Блым язщ

Жызумей хадэхэр къыщагъэщIэрэщIэжын хуейуэ Урысей Правительствэм къигъэлъэгъуахэм яхэхуащ ди республикэр. ЩIыналъэхэр 7 мэхъу: Кърымыр, Ростов областыр, Ставрополь краир, Кубань щIыналъэр, Осетие Ищхъэрэ - Аланиер, Дагъыстэныр, Къэбэрдей-Балъкъэрыр (Тэрч и Iуфэ удзыпцIэхэр).
ЖызумщIапIэхэм я гъунапкъэхэр хабзэм тету ягъэбелджылащ. Урысей Правительствэм игъэуващ, шагъырым елэжьыну IуэхущIапIэхэм ди къэралым къыщагъэкIа жызумхэм фIэкIа нэгъуэщI къэралыгъуэхэм ар кърашыну хуимыту, арыншамэ абы къыхащIыкIыр ди къэралым ейуэ къилъытэнукъым икIи абыкIэ хилъэфэнур а хабзэм ебакъуэхэрщ.
Совет лъэхъэнэм ди къэралым и жызумей хадэхэм гектар мини 4-м нэблагъэ яIыгъыу щытащ. Абы елэжьхэм нэхъ зытрагъащIэр техническэ жызум лIэужьыгъуэрти, жызумым и Iыхьэ тхуанэр «столовэкIэ» зэджэрт. Ди республикэр къапщтэмэ, нэхъыжьхэм фIыуэ ящIэж Тэрч, Прохладнэ щIыналъэхэм къыщрахьэлIэжу щыта жызум бэгъуахэр икIи абы нэхъыбэу егъэбыдылIар студент отрядхэрт. Ахэр а щIыпIэхэм щылэжьэн хуейт жызумыр зэрыщыту къыпачыжыху.
Иужьрей илъэси 10-15-м Прохладнэ, Тэрч щIыналъэхэм я бэджэндырылажьэхэмрэ я щIы кIапэ телэжьыхьыжхэмрэ зэрахузэфIэкIкIэ жызумей хадэхэр хасэжу хуежьа пэтми, Урысей утыкур зыгъэнщIыфынур, дауи, езы къэралым и нэIэм щIэту къызэригъэпэщыж IуэхущIапIэ инхэрщ. Абыхэм я фIыгъэкIэ жызумым елэжь предприятэхэр къэщIэрэщIэжынущ, ди къэралым езым и продукцэ къабзэ къыщIигъэкIынущ, апхуэдэ IуэхущIапIэхэм я фIыгъэкIэ цIыху куэдыр лэжьапIэ IэнатIэкIэ къызэгъэпэща хъунущ.