«Тхылъхэр – саугъэт папщIэу»А фIэщыгъэм щIэт псапэ Iуэху щекIуэкIащ нэфхэм папщIэ республикэм щылажьэ библиотекэм. Тхылъеджэ ныбжьыщIэхэм тхылъхэр тыгъэ хуащIащ «РусГидро» IуэхущIапIэм и къудамэу ди щIыналъэм щыIэм и лэжьакIуэхэм. Iуэху дахэр къызэрагъэпэщащ Гуапагъэм и дунейпсо махуэм и щIыхькIэ. Библиотекэм и гъэтIылъыгъэхэм хагъэхъуащ «Путешествие по странам и континентам», «Сказки народов России» тхылъхэмкIэ. НыбжьыщIэхэм а тхылъхэр сэбэп яхуэхъунущ дунейм щыпсэу лъэпкъхэм я щэнхабзэмрэ IуэрыIуатэмрэ зыхагъэгъуэзэнымкIэ. Тхылъхэм ящIыгъущ зэрыджэгу, акъылыр зыгъэлажьэ лэжьыгъэхэр, тхылъхэм къыщыхьа кодхэр, тхыгъэхэмрэ макъамэхэмрэ къызэIузых «Волшебный карандаш» электрон Iэмэпсымэхэр. Зи нэм сэкъат иIэ цIыкIухэм я дежкIэ ахэр щхьэпэщ. - Ди сабийхэми дэри тфIэгъэщIэгъуэну а тхылъхэмкIэ дылэжьэнущ. Апхуэдэ сабий литературэр куэд хъуркъым. Ди тхылъеджэ ныбжьыщIэхэм а къыдэкIыгъуэхэр ягу дыхьэну сыщогугъ, - жиIащ библиотекэм и унафэщI Хьэмдэхъу Жаннэ. «РусГидро» IуэхущIапIэр «Иллюстрированные книжки для маленьких слепых детей» псапэ фондым и гъусэу илъэс 16 хъуауэ хэтщ «Тхылъхэр - саугъэт папщIэу» псапэ Iуэхум. Къэбгъэлъагъуэмэ, мы гъэм Гуапагъэм и дунейпсо махуэм ирихьэлIэу, Урысейм и щIыналъэ 21-м, Волгоград щыщIэдзауэ Камчаткэм нэс, а IуэхущIапIэм яхуригъэшащ зи нэм сэкъат иIэ сабийхэм я зыужьыныгъэмрэ щIэныгъэмрэ зэрыхагъэхъуэну тхылъ зэгъэуIуауэ 272-рэ. КъыдэкIыгъуэхэр тыкуэнхэм щащэркъым, атIэ пщIэншэу зэбграгъэкI, псапащIэхэмрэ хьэрычэтыщIэхэмрэ я фIыгъэкIэ. «РусГидро» IуэхущIапIэр щылажьэ щIыналъэхэм исхэм я гъащIэр ирагъэфIэкIуэн мурадкIэ, псапэ Iуэхухэм жыджэру хэтщ, егъэджэныгъэ, узыншагъэ, спорт, щэнхабзэ, щIыуэпсыр хъумэн, зи Iуэху хуэмыщIахэм ядэIэпыкъун, щIыналъэхэм зегъэужьын жыпIэми, гъащIэм и лъэныкъуэ куэд къызэщIиубыдэу.
Поделиться:
Читать также:
28.04.2024 - 13:01 →
Архитекторхэм я зэфIэкIхэр
28.04.2024 - 11:59 →
Пэрыт увыпIэр адэкIи иIыгъынущ
28.04.2024 - 10:57 →
ПсэупIэщIэхэр - гуфIэгъуэ щIыкIэм тету
27.04.2024 - 11:00 →
Сом мелуанитхум щIигъу
26.04.2024 - 15:42 →
Фэеплъ жыг хадэхэр ягъэтIысынущ
|