КъБР-м и Правительствэм и УнафэщI Мусуков Алий Iуэхугъуэ зыбжанэм щыхэплъа зэIущIэ иригъэкIуэкIащ.
2025 гъэм Къэбэрдей-Балъкъэрым щекIуэкIыну кадастр лэжьыгъэхэм я проектыр игъэбелджылащ КъБР-м щIы, мылъку зэхущытыкIэхэмкIэ и министр Тэхъу Аслъэн.
ЗэIущIэм къыщащтащ 2040 гъэ пщIондэ хуэгъэфэщауэ республикэм иIэну мылъкум и япэ, етIуанэ гуэдзэнхэм халъхьа зэхъуэкIыныгъэхэм я проектыр.
- 2040 гъэ пщIондэ тещIыхьа налог, мыналог хэхъуэм зэхъуэкIыныгъэ иIэнущ республикэм псэуныгъэмрэ экономикэмрэ я зыужьыныгъэм теухуауэ къащта унафэм ипкъ иту. Къэрал щIыхуэми зэхъуэкIыныгъэ егъуэт, бюджетымкIэ кодексымрэ Урысейм ФинансхэмкIэ и министерствэм худиIэ зэгурыIуэныгъэмрэ къэлъытауэ, - жиIащ КъБР-м финансхэмкIэ и министр Лисун Еленэ.
КъБР-м промышленностымкIэ, энергетикэмрэ сатумкIэ и министр Ахубеков Шамил игъэбелджылащ республикэм щыIэ бэзэрхэм ятеухуа зэхъуэкIыныгъэхэм я проектыр. Абы зэрыжиIамкIэ, зэхъуэкIыныгъэхэр ягъэбелджылащ Тэрч къалэ администрацэм закъызэрыхуигъэзам тету. Тэрч бэзэрым («Терский рынок») и фIэщыгъэм, щагъэзащIэ Iуэхутхьэбзэхэм, иубыд щIыпIэм и инагъым захъуэжынущ.
Наркологиемрэ психоневрологиемкIэ диспансерхэр зэхагъэхьэжу и фIэщыгъэри зэрахъуэжынум теухуауэ КъБР-м и Правительствэм игъэхьэзыра проектым тепсэлъыхьащ КъБР-м узыншагъэр хъумэнымкIэ и министр Къалэбатэ Рустам.
- «КъБР-м Узыншагъэр хъумэнымкIэ и министерствэм психиатриемрэ наркологиемрэ и республи-кэ клиникэ центр» фIэщыгъэр иIэнущ IуэхущIапIэм. ЯгъэзащIэ къалэнхэмрэ цIыхухэм ират Iуэхутхьэбзэхэмрэ зэрыщытам хуэдэу къэнэжынущ. Проектым хэплъапхъэ IуэхущIапIэхэм яхуедгъэхьащ, чэнджэщу къытIэрыхьахэри къэтлъытащ, - жиIащ министрым.
КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим «Шэрджэс ГЭС»-м и ухуэныгъэм хэлъыну щхьэхуэныгъэхэм теухуауэ Правительствэм и проектыр игъэнэIуащ.
ЗэIущIэм щыхэплъащ республикэм и мылъкум щыщ субсидие муниципалитетхэм тегуэшэным ехьэлIа проект щхьэхуэм. Мылъкур къыщагъэсэбэпынущ «ЩIыналъэ, муниципальнэ гъуэгу зэпыщIэныгъэ» («Региональная и местная дорожная сеть») щIыналъэ проектым, автомобиль гъуэгухэр гъэтэмэмыным, гъуэгур зыхуей хуэгъэзэным епха нэгъуэщI Iуэхугъуэхэр егъэкIуэкIыным.
- Проектым тету, 2024 гъэм Налшык къалэм иратынущ сом мелуан 27,9-рэ. Ухуэныгъэ IуэхукIэ Налшыкрэ Къэщхъэтаурэ хухахынущ сом мелуан 303-рэ. Налшык, Прохладнэ, Къэщхъэтау, Аушыджэр муниципалитетхэм щхьэхуэу къыщагъэсэбэпынущ сом мелуани 147,5-рэ, - жиIащ КъБР-м транспортымрэ гъуэгу хозяйствэмкIэ и министрым и къуэдзэ Ульбашев Ислъам.
ЗэIущIэм къыщащтащ КъБР-м Лэжьыгъэмрэ цIыхухэм псэуныгъэкIэ защIэгъэкъуэнымкIэ и министерствэм республикэм и цIыхухэм зарэдэIэпыкъун мылъку щхьэхуэ хухэхыным и проектыр. Ар игъэбелджылащ КъБР-м лэжьыгъэмрэ цIыхухэм псэуныгъэкIэ защIэгъэкъуэнымкIэ и министр Асанов Алим.
ГУГЪУЭТ Заремэ.