхэр зрагъэлъагъу

Мы махуэхэм Къэбэрдей-Балъкъэрым лэжьыгъэ IуэхукIэ щыIащ Урысей Федерацэм щэнхабзэмкIэ и министр Любимовэ Ольгэ. Абы зригъэлъэгъуащ республикэм и щэнхабзэ IуэхущIапIэхэр. Ап­хуэдэу зыщигъэгъуэзащ Нартан дэт ЩэнхабзэмкIэ унэм, Къэбэрдей, Балъкъэр къэ­­рал драмэ театрхэм, Театрхэм я уардэунэ яухуэм, Гъуазджэ­хэмкIэ Кавказ Ищхъэрэ къэ­рал институтым щекIуэкI лэ­жьыгъэхэм.

Министрым къыхигъэщащ институтым хэт «Арт-идея» центрым къалэнышхуэ зэригъэзащIэр. «Щэнхабзэ проект гъэ­щIэгъуэнхэр гъэхьэзырынымкIэ, ахэр пхыгъэкIынымкIэ ар утыку хъарзынэщ, - жиIащ абы. – НаIуэщ мыбдеж къэралым, щIыналъэм я щэнхабзэ щIэи­ныр хъумэнымрэ зегъэу­жьы­нымкIэ Iуэху щхьэпэхэр зэры­щызэфIахыр, къищы­нэ­мы­щIауэ, щIалэгъуалэм иджы­рей творческэ Iэмалхэмрэ технологиехэмрэ къагъэсэбэпу я зэ­фIэкIым зэрызрагъэужьын псо­­ри центрым зэрыщагъуэтынур».
КIуэкIуэ Казбекрэ Любимовэ Ольгэрэ я зэIущIэр теухуауэ щытащ республикэм и щэнхабзэм зиужьынымкIэ щыIэ хэ­кIы­пIэхэмрэ «Щэнхабзэ» лъэпкъ проектыр щIыналъэм зэрыщагъэзащIэмрэ. Республикэм и Iэтащхьэм къыхигъэщащ УФ-м и Президент Путин Владимир и жэрдэмкIэ къыхалъхьа лъэпкъ проектым и фIыгъэкIэ щIыналъэм и щэнхабзэ IуэхущIапIэхэм я мылъку-техникэ лъабжьэр хъарзынэу зэрырагъэ­фIэ­кIуар, творческэ гупхэми нэхъ жыджэру заужьын зэры­щIадзар. 
Къапщтэмэ, мы гъэм Налшык къыщызэIуахащ Щэнхабзэ зыужьыныгъэмкIэ центр, Уэз­рэдж, Терекскэ, Приближнэ, Ислъэмей къуажэхэм дэт щэнхабзэмкIэ унэхэр, Налшык къалэм и Сабий художественнэ школыр,  Къэзанокъуэ Жэбагъы и цIэр зезыхьэ, Гъуазджэ­хэмкIэ художественнэ школ №2-м зэгъэпэщыжыныгъэхэр щрагъэкIуэкIынущ, щIыналъэ­хэм щыIэ библиотекэхэмрэ музейхэмрэ зыхуэныкъуэ хьэп­шып­хэмкIэ къызэрагъэпэщынущ. Нэгъабэ сыт и лъэны­къуэкIи зыхуей хуагъэзэжащ НыбжьыщIэ театрыр, Дыгулыбгъуей, Ташлы-Тала, Къамылыкъуэ, Александровскэ жыла­гъуэ­хэм дэт щэнхабзэмкIэ ­унэ­хэр, Аруан къуажэм щэн­хабзэм­кIэ и центрыр, Налшык къа­лэмрэ Анзорей къуажэмрэ гъуазджэ­хэмкIэ я сабий школхэр. 
Иужьрей илъэситхум республикэм щаухуащ икIи щызэ­рагъэпэщыжащ щэнхабзэмкIэ унэу 27-рэ, модельнэ библиотекэу 8 къызэрагъэпэщащ, зы­хуей хуагъэзэжащ, зыхуэны­къуэ хьэпшыпхэмрэ Iэмэпсы­мэ­хэмкIэ яузэдащ гъуазджэ­хэм­кIэ сабий школу 17, Ныб­жьыщIэхэм я театрыр, Гуа­щэ театрыр, щIыналъэхэм яIэ­ры­хьащ автоклубу 8.
ЩIыналъэм и Iэтащхьэм гулъытэ нэхъ хуищIу къытеувы­Iащ щэнхабзэм и лэжьа­кIуэхэм я улахуэм, абыхэм ягъуэт дэIэпыкъуныгъэхэм. КIуэкIуэ Казбек министрым жриIащ иужьрей илъэсищым республикэм и бюджет IэнатIэм, щэнхабзэ IуэхущIапIэхэри хэту, я лэ­жьакIуэхэм я улахуэр илъэс къэс проценти 10-кIэ зэрыха­гъахъуэр. Апхуэдэу къыхигъэщащ нэгъабэ и кIэухымрэ мы гъэм и пэщIэдзэмрэ щэнхабзэмрэ гъуазджэмрэ я лэжьа­кIуэхэм ират грантхэмрэ стипендиехэмрэ хуэдитIкIэ зэрыхэхъуар, апхуэдэуи творческэ проектхэр дэIыгъынми мылъку щхьэхуэ зэрыхухахар икIи дыщIигъужащ абыхэм хуэфащэ гулъытэ ягъуэтынымкIэ дя­пэкIи лэжьыгъэ пыухыкIахэр зэрырагъэкIуэкIынур. 
«Республикэм игъуэта щэнхабзэ зыужьыныгъэхэр, абы и цIыхухэм ябгъэдэлъ творческэ зэфIэкIхэм хэгъэхъуэнымкIэ щы­тыкIэщIэхэр щыIэ зэры­хъуар Къэбэрдей-Балъкъэрым и унафэщIхэмрэ УФ-м ЩэнхабзэмкIэ и министерствэмрэ я зэдэлэжьэныгъэ купщIафIэм къыпэкIуащ, - жиIащ Любимовэ Ольгэ. – Республикэм щэнхабзэ зэфIэкIышхуэ бгъэ­дэлъщ, абы и лъэныкъуэкIэ щIыналъэм иIэ хъугъуэфIы­гъуэ, щIэин телъыджэм цIыху нэхъыбэ зэрыщыдгъэгъуэзэ­ным дыхущIэкъунущ. ИджыпстукIэ дэ гулъытэ нэхъыбэ яхудощI ­къуажэхэмрэ къалэ цIыкIу­хэмрэ. Абыхэм щы­Iэ щэнхабзэмкIэ унэхэр къэ­гъэ­щIэ­рэ­щIэжынымкIэ программэр ­хъарзынэу ягъэзащIэ. А жылагъуэхэм щыпсэухэр щэнхабзэ зэхыхьэхэм жыджэру зэ­ры­хэтым къищынэмыщIауэ, ап­хуэдэ зэхыхьэхэр къы­щы­зэрагъэпэщкIи дэIэпыкъуэ­гъушхуэ яхуохъу. ЦIыкIу щIыкIэ сабийхэр щэнхабзэм, гъуазджэм дебгъэхьэхмэ, ар я гъащIэм хэту къэгъуэгурыкIуэнущ, ап­хуэдэ цIыхухэри жылагъуэм нэхъ тыншу хэзэгъэнущ».
Министрым къыхигъэщащ илъэгъуахэм арэзы къы­зэ­рищIар икIи къыхигъэщащ ди щIыналъэм и дахагъэм, ди лъэпкъ макъамэхэмрэ къафэ­хэмрэ зэрыдихьэхыр. КIуэкIуэ Казбек Любимовэ Ольгэ фIы­щIэ хуищIащ ди щIыналъэм къызэреблэгъам, жылагъуэр егъэфIэкIуэным хуэунэтIа щэнхабзэ хъугъуэфIыгъуэхэр абы щыхъумэным, а лъапIэныгъэхэм зыщегъэужьыным теухуа Iуэхухэм гулъытэ зэры­хуищIым папщIэ.

Сурэтхэр Къарей Элинэ трихащ.