Зи IэщIагъэм хуэпэж

ЦIыхур къэпцIыхун папщIэ, и псэ къулеигъэр зыхэпщIэным щхьэкIэ языныкъуэхэм и деж узыхуейр дакъикъэ зыбжанэщ. Апхуэдэу зи дуней тетыкIэр, зи гупсысэкIэр къэщIэгъуафIэхэм ящыщщ дэрбзэр Iэзэ ХьэцIыкIу Мадинэ. Сэ слъэгъуащ Мадинэ и гъэлъэгъуэныгъэ зыбжанэ, и псэлъэкIэ сыщIэдэIунуи Iэмал сиIащ. Аращ и щхьэ течауэ щIысхужыIэнур: а цIыхубз зэпIэзэрытыр зи IэщIагъэм хуэпэж, абы кърит гупсысэхэм зи гъащIэр игъэбей, а псом гурыфIыгъуэ къыхэзых цIыхущ. Мадинэ и гукъэкI кIапэ мы тхыгъэ цIыкIум къыщысхьыр абы и щыхьэту къысщохъу.

Си гупсысэр къыщыушар

         Адыгэ лъэпкъым къадекIуэкIыу щытахэм, абы беягъэу яIахэм къежьапIэ хуэхъуахэм хуэдэ гуэр хъунщ си гум къыщыушар. Согупсысыжри, сщIэжыркъым мы Iуэхум зэгуэри «срисымэджауэ», къызэхъулIэну сызыхуеIэ си хъуэпсапIэхэм ящыщ зыуэ щытауэ. Ауэ мы зыр быдэу схужыIэнущ: къалэм дыкъыщалъхуами, зэшыпхъуитI дыхъурти, дызэрыадыгэмрэ ди анэдэлъхубзэмрэ ди адэ-анэм зэи тщагъэгъупщакъым.

         Университетым сыщыщеджэм щыгъуэ, абы и къэфакIуэ гупым зы зэманкIэ  сыхэтащ. Сэ си хьэлкIэ Iэуэлъауэшхуи цIыху Iуви  сфIэфIтэкъым, ауэ къафэм сыщIэкIуэр  адыгэ фащэр си пкъым ислъхьэну сыхуейти арат. Адэ-анэм къытхалъхьа гъэсэныгъэм  къыдэкIуэу, а лъэхъэнэрауэ къыщIэкIынщ IэнатIэ схуэхъунум и къуэпсхэр къыщежьар, си гупсысэр къыщыушар.

         Дыщэ идэр, уагъэ ухуэныныр, тхыпхъэщIыпхъэхэр, гухьэрхэр (узорхэр), пасэрей зэманым зэрыхъукIэ нэхъ пэгъунэгъуу фащэхэр гъэщIэрэщIэныр нобэкIэ си гъащIэ гъусэщ.  

СыщIохъуэпс…

         НэгъуэщI мыхъуми, махуэшхуэхэм деж, зыщыщ лъэпкъыр ягъэнаIуэу, цIыхухэм фащэ зыщатIэгъэжауэ слъагъуну. Абы зэгуэр дызэрыхуэкIуэжынуми шэч къытесхьэркъым, ауэ адыгэ фащэм и дахагъэр псоми я нэIурыту щытын хуейщ ар зыхащIэн папщIэ. КъэфакIуэ артистхэм я мызакъуэу, фащэр адыгэ псоми зэдайуэ зэрыщытыр къагурыIуатэмэ, итIанэ абы утыкур иубыдыжынт, хуэфащэ увыпIи игъуэтыжынт.