Iуэхугъуэхэм хэплъащ

КъБР-м и Правительствэм и Уна­фэщI Мусуков Алий Iуэхугъуэ щхьэ­хуэхэр щызэпкъраха зи чэзу зэ­IущIэ иригъэкIуэкIащ. 

Федеральнэ мылъкум щыщу Къэбэрдей-Балъкъэрым и мылъкум ­хагъэхьэнущ сурэтрэ видеорэ техы­ным­кIэ IуэхущIапIэр. Абы теухуауэ ­КъБР-м и Правительствэм игъэхьэзыра проектыр игъэбелджылащ КъБР-м щIы, мылъку зэхущытыкIэхэмкIэ и министр Тэхъу Аслъэн. Проектыр зэха­гъэуващ Урысейм и мылъкухэмкIэ Уп­равленэу КъБР-м щы­Iэм и мардэхэм ­тету. Республикэм и къэрал мылъкум къыхэхъуэр сом мел­уан 29-рэ мин 602-рэ и уасэщ. Ар «Безопасная среда» IуэхущIапIэм и нэIэ щIэтынущ. Министрыр щхьэхуэу къытеувыIащ федеральнэ мылъкум щыща чыристан энцик­лопедием и том щхьэхуэ Къэбэрдей-­Балъкъэрым и къэрал мылъ­кум зэ­рыхагъэхьам. Ар ди респуб­ликэм и Лъэпкъ библиотекэм щахъу­мэнущ. 
КъБР-м транспортымрэ гъуэгу хо­зяй­ствэмкIэ и министр ДыщэкI Аслъэн игъэ­белджылащ 2024 гъэм муници­пальнэ гъуэгу фондыр къызэгъэпэ­щыным трагъэкIуэдэну субсидие Къэ­бэрдей-Балъкъэрым и бюджетым ­къыхахыу Налшык къалэ округым и мылъкум зэрыхрагъэубыдэнур. 
УФ-м и къэрал программэхэр цIы­ху­бэм я мылъкур зэгъэзэхуэнымкIэ «Электронный бюджет» системэм и мардэм изыгъэзагъэ КъБР-м щыубзыхунымкIэ Правительствэм и проектым тепсэлъы­хьащ КъБР-м лэжьыгъэмрэ цIыхухэм псэуныгъэкIэ защIэгъэкъуэнымкIэ и министр Асанов  Алим. Министрым игъэ­белджылащ гулъытэ хуэныкъуэ ныкъуэдыкъуэхэмрэ жьы­кIэ­фэкIэхэмрэ якIэ­лъыплъыным теухуауэ республикэм системэ щхьэхуэ щыIэ­ным­кIэ проектри. 
КъБР-м лъэпкъ Iуэхухэмрэ жылагъуэ проектхэмкIэ и министр КIурашын Анзор зэIущIэм щытепсэлъыхьащ дин IуэхущIапIэхэм я лэжьакIуэхэу 2024 гъэм Къэбэрдей-Балъкъэрым и къэрал стипендиер зратынухэр гъэбелджы­лынымкIэ КъБР-м и Правительствэм и проектым. 
ГУГЪУЭТ  Заремэ.