КъБР-м и Iэтащхьэ КIуэкIуэ Казбек хэтащ советыдзэхэр Афганистаным къызэрырашыжрэ илъэс 35-рэ зэрырикъум теухуа, абы хэкIуэда зауэлIхэр ягу къыщагъэкIыж зэIущIэм.
Афганистаным щекIуэкIа зауэм хэкIуэдахэм я фэеп-лъым удз гъэгъахэр телъхьэным иращIэкIа зэхыхьэм кърихьэлIащ къэрал къулыкъущIапIэхэм, хабзэхъумэ IэнатIэхэм, жылагъуэ зэгухьэныгъэхэм я лIыкIуэхэр.
Республикэм и цIыхухэм защыхуигъазэм КIуэкIуэ Казбек жиIащ:
- Къэбэрдей-Балъкъэр Республикэм и цIыхухэу пщIэ зыхуэсщIхэ! Си хэкуэгъу лъапIэхэ!
Нобэ илъэс 35-рэ ирокъу советыдзэхэр Афганистаным къызэрырашыжрэ. Афганистаным къулыкъу щезыхьэкIа дэтхэнэри тетащ къыхуащIа дзэ унафэм икIи абыхэм щIыхь пылъу ягъэзэщIащ къыхуагъэува къалэнхэр.
Мы махуэм дэ пщIэ яхуэтщIу дигу къыдогъэкIыж лIыгъэрэ хахуагъэрэ къэзыгъэлъэгъуа сэлэтхэр, сержантхэр, офицерхэр - псалъэ быдэ ятам хуэпэжу Хэкум и деж щаIэ дзэ, граждан къалэныр нэсу зыгъэзэщIахэр.
Афган зауэм хэтащ совет сэлэтрэ офицеру мелан ныкъуэм щIигъу, абы щыщу 1800-м щIигъур ди хэкуэгъу-хэщ, Къэбэрдей-Балъкъэр Республикэм щыщхэщ. Ди жагъуэ зэрыхъунщи, абыхэм ящыщ куэд псэужкъым.
Дэ сытым дежи фIыщIэ яхуэтщIу дакъыдекIуэкIынущ ди Хэкум и щхьэщыжа-кIуэу хамэ къэралхэм щIыхь пылъу щыщыта псоми, ду- нейм ехыжахэм я фэеплъыр тхъумэнущ. Абыхэм къагъэлъэгъуа лIыгъэр, хахуагъэр щапхъэ яхуохъу Хэкум и хъумакIуэ нобэрей щIэблэм, дзэ Iуэху хэхам хэту псэемыблэжу ди къэралым и шынагъуэншагъэмрэ щхьэхуитыныгъэмрэ зыхъумэхэм. Абыхэми щэ бжыгъэкIэ яхэтщ Къэбэрдей-Балъкъэрым и къуэ пажэхэр.
Афганистаным къикIыжа нэужь, ди зауэлIхэм я къуэшыгъэ зэпыщIэныгъэхэр ямыгъэкIуэдам и мызакъуэу, хэкупсагъэ яхэлъари щахъумэфащ, абы и мыхьэнэр нэхъ лъагэ ящIу. Я фэм дэкIа, я нэгу щIэкIа псор зрагъэтIылъэкIри, абыхэм гъащIэм я увыпIэ щаубыдыжащ, унэтIыныгъэ зэхуэмыдэхэм щолажьэ, жылагъуэ Iуэхухэми жыджэру хэтщ, щIалэгъуа-лэр гъэсэнми я гуащIэшхуэ халъхьэ. ЩIыналъэм щекIуэкI жылагъуэ гъащIэм адэкIи жыджэру хэтыну дащогугъ.
ЗауэлI хахуэхэм узыншагъэ быдэ, зэIузэпэщыгъэ, фIыгъуэ яIэну сохъуэхъу.
