Хьэщпакъ Хьэбий и цIэ лъапIэр

ЩIышылэм и 24 – 29-хэм Красноярск къалэм щекIуэкIынущ Ярыгин Иван и Кубокыр бэнэкIэ хуитымкIэ къэхьыным хуэунэтIа дунейпсо зэхьэзэхуэ.
Илъэсым и зэпеуэ нэхъыщхьэхэм ящыщ зым зыхуагъэхьэзыру Налшык къалэм мы махуэхэм щызэхуэсащ Къэбэрдей-Балъкъэрым и бэнакIуэхэр. Ди республикэм щыщу абы я зэфIэкI къыщагъэлъэгъуэнущ спортсмен 30-м.
«Ярыгин Иван и цIэкIэ ягъэува Кубокыр къэхьыным хуэунэтIа зэхьэзэхуэхэм тхыдэ яIэщ икIи бэнэкIэ хуитымкIэ ирагъэкIуэкI зэпеуэхэм щынэхъыщхьэхэм ящыщщ. Ар къалъытэу, ди деж цIыху куэд къокIуэ. Мы гъэм абы хэтынущ къэрал 23-м я бэнакIуэхэр. БэнэкIэ хуитымкIэ илъэсым зэхэтыну зэхьэзэхуэхэм я пэублэщ Ярыгиным и Кубокыр», - жиIащ бэнэкIэмкIэ академием, Миндиашвили Дмитрий и цIэр зезыхьэм, и унафэщI Кривошеев Аркадий.
Зэхьэзэхуэм хэтынущ СНГ-м хыхьэ къэралхэм нэмыщI Венесуэлэм, Монголием, Ираным, Тыркум, Китайм, нэгъуэщIхэм я бэнакIуэхэри.
КъБР-м и командэр зэпеуэм ежьэн ипэ къихуэу республикэм спортымкIэ и министрым и къуэдзэ Хэжь Заур Iуэху гуапэ зэфIигъэкIащ - Урысей Федерацэм СпортымкIэ дунейпсо классым и мастер цIэ лъапIэм и дамыгъэхэр иритыжащ ди бэнакIуэ цIэрыIуэ Хьэщпакъ Хьэбий.