ЦIыхубэм даIыгъынущ

«Урысей Федерацэм и Президент Путин Владимир 2024 гъэм екIуэкIыну Хэхыныгъэхэм хэтыну и кандидатурэр къызэригъэлъэгъуар хуабжьу гуапэ сщыхъуащ. Ди хэкум ис псоми хуэдэу, сэри быдэу си фIэщ мэхъу Урысейр иджыпсту зэрыт щытыкIэм абы и унафэщIу щытын хуейр зэрыарар, лъэпкъпсо пашэу тлъытэ Путин Владимирщ ди къэралым и щхьэхуитыныгъэр дяпэкIи зыгъэбыдэфынур, Хэкум и лъэщагъри шынагъуэншагъэри адэкIи къызэзыгъэпэщыфынур, сыт щхьэкIэ жыпIэмэ, ди Президентыр мы къэралым ифI зыхэлъхэр, лъэпкъхэм я зэIузэпэщыныгъэр сыт щыгъуи япэ изыгъэщ цIыхущ. 
Си фIэщ мэхъу Путин Владимир ищIа жэрдэмыр Къэбэрдей-Балъкъэрым щыпсэухэм я нэхъыбэм ягу зэрырихьынур, абы щыхьэт тохъуэ, къэрал унафэщIым ди республикэм къыхуиIэ адэ-гулъытэр зэрагъэлъапIэр, ди лъахэм и зыужьыныгъэм папщIэ къытхуищIэ псом щхьэкIэ зэрыхуэарэзыр. 
Сэ шэч къытесхьэркъым ди Президентым и кандидатурэр зэрыдаIыгъынур - абы къикIыр дяпэкIи еужьэрэкIыу ипэкIэ кIуэтэнырщ, Урысейм и цIыхухэр я къэкIуэнум темыгузэвыхьынырщ», - щетх КъБР-м и Iэтащхьэ КIуэкIуэ Казбек и телеграм-каналым.