ЩэнхабзэмкIэ фонд Вэрокъуэ Владимир и цIэр зезыхьэм фэеплъ пшыхь щекIуэкIащ. Ар теухуауэ щытащ Дагъыстэным и цIыхубэ усакIуэ, тхакIуэ, зэдзэкIакIуэ, публицист цIэрыIуэ, жылагъуэ, политикэ лэжьакIуэ, Социалист Лэжьыгъэм и ЛIыхъужь, Сталиным, Лениным, Горькэм я саугъэтхэр зыхуагъэфэща Гамзатов Расул къызэралъхурэ илъэси 100 зэрырикъум. Зэхыхьэр къызэригъэпэщащ «Дагъыстэн» лъэпкъ щэнхабзэ центрым, КьБР-м и Правительствэмрэ республикэм Лъэпкъ Iуэхухэмрэ жылагъуэ проектхэмкIэ и министерствэмрэ я лэжьакIуэхэр и дэIэпыкъуэгъуу.
Пшыхьым ирагъэблэгъащ Къэбэрдей-Балъкъэрымрэ Дагъыстэнымрэ я жылагъуэ зэгухьэныгъэхэмрэ щэнхабзэ центрхэмрэ я лIыкIуэхэр, щIыналъэм и унафэщIхэр, щэнхабзэмрэ гъуазджэмрэ я цIыхухэр, республикитIым я курыт школхэм я егъэджакIуэхэмрэ еджакIуэхэмрэ, жылагъуэ лэжьакIуэхэр.
«Дагъыстэн» щэнхабзэ центрым и унафэщI Сурхайханов Ибрэхьим пшыхьыр къыщызэIуихым жиIащ Гамзатов Расул усакIуэ къудей мыхъуу, зи Хэкур фIыуэ зылъагъу цIыху пажэу зэрыщытар.
- КъБР-м ЩэнхабзэмкIэ и фондым и хабзэ дахэхэм зэрыпищэр узыгъэгуфIэщ! Пшыхьыр траухуащ зи щIэинхэр, усэ купщIафIэхэр иджыри илъэс куэдкIэ зэIэпахыну Гамзатов Расул, - жиIащ КъБР-м лъэпкъ Iуэхухэмрэ жылагъуэ проектхэмкIэ и министр КIурашын Андзор. – УсакIуэр къызэралъхурэ илъэси 100 зэрырикъур Москва фокIадэм щагъэлъэпIащ.
КIурашыным «Дагъыстэн» лъэпкъ щэнхабзэ центрым мыхьэнэшхуэ зэриIэр къыхигъэщащ икIи абы и лэжьакIуэ зыбжанэм щIыхь, фIыщIэ тхылъхэр яритащ, лъэпкъ зэхущытыкIэхэр егъэфIэкIуэным хэлъхьэныгъэ зэрыхуащIым папщIэ.
Дохутыр, къалэм и щIыпIэ самоуправленэм и депутат КIыщокъуэ Руслан пшыхьым зыкърезыгъэхьэлIахэм ядэгуэшащ Переделкинэ щыIэу Гамзатов Расул хуэзауэ зэрыщытам теухуа и гукъэкIыжхэмкIэ икIи «Дагъыстэн» центрым тыгъэ яхуищIащ ЩIэныгъэхэмкIэ дунейпсо Адыгэ академием къыбгъэдэкI тхылъхэр.
Художник Сурхайханов Ибрэхьим къытеувыIащ Гамзатовым и юбилейм ирихьэлIэу усакIуэм и бюстыр зэрищIам.
Азербайджанхэм я лъэпкъ щэнхабзэ центрым и унафэщI Дадашев Алий тепсэлъыхьащ Гамзатов Расул я щIыналъэм пыщIэныгъэшхуэ зэрыхуиIам, азербайджан усакIуэхэр игъэныбжьэгъуу къызэрекIуэкIам.
Апхуэдэу усакIуэр ягу къагъэкIыжащ ермэлыхэм, белорусхэм я лъэпкъ щэнхабзэ центрхэм я унафэщIхэу Погосян Артуррэ Сидорук Павелрэ. «Сябры» центрым къыбгъэдэкIыу «Дагъыстэн» центрым тыгъэ хуащIащ КПРФ-м и «100 лет СССР» медалыр. «Дети войны» IуэхущIапIэм и къалэ къудамэм и унафэщI Ульбашевэ Светланэ зауэм пхыкIа нэхъыжьхэм яритащ «Дети войны» медалыр.
Зэхыхьэм хэтахэр тепсэлъыхьащ усэм лъэпкъхэр зэпищIэу къызэрекIуэкIым. Абы и щапхъэу къахьащ, Кавказ Ищхъэрэм и мызакъуэу, дуней псом цIэрыIуэ щыхъуа, Къэбэрдей-Балъкъэрымрэ Дагъыстэнымрэ ис лъэпкъхэм я бзэхэмкIэ зи усэхэр зэрадзэкIахэу Гамзатов Расул, КIыщокъуэ Алим, Кулиев Къайсын сымэ яку дэлъа зэныбжьэгъугъэр. КърихьэлIахэр ирагъэдэIуащ Гамзатов Расул и псалъэхэр зыщIэлъ «Журавли» уэрэдым.
