Илъэс 302-рэ ипэкIэ Петр Езанэм и унафэкIэ Урысейм къыщызэрагъэпэщауэ щытащ иджырей прокуратурэм лъабжьэ хуэхъуа IуэхущIапIэр. Нэхъапэми хуэдэу, ноби абы и къалэн нэхъыщхьэр законхэм тетыным, Урысейм и Конституцэр, цIыхум и хуитыныгъэхэр зэрагъэзащIэм кIэлъыплъынырщ.
Прокуратурэм къыпэщыт къалэнхэр нэсу гъэзэщIэным телэжьа, пщIэрэ щIыхьрэ зиIэу псэуа къэрал къулыкъущIэхэм ящыщщ республикэм и прокурору щыта Чэт Юрий Махъсидэ и къуэр. Ар КъБР-м и Аруан щIыналъэм хыхьэ Шытхьэлэ къуажэм 1951 гъэм щIышылэм и 27-м къыщалъхуащ.
1974 гъэм Курский Д. И. и цIэр зэрихьэу Саратов къалэм дэт институтыр, 1987-м - Ростов дэт щIыналъэзэхуаку парт школыр, къыкIэлъыкIуэу 1989 гъэм Къэбэрдей-Балъкъэр мэкъумэш институтыр къиухащ.
Чэт Юрий 1974 гъэм Налшык къалэм и прокуратурэм и следователу лэжьэн щIидзащ. 1975 - 1991 гъэхэм КПСС-м и Аруан щIыналъэ комитетым инструктору къыщыщIидзэри, къызэгъэпэщыныгъэ лэжьыгъэхэмкIэ къудамэм и унафэщIу, секретару, етIуанэ секретару лэжьащ. 1992 къыщыщIэдзауэ 1997 гъэ пщIондэ Чэт Юрий къулыкъу лъагэхэм пэрытащ. КъБР-м хабзэм ехьэлIа политикэмкIэ и къэрал чэнджэщэгъуу, республикэм и ХэхакIуэ комиссэм и унафэщIу, Къэбэрдей-Балъкъэрым ШынагъуэншагъэмкIэ и советым и секретару щытащ.
1993 гъэм Къэбэрдей-Балъкъэрым щызэбрагъэкIыжат совет властым и органхэр. Республикэм дежкIэ тыншу щымыта а зэманым властым и щIыналъэ органыщIэхэм я хэхыныгъэхэр къызэгъэпэщыным, мыхьэнэшхуэ зиIэ а Iуэхур пхыгъэкIыным хущIэкъуахэм ящыщщ Чэтыр. Абы щыгъуэ яхузэфIэкIащ КъБР-м и Парламентымрэ Къэрал Думэм и хэхыныгъэхэмрэ зы щIыныр икIи ахэр тэмэму екIуэкIащ. А гъэм дыгъэгъазэм и 12-м ар яхэту къызэрагъэпэщащ Конституцэм и проектыщIэм и референдум. ЩытыкIэр гугъу ищIырт хэхыныгъэхэм ехьэлIа законхэр зэрымылэжьэжым, тегъэщIапIэ гуэри зэрыщымыIэм. А зэманым мыхьэнэшхуэ зиIэ Iуэхухэр республикэм щызэфIахащ. Абыхэми хэлъхьэныгъэшхуэ хуищIащ Чэт Юрий.
1998 гъэм Чэт Юрий Махъсидэ и къуэм дзыхь хуащIащ КъБР-м и прокурор къулыкъур. Ар сыт и лъэныкъуэкIи дагъуэншэу зэрырихьэкIым папщIэ Урысей Федерацэм и Президентым и УказкIэ абы къыфIащащ юстицэм и къэрал чэнджэщэгъум и 2-нэ класс зиIэ дамыгъэр. А къулыкъум щыпэрыта зэманым абы къигъэлъэгъуащ хабзэм теухуа щIэныгъэ куу зэрыбгъэдэлъыр, и IэщIагъэм фIыуэ зэрыхищIыкIыр, юридичскэ Iэмалхэр Iэзэу къызэригъэсэбэпыфыр, дэтхэнэ Iуэхуми еплъыкIэ тэмэм зэрыхуиIэр.
2007 гъэм и накъыгъэм къыщыщIэдзауэ псэуху Чэт Юрий республикэм и Конституцэ судым и унафэщIым и къуэдзэ къулыкъум пэрытащ. Сыт хуэдэ зэныкъуэкъури Конституцэм къигъэув мардэхэм тету республикэм щызэфIэхыным, хабзэхэр щыпхыгъэкIыным езым бгъэдэлъ щIэныгъэмрэ Iэзагъэмрэ егугъуу къыхуигъэсэбэпащ.
Чэт Юрий зыпэрыта сыт хуэдэ IэнатIэми къыщигъэлъэгъуащ и IэщIагъэм зэрыхуэIэзэм къыдэкIуэу, цIыхугъэшхуи зэрыхэлъыр. Ар ящIыгъуу ягъэхьэзырри къащтащ къэралми щIыналъэми я хабзэхэм лъабжьэ яхуэхъуа дэфтэрхэр. Ар жыджэру яхэтащ 1992 гъэм гъатхэпэм и 31-м къащта Федеративнэ зэгурыIуэныгъэр зыгъэхьэзыра гупым, Урысейм и Конституцэм и проектыр зэхэлъхьэным, Къэбэрдей-Балъкъэрым хэхыныгъэхэм ятеухуа и хабзэхэр убзыхуным, Къэбэрдей-Балъкъэр Республикэм и Конституцэу 1997 гъэм къащтар зэхэгъэувэнымрэ иужькIэ абы зэхъуэкIыныгъэхэр хэлъхьэжынымрэ хуэунэтIауэ екIуэкIа лэжьыгъэхэм.
Къыхэдгъэщынщи, Чэт Юрий къэхутэныгъэ лэжьыгъэхэр егъэкIуэкIыным сыт щыгъуи хуэпабгъэрт, хуэнэхъуеиншэт, аращ лъабжьэ хуэхъуари ар щIэныгъэм зэрыхыхьам. 2006 гъэм абы и доктор диссертацэр пхигъэкIащ икIи юридическэ щIэныгъэхэмкIэ доктор цIэр къыфIащащ. 2008 гъэм щегъэжьауэ Юрий Махъсидэ и къуэр Бэрбэч Хь. М. и цIэр зезыхьэ Къэбэрдей-Балъкъэр къэрал университетым щIэныгъэ-егъэджэныгъэ IэнатIэм щыпэрытащ, КъБР-м и Конституцэ судым зэрыщылажьэм хуэдэурэ. КъБКъУ-м и юридическэ факультетым уголовнэ правэмрэ криминологиемкIэ и кафедрэм и профессору щыткIэрэ, юридическэ унэтIыныгъэ зиIэ тхыгъэхэм елэжьащ. ЩIэныгъэ лэжьыгъэу, монографиеу 50-м щIигъу и Iэдакъэ къыщIэкIащ. Ар и лэжьэгъухэм гъащIэ и пIалъэкIэ ядэгуэшащ, бгъэдэлъ щIэныгъэ куур юрист хъуну щIалэгъуалэм ябгъэдилъхьащ.
Юрий Махъсидэ и къуэм и лэжьыгъэфIым папщIэ къэрал гулъытэ игъуэтащ. Абы Урысей Федерацэм и Президентым и ФIыщIэ тхылъ къратащ, «Къэбэрдей-Балъкъэр Республикэм и пащхьэм щиIэ фIыщIэхэм папщIэ» орденыр, Къэбэрдей-Балъкъэр Республикэм и ЩIыхь тхылъыр, «Хабзэм зэрыхуэпэжым папщIэ» дамыгъэм и III нагъыщэр къыхуагъэфэщащ, «Къэбэрдей-Балъкъэр Республикэм щIыхь зиIэ и юрист» цIэ лъапIэр къыфIащащ.
Зи цIэр республикэм и тхыдэм фIыкIэ хыхьахэм ящыщщ Чэт Юрий. Абы и гъащIэ гъуэгуанэр пщIэрэ щIыхьрэ иIэу къикIуащ, хабзэм и хъумакIуэхэм къахуэщхьэпэн, щапхъэ яхуэхъун лъэужьыфI къигъэнащ.