«Урысейм щащIащ» фестиваль-жармыкIэр Ляонин хэгъэгум и къалащхьэ Шэньян Iэтауэ къыщызэIуахащ икIи щIэупщIэшхуэ иIэу мы махуэхэм щокIуэкI. Япэ махуэм Китайм зыкъыщигъэлъэгъуащ Амур областым щыщ «Карусель» ансамблым. Лъэпкъ макъамэ Iэмэпсымэхэм кърагъэкIыу абыхэм жаIащ «Калинка», «Подмосковные вечера» урыс уэрэдхэр.
ФIэхъус псалъэкIэ къызэхуэсахэм зыхуагъэзащ Урысей экспорт центрым и генеральнэ унафэщI Никишинэ Вероникэ, Ляонин хэгъэгум и губернатор Ли Лэчэн, абы и къуэдзэ Говэй Цзинь, Шэньян къалэм и мэр Лу Чжичэн, Далянь къалэм и унафэщI Шаован Чэн, УФ-м и генеральнэ лIыкIуэу Шэньян щыIэ Черненкэ Сергей, урысей, китай хьэрычэтыщIэ IэнатIэхэм я лIыкIуэхэм.
- Мы фестиваль-жармыкIэм и къалэн нэхъыщхьэр ди къэралыр лэжьэгъу зэпIэзэрыту, дзыхь зыхуэщIыпхъэу зэрыщытыр хьэкъ щIынырщ. Абы и фIыгъэкIэ Урысеймрэ Китаймрэ я экономикэ зэпыщIэныгъэм нэхъри зегъэужьынырщ. Китайм къэтшар Урысейм нэхъыфI дыдэу къыщыщIагъэкIхэрщ, щащIхэрщ, щызэрахьэ хабзэхэрщ. Абы хохьэ хьэщIэ егъэблэгъэкIэр, хабзэ дахэхэр, фIагъ лъагэ зиIэ ерыскъы IэфIхэр, экологие и лъэныкъуэкIэ зыхуэдэ щымыIэ продукцэхэр. КъищынэмыщIауэ, Урысейм дунейпсо утыкум и пщIэр щигъэбыдэнымкIэ IэмалыфIщ кърахьэжьа Iуэхур. Си фIэщ мэхъу «Урысейм щащIащ» фестивалым ди къэралитIыр нэхъри нэхъ зэпэгъунэгъу зэрищIынур. Компание лъэрызехьэхэм къыщIагъэкIхэмрэ ящIхэмрэ китайхэм яфIэгъэщIэгъуэну зыщагъэгъуазэ, зэгурыIуэныгъэхэр ди хьэрычэтыщIэхэм дащI мы махуэхэм, - жиIащ Урысей экспорт центрым и генеральнэ унафэщI Никишинэ Вероникэ.
Фестивалым и япэ махуэм Шэньян къалэм щыпсэухэмрэ и хьэщIэхэмрэ хуэзащ Олимп чемпион Щербаковэ Аннэ, Осинэ Никитэ уэрэд яжриIащ, ерыскъыхэм я IэфIагъыр зрагъэщIащ, ди къэралым и IэпэIэсэхэм къызэрагъэпэща мастер-классхэм щIэсащ.
ЖармыкIэм ущрохьэлIэ фо, морожнэ, кIэнфет, вафлъэ, нэгъуэщI IэфIыкIэ зэмылIэужьыгъуэхэм, нартыхум къыхэщIыкIа IэфIхэм, квас, печенье, мэрзей, торт хуэдэхэм, псори зэхэту лIэужьыгъуэ I500-рэ мэхъу. Китайм кIуащ Урысейм и щIыналъэ 30-м щыщ компание I30-рэ. Тхьэмахуэм щIигъукIэ екIуэкIыну зэхыхьэм и программэр нэгузыужьу зэхагъэуващ. Къащэхухэм нэмыщI, хьэщIэхэм пщIэншэу шхыныгъуэм и IэфIагъыр къащIэну хуитщ, урысей цIыху IэпщIэлъапщIэхэм я дерсхэм щIэсынущ, апхуэдэуи Мариинскэ театрым и балетым, Якобсон Леонид и цIэр зезыхьэ театрым и балетым, Вагановэм и цIэкIэ щыIэ Урысей балетымкIэ академием концертхэр ятынущ. Я творчествэр ягъэлъэгъуэнущ Приморскэ крайм и «Садко», «Ярица» ансамблхэм, Якутием и къэрал концерт оркестрым, ХМАО-м щыпсэу лъэпкъхэм я щэнхабзэр зыгъэлъагъуэ творческэ гупым, нэгъуэщIхэми.
Урысей экспорт центрым, Урысей экспортерхэм защIэгъэкъуэнымкIэ къэрал институтым, Урысейм и Правительствэмрэ Ляонин хэгъэгум и ЦIыхубэ Правительствэмрэ зэгъусэу къызэрагъэпэщауэ Китайм щIышылэм и 27-м щегъэжьауэ мазаем и 5 пщIондэ Китайм щекIуэкI «Урысейм щащIащ» фестиваль-жармыкIэмкIэ къызэIуах Урысей-Китай щэнхабзэм и илъэсыр. Мы тхьэмахуэм къриубыдэу цIыху мелуни 3-м щIигъу жармыкIэм къекIуэлIэну хуагъэфащэ къызэгъэпэщакIуэхэм.
Мы махуэхэм щIэупщIэ яIэщ Урысейм и мэкъумэш IэнатIэм лъэ быдэкIэ нэхъ щыува «Мираторг», «Черкизово», «Эфко», «Балтика», «МАКФА», «Союзпищепром», «Объединенные кондитеры», «Славянка», «Русский краб», «СЗРК», «Эконива», «Комос», «БРПИ», «Дядя Ваня», «АБИ Продакт», нэгъуэщI компаниехэм я продукцэхэм.
«Урысейм щащIащ» брендым щIэту дяпэкIэ а къэралым и лъэпкъ тыкуэнхэм щащэнур мин зыбжанэм щIигъуащ, абыкIэ зэгурыIуэныгъэхэр зэдащI.
КъызэгъэпэщакIуэхэри, зи продукцэ зыгъэлъагъуэхэри дахэу щызэдолажьэ Китайм. Апхуэдэу УФ-м и гъэзэщIакIуэ властым и лIыкIуэхэм я гъусэу бысым къэралым и хьэрычэтыщIэхэм йопсалъэ Москва, Архангельск, Смоленск, Амур областхэм, Ханты-Мансийск автоном округым щыщ IэщIагъэлIхэри.
«Тхьэмахуэм къриубыдэу зэращIылIэну зэгурыIуэныгъэхэм, яухуэну зэхущытыкIэхэм щIыналъэхэри зэрыхэтым мыхьэнэшхуэ иIэщ. НобэкIэ къапщтэмэ, Урысейм и хэгъэгухэм я Iыхьэ щанэр Китайм пыщIа хъуауэ долажьэ. Къуэш зэхуэхъуа щIыналъэу 200 диIэ хъуащ. Абыхэм я бжыгъэри илъэс къэс хохъуэ», - жиIащ ФедерацэмкIэ Советым и вице-спикер Журавлев Николай.
Никишинэ Вероникэ зэригъэбелджыламкIэ, «Урысейм щащIащ» брэндыр Китайм цIэрыIуэ щыхъуащ япэ сыхьэтым щегъэжьауэ. «Ар къызыпэкIуар, дауи, жармыкIэм къыщызэIуаха пщыIэхэрщ, ерыскъыхэм едзакъэурэ, ефэурэ и фагъыр щызэрагъащIэу.
«КъыщIэдгъэкIхэм фIагъ лъагэ зэриIэр зэрагъэлъагъущ, зэрагъащIэри, занщIэу зэгурыIуэныгъэхэр зэдащIу щIадзащ. НэгъуэщI IэмалхэмкIэ, а Iуэхум зэман нэхъыбэ токIуадэ, чэнджэщэнми кIыхьлIыхь ещI. Ар щIэдзапIэ къудейщ», - жиIащ Никишинэм. - А псом къищынэмыщIауэ, Китайм онлайн-сатум хуабжьу зыщиужьащ. МахуиблкIэ екIуэкIыну сатум къыщIэкIыну тедухуар япэ махуэм зэхуахьэсащ. Дызэримыгугъауэ псынщIэу зэбгрыкIащ «Урысейм щащIащ» брэндым щIэт продукцэхэр. Блогерхэр апхуэдизкIэ жыджэрщ, апхуэдизкIэ жылагъуэм я дзыхь кърагъэзри, жармыкIэм нэхърэ нэхъ гуащIэу интернетми сату щокIуэкI».
Фестивалыр къыщызэIуах махуэхэм ирихьэлIэу Шэньянрэ Даляньрэ щекIуэкIа жармыкIэм урысей продукцэу сом мелуан I9 и уасэ щащащ. Иджыпсту ди къэралым ирашахэр щащэ лъэпкъ тыкуэн I4-мрэ китай маркетплейсу 8-мрэ. А тыкуэнхэм япэ махуэхэм сом мелуан 44,2-рэ и уасэ щащащ. Iуэхур апхуэдэу хуабжьу хэIущIыIу зыщIар китай блогерхэм зэбграгъэх видеохэрщ, абыхэм цIыху мелуан 45-м хъыбар ирагъэщIащ, абыхэм я нэхъыбэр интернетым щощахуэ.
