Махуэшхуэм зыхуагъэхьэзыр

Балъкъэрхэр Урысейм зэрыгухьэрэ (1827 гъэ) 2027 гъэм илъэс 200 зэрырикъур Налшык зэрыщагъэ­лъэ­пIэнум зыхуагъэхьэзыр. 

Налшык къалэм Лениным и цIэр зезыхьэ проспектымрэ Лъостэным и цIэр зезыхьэ уэрамымрэ я зэхэкIыпIэм деж 2027 гъэм щIышылэм фэеплъ щагъэувынущ, Урысей къэралыгъуэм ­балъкъэрхэр зэрыгухьэрэ илъэс 200 зэрырикъум и щIыхькIэ. ЩIышылэм и 11-м а фэеплъыр щагъэувыну яубзыхуа щIыпIэм деж абы теухуа хъыбарегъащIэ мывэр щагъэтIылъащ. 2027 гъэм а Iуэхум епха зэхыхьэхэр ирагъэкIуэкIынущ.
Налшык къалэ администрацэм и унафэщI Ахъуэхъу Теймураз жиIащ Iуэху гуапэм теухуа махуэшхуэр зэрагъэлъэпIэнумрэ фэеплъыр абдеж зэрыщагъэувынумрэ теухуауэ зэфIагъэкIыну Iуэхухэм КъБР-м и Прави­тельствэм и лэжьакIуэхэм къыдэкIуэу, жы­лагъуэм щыщхэр, тхыдэджхэр, ­нэ­гъуэщI IэщIагъэлIхэр къызэрыхашар. 
- Тхыдэ, хабзэ, къызэгъэпэщыныгъэ Iуэхухэр къызэщIэзыубыдэ упщIэ зыбжанэм щыхэплъа зэхыхьэшхуэ ирагъэкIуэкIащ. КъБР-м и Правительст­вэмрэ Налшык къалэ администрацэм­рэ я лэжьакIуэ гупхэр жылагъуэм ечэнджэща нэужь, унафэ къащтащ 2027 гъэм а щIыпIэм деж фэеплъыр щагъэувыну. ЩIыпIэ администрацэм фэеплъым и проектыр игъэхьэзырынущ икIи ар къащта нэужь, абдеж щыдгъэувынущ. Быдэу си фIэщ мэхъу а фэеплъым Къэбэрдей-Балъкъэрым щып­сэу лъэпкъхэм я зэкъуэтыныгъэр нэхъри игъэбыдэну, - жиIащ Ахъуэхъу Теймураз. 
Тхыдэ щIэныгъэхэмкIэ доктор, профессор, КъБР-м ис цIыхухэм я хуитыныгъэр хъумэнымкIэ уполномоченнэ Зумакулов Борис и псалъэм къыхигъэщащ зэхыхьэм зэхуишэсахэр Къэ­бэрдей-­Балъкъэрым и тхыдэм щыщ хъуну зы Iуэху зэрыхэтар.
- ГуфIэгъуэ зэхыхьэр куэдрэ дигу къэдгъэкIыжынущ, тхыдэм къытедгъэзэжурэ, балъкъэрхэр зи жьауэ дыщIэту дыпсэу Урысейм зэпымыууэ фIыщIэ хуэтщIу. Адыгэхэмрэ балъкъэрхэмрэ ды­зэ­гъунэгъуу, ди гъащIэр зэпыщIауэ ды­къокIуэкI, ди гуфIэгъуи, гузэвэгъуи, шхыныгъуи зэдэдгуэшу, - жиIащ Зумакулов Борис. 
Урыс тхыдэмрэ щэнхабзэмкIэ «Вече» жылагъуэ зэгухьэныгъэм и унафэщI Литвинов Роман жиIащ къэралым гу­гъуехьхэр къызэринэкIыным сыт щы­гъуи балъкъэр лъэпкъыр жыджэру зэры­хэтар, егъэджэныгъэмрэ щэнхабзэмрэ ехъулIэныгъэфIхэр зэрыщиIэр, къэралым и экономикэм и зыужьыныгъэм хэлъхьэныгъэфI зэрыхуищIыр. Литвиновым щIигъужащ зэхыхьэ гуапэр щIэб­лэм я гъэсэныгъэм щхьэпэну, Хэкум ­хуаIэ лъагъуныгъэр, республикэм, ­къэ­ралым щыпсэу лъэпкъхэм я зэныбжьэгъугъэр игъэбыдэну зэрыщыгугъыр. 
Зэхыхьэм хэтхэр ирагъэблэгъащ Налшык и Музыкэ театрым балъкъэрхэр Урысейм зэрыгухьэрэ илъэси 197-рэ зэрырикъум теухуауэ къыщызэрагъэпэща махуэшхуэ концертым. 
Музыкэ театрым и пэIущIэ пэшым щагъэуват балъкъэрхэм я сурэтыщIхэмрэ цIыху IэпщIэлъапщIэхэмрэ я Iэдакъэ­щIэкIхэм щыщ. Мыбы щагъэлъэгъуащ балъкъэр цIыхухъу, цIыхубз лъэпкъ фащэхэр, «Балкария в лицах» зыфIаща сурэтхэр.
Пшыхьыр ягъэдэхащ симфоние оркестрым, Музыкэ театрым и хорым, республикэм и уэрэджыIакIуэ, къэфакIуэ нэхъыфIхэм. 
Концертым къекIуэлIахэр экранымкIэ ирагъэплъащ Урысейм балъкъэрхэр зэрыгухьэрэ илъэс 200 зэрырикъум и щIыхькIэ 2027 гъэм фэеплъ щагъэувыну, зыгъэпсэхупIэ парк щаухуэну, музей къыщызэIуахыну яубзыхуа щIыпIэм деж хъыбарегъащIэ мывэ зэрыщагъэтIы­лъам.