Зэманым пэлъэщакъым

Мы гъэм илъэсищэ ирикъу «Советский спорт» газетыр  зэгуэр цIэрыIуэ дыдэу щытащ. Ауэ ар  зыми игъэлъэпIэну фэ теткъым. Пэжщ, иджыри къыдэкIыу жаIэ арщхьэкIэ щапIэхэм щыплъагъужыркъым. Сыту пIэрэ   къызыхэкIар?

Зэуэ жытIэнщи, 1924 гъэм бадзэуэгъуэм и 20-м къыдэкIын щIэзыдза «Красный спорт» газетым («Советский») щыхъуар 1946 гъэм гъатхэпэм и 19-рщ) ипэкIэ илъэситIкIэ къыдэкIащ «Известия спорта» жыхуиIэр, арщхьэкIэ тхыдэм къызэрыхэнар иужьрей фIэщыгъэр иIэущ.

Абы щыгъуэми, зи гугъу тщIы газетыр зэгуэр ди къэралым хуабжьу зэIэпахыу щыщытащ. Спортыр фIыуэ зылъагъухэм я ныбжьэгъу пэжт: абы къыщащIэрт нэхъ хъыбарыщIэ дыдэхэр. Газетым щылажьэрт зытетхыхь  Iуэхум куууэ хэзыщIыкI журналистхэр. Апхуэдизу я пщIэр лъагэти, абыхэм я Iуэху еплъыкIэхэр къалъытэрт  тренер щэджащэхэми. А щхьэусыгъуэм къыхэкIыу «Советский  спорт»-р уэчыл бэлыхьу къэувырт: ар зыщытхъуа джэгуакIуэм  и щIыхьыр лъагэу яIэтырти, зытехъущIыхьар ягъэлъахъшэрт. Дауи, нэфI-неи, щхьэхуещагъэ гуэрхэри къыщыхэкI щыIэт.  Абы и щхьэусыгъуэри зыт: СССР-м и зэманым спортым политикэ хэту зэрыщытарт. Мис иджы КъухьэпIэр текI имыIэу зытехьа гъуэгум…

НэгъуэщI гугъуехьхэр зыпыщIар хъыбархэр псынщIэ дыдэу зэIэпахын зэрыхуейрт. Абы папщIэ нэхъыбэу къагъэсэбэпри телефонырт. Арат дыгъуэпшыхь иуха зэхьэзэхуэхэм кърикIуахэми пщэджыжьым газетым къыщыбгъуэтыныр къызыхэкIыр Журналистхэр а къалэным дэгъуэу пэлъэщырт.  Езы газетри псынщIэу щIызэбграхыр арауэ къыщIэкIынут. ЗэрыгурыIуэгъуэщи мыбы къытрадзэрт  спортым и лIэужьыгъуэ куэдым щыщыIэ щытыкIэр, ехъулIэныгъэхэмрэ щыуагъэхэмрэ куууэ щызэпкърах тхыгъэхэри. ЖыпIэну ирикъунщ 1980 гъэхэм я зэхуэдитIым газетым и тиражыр мин щитхум  щIигъуауэ зэрыщытар. Ауэ итIани шэджагъуэм ирихьэлIэу щапIэхэм ар щыбгъуэтыжыртэкъым. Газетым хуащI пщIэр къызыхэкI щхьэусыгъуэхэми ящыщт абы фIэкIа нэгъуэщI къыдэкIыгъуэхэр («Футбол - хоккей» газетым и гугъу тщIынкъым) нэгъуэщI спортым теухуауэ зэрыщымыIэр. Мыр спортыр фIыуэ зылъагъухэри, абы и лIэужьыгъуэ зэмыщхьхэм дихьэххэми, езы спортсменхэми я  уэчылт.

АрщхьэкIэ зи гугъу тщIы къыдэкIыгъуэр 1990 гъэхэм яфIэмыщIэщыгъуэж хъуащ.  НэгъуэщI Iуэху еплъыкIэхэри Iуэху бгъэдыхьэкIэхэри къыкъуэкIащ. Псом хуэмыдэу 1991 гъэм «Спорт-Экспресс»-р дунейм къытехьа иужькIэ. Езы газетым и журналист зыкъоми абыкIэ екIуэкIащ. Къапщтэмэ, «Спорт-Экспресс» и япэ  номерым (а илъэсым шыщхьэуIум и 14-м къыдэкIам) елэжьат абы икIа журналист 14. КъыдэкIыгъуэщIэм апхуэдизу псынщIэу зиубгъуати, «Советский спортыр»-р ящыгъупщэжат. Апхуэди къохъу: дэтхэнэми езым и зэман иIэжщ.