ЦIыхубэм ягу дыхьа усакIуэ

Адыгэ усакIуэ, тхакIуэ, зэдзэкIакIуэ Семэн Руслан къызэралъхурэ фокIадэм илъэс 75-рэ ирикъуащ.

XX лIэщIыгъуэм и 70 гъэхэм тхэн щIэзыдза Семэн Руслан и IэдакъэщIэкIхэр цIыхубэм ягу дыхьащ. Апхуэдэхэщ «Улица звёзд» (1970) и япэ усэ тхылъыр, абы къыкIэлъыкIуа «Крона» (1974), «Футбол в зоопарке» (1976), «Стихи» (1983) усэ тхылъхэр. Семэным итхащ и ныбжьэгъухэм, и лэжьэгъу усакIуэхэм, адэм хуэгъэза, гъуазджэм, щэнхабзэм я мыхьэнэм теухуа усэхэр. И Iэдакъэ къыщIэкIащ  балладэхэр, элегиехэр, поэмэхэр, пьесэхэр, романсхэр. Адыгэ псалъэжьхэмрэ псынщIэрыпсалъэхэмрэ зэдзэкIынми хэлъхьэныгъэфI хуищIащ. Руслан усакIуэу ар икIи сурэтыщI Iэзэт.

Филологие щIэныгъэхэмкIэ доктор, профессор ЩоджэнцIыкIу Нинэ 2002 гъэм итха «Лабиринты текста» монографием щызэпкърихащ Семэн Руслан и IэдакъэщIэкIхэр. УсакIуэм и усэ тхылъхэм хуатха рецензэхэр мызэ-мытIэу къытехуащ «Кабардино-Балкарская правда», «Адыгэ псалъэ» газетхэм. Ахэр я IэдакъэщIэкIт Мусукаевэ Анжелэ  («Поэзия адыгской мысли»),    Тереховэ Иринэ  («Я среди людей на свете жил»),   Тхьэгъэзит Зубер  «Уи макъыр зэхызох», IутIыж борис  («Ранимое сердце») сымэ.    КъищынэмыщIауэ, усакIуэм и гъащIэмрэ гуащIэмрэ теухуауэ Кумыщ Риммэ, Куэшбей Жамболэт, Куяенцевэ Еленэ, Моттаевэ Светланэ сымэ ятха тхыгъэхэр газетхэм къытрадзащ. Семэн Жаннэ (усакIуэм и шыпхъум) 2008 гъэм къыдигъэкIа «Руслан Семенов: «Пришел поклониться вам.» Жизнь и творчество»  тхылъым ихуащ ХьэфIыцIэ Мухьэмэд, Чипчиков Борис, ЩоджэнцIыкIу Нинэ, Мусукаевэ Анжелэ сымэ усакIуэм и гъащIэмрэ гуащIэмрэ теухуа я тхыгъэхэр.

Семэн Руслан 1985 гъэм дунейм ехыжами, и вагъуэр ноби маблэ. Ар дунейм ехыжа нэужь, къыдагъэкIащ «Уроки совести» (1991), «Кабардинские изречения» (1999) и тхылъхэр. И щIэинхэм ноби щIэупщIэ яIэу зэIэпах.

ТЕКIУЖЬ Заретэ.