Мы фхуэсIуэтэжыну хъыбарыр къэхъупа Iуэхугъуэщ. ЗэрыгурыIуэгъуэщи, зэман мымащIэ абы лъандэрэ дэкIами, къызыщыщIам и цIэр къидмыIуэм нэхъыфIщ. Си зы цIыхугъэ щIалэ лъэIукIэ зыкъысхуигъэзащ ди зы къуажэ пхыдза и зы хозяйствэ си машинэмкIэ сшэну. Сэри куэд щIауэ сцIыхут, и унагъуи мызэ-мытIу сихьати, схуэгъэщIэхъуакъым.
Къалащхьэмрэ дыздэкIуэну жылагъуэмрэ зы сыхьэт нэхъ мымащIэкIэ зэпытчын гъуэгуанэ дэлъти, ар къызэднэкIыху, сэр нэхъ илъэсипщIкIэ нэхъыжьым и жьафэ къемыхыу гъэсэныгъэ лэжьыгъэ къыздригъэкIуэкIащ. Нэхъыбэу псалъэмакъыр зытеухуар зэфIэкI, къулыкъу зиIэ, уей-уей жезыгъыIэ цIыхухэр къызэрыдэпхьэхыну щIыкIэмрэ ахэр къэгъэсэбэпа зэрыхъунумрэт. «Щытхъур зыми и жагъуэкъым - ущымысхь ахэм яхуэгъэза уи щытхъумрэ хъуэхъумрэ», - жиIэрт абы, кIэщI- кIэщIурэ, «щытхъу» псалъэм нэхъ тригъэчыныхьу.
Сэри, си цIыхугъэ щIалэм мащIэу сыдэуэршэрынуми, IэпэдэупIэ къызитынутэкъым. Тхьэ зыщиIуэрати, дэ щIалэгъуалэм куэдым дыхуегъэджэн, дыхуэгъэсэн, дыхуэущыин хуейт.
Сытми гува-щIэхами, си гъэсакIуэм си щхьэр зэтрихуауэ жыхуиIа къуажэмрэ IэнатIэмрэ дынос. ЗыхуэкIуа унафэщIми, хьэщIагъэ къыдехри, чэзууншэу и кабинетым дыщIегъыхьэ, сэлам гуапэ къыдехри, ди Iуэху зытетымрэ узыншагъэр зыхуэдэмрэ щыгъуазэ зыхуещI. Адыгэ Хабзэм къызэригъэувым тету, дыщIэкIуам и щхьэусыгъуэм щIэмыупщIэу, хуэкIуа щIалэм псалъэ къылъегъэс.
- Хьэсдин, Къэбэрдей псом зы адыгэлI, цIыхугъэ лъагэ бгъэдэлъу, гуащIафIэу, ехъулIэныгъэ мыужьыхыж иIэу, фIыщIэмрэ щытхъумрэ я нэхъ лъапIэр хуэфащэу, исмэ ар уэращ. Нобэми ныжэбэми зэпымыууэ, сыбампIэу согупсыс, махуэм зы дакъикъи сигу ихукъым, жэщым сигъэжейкъым, сыжеями сызэпщIыхьыр аращ – уэ къэблэжьауэ, пхуэфащэ пщIэ щхьэ мы ди республикэ унафэщIхэм къыпхуамыщIарэ? Арат уэ къэблэжьыр? ИкIи…
- Кхъа, уи жагъуэ умыщI, ауэ егъэлеяуэ лэжьыгъэшхуэ къыспэщылъщ, хъунумэ зэманкIэ укъызэмытхьэкъу – узыхуейр къызжеIи сиIэмэ уэстынщ, схузыфIэкIынур пхуэсщIэнщ», - жиIащ унафэщIым.
Хьэсдин зыхуейр жиIа иужь, апхуэдэ лъэкIыныгъэ дызыхуэкIуа тхьэмадэм зэрыбгъэдэмылъыр, хозяйствэми зэрамыIэр кIэщIыу къыгурагъаIуэщ и жагъуэ имыщIыну къелъэIури дыкъырагъэжьэжащ.
Си цIыхугъэ щIалэм и щхьэр фIэхуарэ, жиIэж щIагъуи щымыIэжу, къэлащхьэм къэсшэжащ.
