КIэкъинэми - гулъытэ

15 ноября, 2023 - 13:42
ЩэкIуэгъуэм и 15-р КIэрыхубжьэрыхухэм хэлэжьыхьыжыным (рециклинг) и дунейпсо махуэщ. 
Зи гугъу тщIы Iуэхур зыхуэгъэзар кIэрыхубжьэрыхухэр щIэрыщIэу къэгъэсэбэпыжыным ехьэлIа лэжьыгъэм къэрал къулыкъущIэхэм, жылагъуэм, апхуэдэуи промышленностым пыщIа къулыкъущIэхэм гулъытэ хэха хуегъэщIынырщ. 
Къэрал куэдым зы илъэс къэмынэу щэкIуэгъуэм и 15-м щрагъэкIуэкI кIэрыхубжьэрыхухэм хьэпшыпыщIэхэр къахэпщIыкI зэрыхъунур нэрылъагъу къыпщызыщI гъэлъэгъуэныгъэхэр, дыкъэзыухъуреихь дунейм щысхьын, щIыуэпсым хуэсакъын зэрыхуейм гупсысэр хуэзышэ концертхэр, псапэ зыпылъ Iуэхухэр.   
Зи гугъу тщIы махуэм щIэдзапIэ хуэхъуауэ къабжар США-м 1997 гъэм щэкIуэгъуэм и 15-м щызэхаубла Iуэхугъуэрщ – абы щыгъуэщ а къэралым япэ дыдэу щыщекIуэкIар кIэрыхубжьэрыхухэм щыхэлэжьыхьыжа щIыхьэхушхуэу щIыуэпс и лъэныкъуэкIэ мыхьэнэ ин дыдэ зиIэу къалъытар. Абы иужькIэ а махуэр къэрал куэдым ягъэлъапIэу хуежьащ. 
ЖыпIэнур арамэ, кIэрыхубжьэрыхум зэбгъэзэхуэж, уеблэмэ хьэпшыпыщIэхэр къахэпIущIыкIыж зэрыхъунум ди адэжьхэри егупсысу щытащ. Жыжьащэ дымыIэбэу къыхэдгъэщынщи, дыщыпсэуа къэрал абрагъуэу СССР-ми щрагъэкIуэкIырт нэхъыщIэ цIыкIухэр, зэрыщыту къатщтэмэ, жылагъуэр къызэщIэзыубыдэ Iуэхугъуэ дахэу тхылъымпIэжьхэмрэ гъущIхэкI кIэрыхубжьэрыхухэмрэ щызэхуахьэсыж щIыхьэхухэр. 
 
КIэрыхубжьэрыхухэм хэлэжьыхьыжын Iуэхур къезыхьэжьахэм псом япэу дыкъызыхураджэр - щIыуэпсым и хъугъуэфIыгъуэу дыкъэзыухъуреихьыр, зэрымыщIэншэм къыхэкIыу, къэдгъэсэбэпам щIэрыщIэу хьэпшыпыщIэхэр къахэпIущIыкI зэрыхъунум, апхуэдэхэм уасэ нэхъ мащIэ зэраIэнум, Iэгъуэблагъэм етх лейр, етщIылIэ хэщIыныгъэр зэрыдгъэмэщIэным цIыхухэм я акъылыр теухуэнырщ.  
Ди планетэм и щхьэфэм и иджырей щытыкIэм и гугъу тщIымэ, икъукIэ дызыгъэгузавэщ кIэрыхубжьэрыхуу щызэтрихьэр, дыщIигъэнэн хуэдизу, кIуэ пэтми нэхъыбэ зэрыхъур. Зи гугъу тщIым иужьрей илъэсхэм нэхъри дызыхуишэ тхьэмыщкIагъэхэм ящыщщ щIэныгъэлIхэм щIэх-щIэхыурэ зи цIэ къраIуэ «бахъалъэ эффекткIэ» («парниковый эффект») зэджэри. 
ЩIы Хъурейм къэдгъэсэбэп хъуну и хъугъуэфIыгъуэхэр щысхьыншэу зэрыдгъэкIуэщIым и «фIыгъэкIэ», щIыуэпсым дызэригъэгуфIэфыну бгъэдэлъа и гъэтIылъыгъэхэм я Iыхьэ щанэм, щIэныгъэлIхэм къызэрабжамкIэ, гъазэ имыIэу дыпыкIащ.
А гупсысэхэрщ дахуэзышэр щIым къыщIэтх, псым къыдит хъугъуэфIыгъуэхэр, егъэлеиныгъэ хэмылъу, зэдгъэзэхуэн зэрыхуейми, кIэкъинэхэм, бгъэдыхьэкIэ тэмэм къахуэдгъуэту, хьэпшыпыщIэхэр къахэтщIыкI зэрыхъунуми. 
КЪУМАХУЭ Аслъэн.
  • 45 просмотров
Поделиться:

Читать также:

27.04.2024 - 09:56 → НОБЭ
25.04.2024 - 09:00 → НОБЭ
24.04.2024 - 13:21 → ЩIым и махуэ
24.04.2024 - 11:43 → НОБЭ
23.04.2024 - 09:45 → НОБЭ