IифтIар хьэмэ хэщхьэж?

ЦIыхум и щхьэм къихьэ гупсысэр зэримыгъэзахуэ щIыкIэ интернет напэкIуэцIхэм нос дызэрыт зэманым. ЕпIэщIэкIыу псалъэ мыхъумыщIэ зыIэщIэкIхэр мымащIэ пэтми, хъыбарыбэ зэпыщIапIэхэм щхьэж и еплъыкIэр утыку кърихьэну Iэмал ирет, апщIондэху нэхъыфIри нэхъ наIуэ къохъу. Апхуэдэ «къэгубжьыкIэ щхьэпэхэм» я щапхъэу жыпIэ хъунущ иджыблагъэ телеграмым къыщыхъея зэдауэм къежьапIэ хуэхъуа гупсысэр. 

 «Адыгэхэр игъащIэ лъандэм «щэращ», «хэщхьэж» жаIэу къокIуэкI, фэ фэщхьу «IифтIар» жаIэу щытакъым», - жиIэри, зи цIэр къэзымыгъэнэIуа хъыджэбз гуэрым къыфIыдрихьеяр кърикIутащ. Куэдым ар зэрыдаIыгъым и щыхьэту, зэуэ а псалъэуха закъуэм зиубгъуащ. Ауэ, гъэщIэгъуэнракъэ, хамэбзэм хуэерыщ муслъымэн щIалэгъуалэр и шхыдэкIэмкIэ игъэукIытэну хуея щхьэкIэ, а гупсысэ дыдэр шэрихьэт щIэныгъэхэмкIэ доктор Щхьэныкъуэ Анзор нэщI мазэм щытепсэлъыхьа зэIущIэм къыщиIэтауэ къыщIэкIащ зэрымыщIэкIэ: 
- Сыт хэщхьэжым фызэреджэр? – йоупщIIустазыр и пащхьэ къис щIалэхэм. 
- IифтIар.
- Плъагъурэ, адыгэбзэми хэтт ар дахэ дыдэу: «хэщхьэж». Ауэ дэ абы дыхуэмей зыдощI... А хьэрыпыбзэри хъарзынэщ, ауэ псалъэр уэ уи бзэм щыхэтыжым деж, сыт къыщIумыгъэсэбэпынур? Ар нэхъ дахэ, нэхъ екIу мэхъу. ЦIыхум и псэлъэкIэр зэгъэзэхуауэ, зыгуэрхэр къыхэмыпIиикIыу щытын хуейщ. Псалъэр щумыгъуэтым деж Iэбэ нэгъуэщIыбзэм, ауэ щыбгъуэтым деж, модэкIи мыдэкIи ущIэIэбэн щыIэкъым.
Псалъэмакъыр къыщыхъеякIэ, ардыдэр хужыпIэфынущ нобэ щIэх-щIэхыу зэхэтх, дин зезыхьэхэм фIыщIэр къызэраIуатэ «джэзакэллахьу хъейрэн» псалъэми. И мыхьэнэкIэ къапщтэмэ, ар игъащIэ лъандэм къыддекIуэкI «Алыхьым фIыгъуэ къыпхуищIэ» хъуэхъурщ. ФIыщIэр анэдэлъхубзэкIэ къэпIуатэмэ, куэд кIэрыхуу пIэрэ? ГъэкIэ къытезыгъазэ махуэшхуэхэм, псалъэм папщIэ, мис, нобэ едгъэжьэж НэщI мазэр иуха нэужь, «ЕтIанэгъэ пIалъэ фIыкIэ фынэс» жыдоIэ. А псалъэухари хьэрыпыбзэкIэ зекIуэ «Куллу хьам уэ Iэнтум бихъейр» жыхуиIэм и зэдзэкIыгъэ къабзэщ. Муслъымэн диным нэхъыщхьэ дыдэу хэт «Ла илахьэ илла лахь» псалъэухар «Алыхьыр закъуэщ, Бегъымбарым хьэкъщ» жиIэу зэзыдзэкIа лъэпкъым и бзэ тхыдэм дзыхь хуэщIыпхъэщ. Гум нэсу уи анэдэлъхубзэкIэ зэхэпх къыхуеджэныгъэм и къарури куэдкIэ нэхъ инщ.