ЛэжьакIуэ зэрахуримыкъум къыхэкIыу

Зы IэнатIэм пэрыту лэжьыгъэ зыбжанэ зэуэ зыгъэзэщIэфынухэм нэхъыбэу щыхуэныкъуэщ щэнхабзэмрэ гъуазджэмрэ, псэупIэ-коммунальнэ хозяйствэхэм, егъэджэныгъэм, ухуэныгъэм, финансым, мэкъумэшым, хьэщIэщым, шхапIэм, мэзым, пхъэм елэжьыным пыщIа IуэхущIапIэхэм. 

ЛэжьакIуэхэм щIэныгъэфI яIэн зэрыхуейм къыдэкIуэу, бэшэчу, зэпIэзэрыту, шыIэныгъэ яхэлъу, цIыху хэтыкIэ ящIэу щытыпхъэщ. Иджырей щытыкIэр къызыхэкIар лэжьакIуэхэр къэралым зэрыхуримыкъурщ, зэи хуэмыдэу IэнатIэншэхэм я бжыгъэм хэщI зэрыхъуарщ, жаIэ Iуэхур зи нэIэ щIэт IэщIагъэлIхэм.

ИщхьэIуэкIэ къыщедбжэкIа IэнатIэхэм пэрытынухэр къыщыхахкIэ, яхэлъын хуей хьэл-щэнхэм ящыщу нэхъ къащтэр шыIэныгъэ зыхэлъхэмрэ цIыхухэм тыншу яхэзагъэхэмрэщ. Абы къыкIэлъыкIуэр къалэн зэхуэмыдэ къыпэщылъхэм ямыгъэгужьейуэ зэпIэзэрыту, зыхэт гупым къакIэрымыхуу Iуэхур зэфIэзыгъэкIыфынухэрщ, уеблэмэ, пашэ яхуэхъуфынухэрщ. 

УФ-м и Лъэпкъ банкым и унафэщI Набиуллинэ Эльвирэ иджыблагъэ къыхигъэщащ къэралым и экономикэм зрагъэужьын папщIэ лэжьакIуэхэр зэрахуримыкъур зэран къазэрыхуэхъур икIи Iуэхур кредит ахъшэ тынымкIэ зэрызэфIэмыкIынур. Сыту жыпIэмэ, мардэншэу кредит ятын щIадзэмэ, къэралыр инфляцэм хуишэнущ. Абы къыхэкIыуи, Лъэпкъ банкым кредит ставкэм и процентым зэхъуэкIыныгъэ гуэри хилъхьэн мурад иIэкъым, псалъэм папщIэ, ар иригъэхыну. 

Урысей Федерацэм и Президент Путин Владимир иригъэкIуэкIа зэIущIэхэм ящыщ зым къыщыхигъэщат ди къэралым и иджырей тхыдэм къыщымыхъуауэ, лэжьапIэншэу зезыгъэтхахэм я бжыгъэм зэрыхэщIар икIи процентищ фIэкIа ахэр зэрымыхъур. 

2023 гъэм жэпуэгъуэ мазэм и пэщIэдзэхэм ирихьэлIэу Къэбэрдей-Балъкъэрым лэжьапIэншэу щатхахэм зы процент хуэдизкIэ хэщIащ. ЛэжьапIэншэу республикэм щатхахэм я бжыгъэр иджыпсту мини 4,7-рэ мэхъу. 2022 гъэм жэпуэгъуэ мазэм ар мини 8,4-рэ хъууэ щытащ. Республикэм цIыхухэр лэжьыгъэкIэ къызэгъэпэщынымкIэ и къэрал къулыкъум и фIыгъэкIэ абыхэм я процент 30-м IэнатIэщIэхэр ягъуэтащ.