Тхьэшхуэм и къарур инщ

23 октября, 2023 - 10:44
Марк лышх узыфэхэр зыпкърытхэм еIэзэ дохутырт, и IэщIагъэми фIыуэ хищIыкIырт. Зэгуэрым ар гъуэгу теуващ, зэIущIэшхуэ гуэрым хэтын мурадкIэ. Абы щIалэм къыщыпэплъэрт и лэжьыгъэфIым папщIэ къыхуагъэфэща медицинэ саугъэт лъапIэр. Арати, кхъухьлъатэм ису гъуэгу здытетым, кхъухьлъатэм сэкъат гуэрхэр игъуэтри, ар здэкIуэм нэмыс щIыкIэ щIым къэмытIысу хъуакъым. 
Дохутырыр апхуэдизкIэ пIащIэрти, а къыщытIыса щIыпIэм деж автомобиль бэджэнду къыщищтэри, и гъуэгум пищэжащ. АрщхьэкIэ, жыжьэ нэсакъым: дунейр къызэIыхьэщ, уэ хэту уэлбанэшхуэм щIидзэри, и гъуэгум тегъуэщыкIащ. Интернетым пыдзауэ лажьэ, уздэкIуэ щIыпIэм хуэкIуэ гъуэгур уэзыгъэлъагъу гуэдзэным щигъауэри, нэгъуэщI щIыпIэкIэ ириIуэнтIэкIащ. 
Ешарэ-елIауэ, зэрыжаIэу, къару имыIэж щыхъум, мурад ищIащ здынэсам деж къыщыувыIэну. ИкIи жыжьэ мыкIуэу зы унэ цIыкIу гуэрым и куэбжэпэм машинэр абы ирихулIащ. Куэбжэр цIыхубз гуэрым къыIуихри къыдэкIащ. Дохутыр щIалэм Iуэхур зыIутыр унэгуащэм жриIащ икIи елъэIуащ абы и телефонымкIэ ирипсэлъэну хуит къищIыну. 
ЦIыхубзым телефон иIэтэкъым, ауэ щIалэм и теплъэр щилъагъум ар унэм щIишащ зригъэгъэгъущыжыну, дунейри зэтеувэжыхукIэ щIигъэсыну. Марк, мэжэлIат икIи ешати, зыри жимыIэу щIыхьащ.
Марк шей пщтыр къыхутригъэувэри, цIыхубзыр нэгъуэщI пэшымкIэ щIыхьащ Тхьэ елъэIуну. ЩIалэр хуэмурэ абы хукъуэплъырт, цIыхубзыр сабий гъуэлъыпIэ цIыкIум щхьэщыту зыгуэрхэр къызэриIущэщри илъагъурт. ЩIалэм къыгурыIуащ ар зыгуэрым зэрытегузэвыхьыр, дэIэпыкъуэгъуи зэрыхуэныкъуэр.
- Сыт уэ Тхьэшхуэм ущIелъэIур? Уи лъэIур Тхьэм зэхихынкIэ угугъэу ара? - жриIащ абы цIыхубзым.
ЦIыхубзым, нэщхъейуэ къыпыгуфIыкIри, жэуап къитыжащ:
- Иджыпсту мы пIэм хэлъ си щIалэ цIыкIум лышх узыфэ бзаджэ пкърытщ икIи ар зыгъэхъужыфыну дунейм тетыр зы дохутыр закъуэщ, абы и цIэр Маркщ, ауэ ар нэгъуэщI къалэм щопсэу. Тхьэшхуэм махуэ къэс солъэIу абы сыIуигъэщIэну икIи си фIэщ мэхъу абы сызэрызэхихынур икIи ар къызэрыздэIэпыкъунур. Тхьэшхуэм хузиIэ фIэщхъуныгъэр къызэпызыудыфын дунейм теткъым.
ЦIыхубзым и псалъэхэр зэхэзыха Марк Iэнкун къэхъуащ икIи и нэпсхэри къекIуащ. 
- Ярэби, сыту ин Тхьэшхуэм и къарур, - жиIащ абы игукIэ.
Марк и нэгу къыщIигъэхьэжащ пщэдджыжьыпэм щыщIэдзауэ нобэ хьэлэбэлыкъыу ар зыхэхуа псори: зэIущIэм ежьауэ здэкIуэм зэрыса кхъухьлъатэм и моторыр зэрыкъутар, уэлбанэшхуэ къэхъуу и гъуэгум зэрытегъуэщыкIар, икIэм-икIэжым, зыщIэс унагъуэм къызэрыщыхутар. Ар псори къэхъуат Тхьэшхуэм и IэмыркIэ. Тхьэшхуэм цIыхубзым и лъэIур зэхихри, дэIэпыкъуэгъур и унэ къришэлIат.
Зыгъэхьэзырар БАТОКЪУЭ Албэчщ.
  • 49 просмотров
Поделиться: