КъБР-м и щIыналъэхэм щыхъыбархэр

26 января, 2024 - 12:27
Сымаджэщхэм егугъуу
Шэджэм щIыналъэм ХьэцIыкIу Анатолэ и цIэр зэрихьэу щыIэ сымаджэщыр иджырей мардэм къитIасэу мы гъэм зэрагъэпэщыжынущ. КъатиплIу зэтет а ухуэныгъэр 1980 гъэхэм къызэрызэIуах лъандэрэ абы апхуэдэ лэжьыгъэхэр щрагъэкIуэкIакъым. 
Шэджэм Ищхъэрэм, Нартан, Яныкъуей, Щхьэлыкъуэ къуажэхэм я амбулаториехэми апхуэдэу елэжьынущ. 
Абы нэмыщI, щIыналъэм и сымаджэщ нэхъыщхьэм и автомобилхэри щIэкIэ зэрахъуэкIынущ. Абы къахэхъуэнущ щIыпIэ жыжьэхэм, къуажэ пхыдзахэм зэрынэсыфыну, дохутырхэр сымаджэхэм я деж зэрыкIуэну, сымаджэхэр къызэрырашэкIыну машинитху.
Лэжьыгъэхэр ирагъэкIуэкI «Узыншагъэ» лъэпкъ пэхуэщIэм ипкъ иткIэ. 
 
ЕджапIэр зэрагъэпэщыж
Прохладнэ къалэм и курыт еджапIэ №4-р зэрагъэпэщыжын щIадзащ мы махуэхэм. Ар унитIу зэхэтщ, зэгуагъэхьэжауэ. Япэр щаухуар 1972 гъэрщ, етIуанэр – 2006 гъэм. «Егъэджэныгъэ» лъэпкъ пэхуэщIэм ипкъ иткIэ ахэр мы гъэм зыхуей хуагъэзэнущ.
Лэжьыгъэм хеубыдэ унэлъэгухэр, унащхьэр, бжэ-щхьэгъубжэхэр, псы зэрекIуалIэ бжьамийхэр, пэшхэр къызэрагъэхуабэ бжьамийхэр зэхъуэкIыныр, егъэджэныгъэм пыщIа зыхуей-зыхуэфIхэмкIэ, унэлъащIэхэмкIэ къызэгъэпэщыныр. 
 Школым щеджэ цIыкIухэр къалэм и нэгъуэщI еджапIэхэм зэкIэ трагуэшащ. Лэжьыгъэхэр 2025 гъэм и шыщхьэуIу мазэм ирихьэлIэу зэфIагъэкIын мурад щыIэщ.
Газыр унагъуэхэм ирашалIэ
Май щIыналъэм и жылэхэр газкIэ къызэгъэпэщыным ехьэлIа лэжьыгъэхэр щрагъэкIуэкI. Къапщтэмэ, Бахъсэн къутырым, Лесное, Пришибо-Малкинискэ къуажэхэм а Iуэхум яужь щитщ.
Иджыпсту IэщIагъэлIхэм ягъэхьэзыращ газ зэрыкIуэну бжьамий нэхъыщхьэр зыдалъхьэну щIыпIэр. Абы щхьэкIэ датIыкIащ километриплI зи кIыхьагъ кIэнауэр. КъыкIэлъыкIуэ лэжьыгъэу щытынур социальнэ льготэ зиIэ унагъуэхэм газыр яхуешэлIэнырщ, абы пыIа оборудованэхэр унэм яхущIэгъэувэнырщ. 
Иджырей Iуэхугъуэхэр ирагъэкIуэкI Къэбэрдей-Балъкъэрым и Iэтащхьэ КIуэкIуэ Казбек и унафэмрэ «Газмпром»-м и къудамэу Налшык щыIэм щIыналъэм газым пыщIа и IэнатIэр 2023 - 2024 гъэхэм егъэфIэкIуэнымкIэ къищта программэмрэ япкъ иткIэ.
Лэжьыгъэхэр зэфIагъэкIынущ дызэрыт илъэсым и гъатхэпэ мазэм. 
 
Гъуэгу лэжьыгъэхэм пащэ
Аруан щIыналъэм и Аргудан, Александровскэ жылэхэр зэпызыщIэ автомобиль гъуэгур зэгъэпэщыжын щIадзащ. «Кавказ» Р-217 а къэрал гъуэгумрэ Прохладнэ къалэр, Елъхъуэт къуажэр зэпызыщIэ щIыналъэ гъуэгумрэ зэпытщ. Лэжьыгъэхэм къызэщIаубыдэнущ километр 16,5-рэ зи кIыхьагъ автомобиль гъуэгур.
Иджыпсту лэжьакIуэхэм щIыпIэхэр ягъэхьэзыр, гъуэгубгъум къыIут жыгыжьхэр къратхъ, абы иужькIэ гъуэгур нэхъ бгъуэ ящIынущ, зэуэ машиниплI ущызэблэж хъууэ, асфальтыщIэ тралъхьэнущ, къэухьхэр ягъэувынущ.
«ГъуэгуфI шынагъуэншэхэр» лъэпкъ пэхуэщIэм ипкъ иткIэ ирагъэкIуэкI лэжьыгъэм и япэ Iыхьэр дызэрыт илъэсым и кIэхэм ирихьэлIэу зэфIагъэкIынущ.
 
«Амра»-м Iэгуауэ хуаIэт
 Бахъсэн къалэм и «Амра» къэфакIуэ гупыр хэтащ Мэзкуу къалэм щекIуэкIа «Гъуазджэм и дуней» дунейпсо зэхьэзэхуэ-фестивалым. Абы и къэпщытакIуэ гупым хэтащ къэралым щыцIэрыIуэ къэфакIуэ гупхэм я унафэщIхэр, спортсменхэр, еджапIэ нэхъыщхьэхэм я лIыкIуэхэр. 
УнэтIыныгъэ зыбжанэу гуэшауэ щытащ зэпеуэр. Ди гуапэ зэрыхъущи, «Амра»-м къыхуагъэфэщащ «Хореографие творчествэ. Лъэпкъ къафэ» Iыхьэм и Гран-прир. ЩIыналъэм и гъэсэн цIыкIухэм абы щагъэзэщIащ «Убых къафэр». Гран-прим нэмыщI, гупым иджыри япэ увыпIищ къыхуагъэфэщащ, ахэр зыхэта нэгъуэщI зэпеуэхэм зэрыщытекIуам папщIэ.
КъэфакIуэ ныбжьыщIэхэм ядэлажьэр ГъукIэхэ Аслъэнрэ Зитэрэщ.
ХЬЭЩЫКЪУЕЙ Олег.
  • 42 просмотра
Поделиться: